Ангилал

Сайтын талаар ярилцъя Уншигчдын санал бодол

Эхнэр нь буудуулаад амиа алдаж байхад Пак Жон Хый үгээ хэлж л байвУншсан25,493

Ер нь Пак 1979 оныг хүртэл Өмнөд Солонгосыг удирдахдаа эдийн засгийн өсөлтийг нь хурдасгаж Хан мөрний эрэг дэх ид шидийг бүтээсэн ч гэж болно.

Пак Жон Хый бол Өмнөд Солонгосыг 1961 оноос эхлэн 1979 онд бусдын гарт амиа алдах хүртлээ удирдаж байсан улс төрч, генерал юм. Пак 1961 онд Солонгосын Хоёрдугаар Бүгд найрамдах улсыг төрийн эргэлтээр унагаж, эрх мэдлийг гартаа авсан. 1963 онд Ерөнхийлөгчөөр сонгогдох хүртлээ тэрээр Үндэсний Бүтээн байгуулалтын Дээд Консулын тэргүүнээр ажиллаж байв. 1972 онд Пак цэргийн хуулийг баталснаар улсынхаа үндсэн хуулийг хоёрдугаарт тавьж, өөрийгөө ерөнхийлөгчөөр тунхаглажээ. Түүний амь насанд халдахаар хэд хэдэн удаа оролдсоны дотор Умард Солонгосын туршуулуудын халдлага хоёр удаа байв. 1979 оны аравдугаар сарын 26-нд Пак өөрийн хамгаалалтын албаны дарга Ким Жэ Гюүгийн гарт амиа алдсан юм. Ингээд 18 жил Өмнөд Солонгосыг удирдсан Пак Жон Хыйн түүхийг өгүүлье.

 

Пак Жон Хый 1917 оны арваннэгдүгээр сарын 14-нд Солонгосын колонийн Гиёнбук мужийн Гумид төржээ. Тэр ядуу тариачны гэр бүлд таван ах, хоёр эгчтэй айлын отгон хүүхэд болон төрсөн. Залуудаа Пак Дэгүгийн сургуульд багшлах зөвшөөрөл авч, багшийн сургууль төгссөний дараа Мунгёнд багшаар ажиллах болжээ. Энэ үедээ тэр Такаги Масао хэмээх япон нэртэй болсон юм.

Тэр үед Солонгос нь Японы эзлэн түрэмгийлэлд байсан тул Пак цэрэгт татагдаж улмаар тоглоомын улс болох Манж Го-гийн армид алба хааж, Чанчуны цэргийн академид элссэн. 1942 онд сургуулиа төгсөхөд нь чадварлаг офицер болохыг нь япон зааварлагч нар ажиглан түүнийг Япон дахь Эзэн хааны дайны коллежид үргэлжлүүлэн суралцахыг санал болгожээ. 1944 онд Пак Квантуны армид дэслэгч цолтойгоор Дэлхийн II дайны төгсгөлөөр алба хаажээ.

Дайны дараагаар Пак Бүгд найрамдах Солонгос улсын армид элссэн аж. Нутагтаа эргэн ирсэн Пак Солонгосын цэргийн академид бүртгүүлж 1946 онд ахмад цолтой төгсөөд Өмнөд Солонгос дахь АНУ-ын цэрэг армийн засгийн газрын харъяан дахь цагдаагийн армид офицер болжээ. Сингман Рийгийн удирдсан Өмнөд Солонгосын шинээр байгуулагдсан Засгийн газар 1948 оны арваннэгдүгээр сард Пакыг Солонгосын цагдаа доторх коммунист үүрийг удирдсан хэргээр баривчлав.

Цэргийн шүүхээс цаазаар авах ял оноосон ч Солонгосын цэргийн дээд зэргийн офицеруудын ятгалгаар Рий ялыг нь хөнгөрүүлжээ. Солонгосын дайн эхэлсний дараа Пак Өмнөд Солонгосын армид хошууч болон эргэн иржээ. 1950 оны есдүгээр сард дэд хурандаа, 1951 оны дөрөвдүгээр сард хурандаа болон дэвшив. Хурандаа болсныхоо дараа дайны үед II болон III их бууны ангийг удирдаж байв. Пак 1952 онд Армийн дээд удирдлагын тагнуулын хэлтэст орлогч дарга болсон бол 1953 онд дайн дуусахад бригадын генерал болж дэвшжээ. Солонгосын дайныг зогсоох эвлэрлийн гэрээ байгуулагдсаны дараа Пак зургаан сарын сургалтад хамрагдахаар Америкийн Форт Силл рүү явжээ.

Солонгост эргэн ирснийхээ дараа тэр маш хурдан дэвшив. 1958 онд хошууч генерал болохоосоо өмнө Өмнөд Солонгосын армийн 5 болон 7-р хэлтсийг удирдаж байлаа. Үүний дараа Нэгдүгээр Армийн Штабын дарга болсноор Солонгосын 1 болон 6-р дүүргийг удирдах болж, Сөүлийн аюулгүй байдлыг хамгаалах үүрэг хүлээв. 1960 онд Өмнөд Солонгосын армийн Үйл ажиллагааны дарга, Хоёрдугаар Армийн орлогч командлагч болсноор Пак цэргийн хамгийн нөлөөтэй, хамгийн хүчирхэг хүмүүсийн нэг болсон юм.

 
Эрх мэдэлд хүрсэн нь

 

1960 оны дөрөвдүгээр сарын 19-нд өрнөсөн оюутнуудын эсэргүүцлийн дараа Өмнөд Солонгосын анхны ерөнхийлөгч Сингман Рийгийн захиргааны үед төр нь авлигад идэгдэж, удирдлагагүй болсноос эдийн засаг уналтад орж, оюутнууд Рийг огцрохыг шаардах болов. Гудамжаар дүүрэн улс төр, эдийн засгийн өөрчлөлт хийхийг шаардсан жагсагчид. Цагдаа хүчний байгууллага Рийгийн засгийн газрын заавраар ажиллаж байсан тул хууль, дүрмийг үл тоосон нь олон нийтийн дургүйцлийг ихэд хүргэжээ. Эрх баригч Ардчилсан намыг засгийн эрхээс зайлуулахыг олон нийт шаардсаар байлаа.

Наймдугаар сарын 13-нд ардчилсан шинэ засгийн газар байгуулагдсан ч төдий л удсангүй огцорлоо. Юн Бо Сён ерөнхийлөгч хэмээн нэрлүүлж байсан ч, үнэн хэрэгтээ ерөнхий сайд Чан Мён бүх эрх мэдлийг гартаа төвлөрүүлсэн байв. Асуудал маш хурдан урган гарлаа. Учир нь ямар ч хүн Ардчилсан намын олонхийг юмуу танхимын бүтцийг захирч чадахгүй. Ерөнхий сайд Чан 5 сар тутамд танхимын албан тушаалыг 3 удаа сольж улс төрийг тогтвортой байлгахаар зорьж байв.

Олныг хамарсан энэхүү тогтворгүй байдлын эсрэг хошууч генерал Пак Хувьсгалт Цэргийн Хороог байгуулав. 1961 оны тавдугаар сарын 16-нд буюу Армийн Тэргүүн Чан До Ёныг оргон зайлсны дараа өдөр энэ байгууллага цэргийнхний дунд төрийн эргэлт хийв. Цэргийнхэн ийнхүү төрийн эрх мэдлийг хүчээр авснаар ерөнхийлөгч Юний ардчилсан сонгуулиар гарч ирсэн засгийн газрыг унагаж, Хоёрдугаар Бүгд Найрамдах улсын үеийг төгсгөл болгожээ.

Анхандаа Пакыг дэмжиж байсан цэргийн офицерууд шинэ засаг захиргааг бүрдүүлж байв. Шинэчлэн байгуулагдсан Үндэсний Сэргээн байгуулалтын Дээд Консулыг генерал Чан удирдлаа. Гэсэн ч 1961 оны долдугаар сард Чаныг баривчилсны дараагаар Пак консулын хяналтыг гартаа авсан юм. Улс төрийн эмх замбараагүй байдалд туйлдаж ядарсан энгийн ард иргэд төрийн эргэлтийг хүчтэй дэмжиж байв. Ерөнхий сайд Чан төрийн эргэлтийг эсэргүүцэн зогсож, ерөнхийлөгч Юн цэргийнхнийг эмх журамд оруулж АНУ-ын Наймдугаар Армийг ятган Солонгосын Армийн зарим командлагчдыг шинэ засгийн газарт саад хийхгүй байлгахыг оролдож байв. Харин америкчууд төрийн эргэлтийг тайван ажиглаж Пакд ямар ч саад учруулсангүй. Ингээд Пак дэслэгч генерал боллоо.

1961 оны зургадугаар сарын 19-нд цэргийн консулаас гадаад болон дотоодын дайснуудаас хамгаалж, дахин төрийн эргэлт хийхээс сэрэмжлэн Солонгосын Тагнуулын Төв Газрыг (СТТГ) байгуулав. Мөрдөн байцаах эрхийнхээ дагуу СТТГ засгийн газрын эсрэг бодолтой байгаа болон үйл ажиллагаа явуулахаар санаархаж буй хэмээн сэжиглэсэн бүхнээ баривчилж, цагдан хорьдог байлаа. Тус байгууллагын анхны даргаар Пакын ойрын хүн бөгөөд төрийн эргэлт хийхэд гар бие оролцсон, чөлөөнд суусан хурандаа Ким Жон Пил ажиллаж, түүний удирдлага дор СТТГ гадаад харилцаа, эдийн засгийн салбарт хүчээ нэмэгдүүлж байв.

Ерөнхийлөгч Юн албан тушаалдаа үлдэж, цэргийн дэглэмийг хууль ёсны болгов. 1962 оны гуравдугаар сарын 24-нд Юн огцорсны дараа Үндэсний Сэргээн байгуулалтын Дээд Консулын даргаар ажиллаж байсан дэслэгч генерал Пак түүний халааг авч Ерөнхийлөгч болон генерал цолтой болжээ. Кэннэдийн засаг захиргаанаас үзүүлж буй шаардлагын дагуу иргэний нийгмийг сэргээхээр болов. 1963 онд тэрээр шинээр байгуулагдсан Ардчилсан Бүгд найрамдах намаас нэр дэвшиж, ерөнхийлөгчөөр сонгогдсон. Иргэний намаас нэр дэвшигч ерөнхийлөгч асан Юнийг тэрээр тун бага 156 000 санал буюу 1,5%-иар ялсан бол 1967 онд дахин ерөнхийлөгчөөр сонгогдохдоо Юнийг мөн л багахан зөрүүгээр ялсан юм.

 
Өмнөд Солонгосын тэргүүн

 

 1960-аад онд Пак Солонгосыг эзлэн түрэмгийлж байсан Японы эсрэг мэдэгдэл их хийдэг байв. Гэхдээ дайнаас хойш хориод жил өнгөрөхөд Өмнөд Солонгост үймээн самуун, төрийн эргэлт гарч төр засаг нь авлигад идэгдэж байсан бол үнсэн товрого болчихсон байсан Япон улс хөл дээрээ хэдийнэ зогсож, эдийн засгаа хүчирхэгжүүлж амжсаныг Пак сайн ажиглаж байв. Ингээд тэрээр байр сууриа өөрчилж 1965 оны зургадугаар сард Пак Японтой харилцаагаа хэвийн болгохоор гэрээнд гарын үсэг зуржээ.

Тэрээр Японоос нөхөн төлбөр, хөнгөлөлттэй зээл авч хоёр улсын хооронд хөрөнгө оруулалт болоод худалдааг нэмэгдүүлэх талаар амжилттай алхам хийв. Дараа нь Пак аюулгүй байдлаа бодов. 1966 оны долдугаар сард хоёр орны хооронд илүү эрх тэгш харилцаатай болгохын тулд цэргийн хүчний гэрээг АНУ-тай байгуулжээ. АНУ-аас үзүүлэх аюулгүй байдал, эдийн засгийн баталгаатайгаар Умард Солонгосоос ирэх аюул заналаас сэргийлэх боломж ийнхүү бүрдсэн байна.

Үүний дагуу Вьетнамын дайн ширүүсэхийн хэрээр 1965 оны гуравдугаар сард явган цэргүүдээ илгээж, есдүгээр сард Өмнөд Вьетнамд Тэнгисийн цэргийн дивизүүдээ илгээсэн бол 1966 оны есдүгээр сард Цагаан морин дивизээ илгээсэн.

Тэрээр Вьетнамын дайны үеэр АНУ-ын хүсэлтийн дагуу Америкийн талд байлдуулахаар нийт 320 000 цэргээ Өмнөд Вьетнам руу илгээжээ. Ийнхүү тусалсан нь АНУ-тай ойрын холбоотон болж, Зүүн Ази дахь коммунизмаас сэргийлж, улсаа олон улсад нэр хүндтэй болгох зорилготой нь холбоотой. 1965 оны нэгдүгээр сард Үндэсний Ассамблэйд цэргүүд илгээх талаар санал хураалт явуулсан өдөр (106 саналаас 11 эсэргүүцсэн) Пак “Өмнөд Солонгос бусдаас тусламж хүссэн үлбэгэр байдлаасаа гарах цаг нь болсон. Харин ч тусламж үзүүлж, Олон улсын асуудалд үүрэг хариуцлагатай оролцож, санаачлагатай байх нь чухал юм” хэмээн мэдэгджээ.

АНУ-тай цэргийн холбоотон болж дайнд оролцсоноор Өмнөд Солонгос санхүүгийн дэмжлэг авч байлаа. АНУ-ын засгийн газраас Өмнөд Солонгосын цэргийн бүтэц бүрэлдэхүүнд цалин өгч байсан бөгөөд тэдний цалинг засгийн газар руу нь шууд шилжүүлж байжээ. Пак өөрсдийнхөө цэргийг Вьетнам руу олноор илгээж дайныг сунгах төлөвлөгөөтэй байв. Цэргүүд нь эргэн ирэх үед Өмнөд Солонгос хэдэн арван тэрбум ам.долларын тэтгэлэг, зээл, мөнгөн тэтгэмж, технологи, хөнгөлөлттэй худалдааг АНУ-аас авсан байв Энэ бүх боломжийг Жонсон болон Никсоны засаг захиргаа олгосон юм.

Энэ үед хоёр Солонгосын хоорондын өөрчлөлт ямар байгааг Пак харж байв. 1964 оны аравдугаар сараас эхлэн Умард Солонгос туршуулуудаараа дамжуулан Өмнөдөд суртал ухуулга, үймээн самуун зохион байгуулах болсон. 1966 оны аравдугаар сард Умард Солонгосын хорлон сүйтгэгч нарын гаргасан буудалцааны улмаас Өмнөд Солонгосын 30 гаруй цэрэг, 10 гаруй энгийн иргэн амиа алдсан юм. 1966 оны аравдугаар сард Солонгос дахь Америкийн армийн генерал Чарльз Бонстийлийн зөвшөөрлийг авалгүйгээр Пак хариу авах дайралт хийхийг зэвсэгт хүчиндээ тушаажээ.

Пакын цэргийн хүчин хоёр Солонгосын зэвсэггүй бүсэд байрлах болсноор 1966-1969 оны хооронд тэдний хоорондох мөргөлдөөнийг улам хурцатгасан. Заримдаа Солонгосын II дайн хэмээн нэрлэгддэг энэхүү мөргөлдөөн 1966 оны аравдугаар сарын 5-нд Ким Ир Сений 1953 онд байгуулсан Гал зогсоох гэрээг хууль ёсны бус хэмээн мэдэгдсэнтэй холбоотой. Өмнөд Солонгосын цэргийн хүчин одоогийн байдлаар Вьетнамын дайнд идэвхтэй оролцож байгаа тул дайн болвол Өмнөдийг хялбархан дийлнэ гэж Ким Ир Сен хариуд нь мэдэгджээ. Умард Солонгосын зүгээс АНУ-ын цэргүүд рүү зэвсэглэсэн өдөөн хатгалга хийвэл Пакын засаг захиргаанд нөлөөлнө гэж тэр бодож байв. Энэ нь Америк дэлхий дахинд өгсөн амлалтаа эргэн харж магадгүй байдалд хүргэх байлаа.

1968 оны нэгдүгээр сарын 21-нд Умард Солонгосын армийн тусгай хүчний “Юнит 124” хэмээх 31 хүнтэй баг Пакын аминд халдахаар оролдов. Цагдаагийн шалган нэвтрүүлэх тэднийг ерөнхийлөгчийн амьдарч, ажилладаг Цэнхэр Ордоноос ердөө 800 метрийн зайд л зогсоосон. Энэ үеэр болсон буудалцаанд Умард Солонгосын 2 туршуул амиа алдав. Үүний хариу болгож Ким Ир Сенийг алуулахаар “Юнит 684”-ийг Пак байгуулсан ч 1971 онд тараажээ.

Тэдний хооронд өрнөх дайсагналыг үл тоон Өмнөд, Умардын хооронд дахин нэгдэх гэрээ хэлцлийн талаар яриа хэлэлцээр болж байв. 1972 оны долдугаар сарын 4-нд хоёр орон ижил утгатай, хоёр тусдаа мэдэгдэл хийв. Дахин нэгдэх асуудлыг бид дотроо шийдэх бөгөөд үүнд гадны хүчний оролцоо байхгүйгээр, цэрэг зэвсгийн хүчийг ашиглалгүй энхийн замаар, талуудын хэн хэн нь улс төрийн болоод үзэл суртлын системийн ялгааг үл хамааран улс үндэстнээ нэгтгэхийн тулд хийх болно гэж мэдэгджээ. АНУ энэхүү мэдэгдлийг тун таагүй, цочирдон хүлээж авсан бөгөөд 1979 онд Пакыг алагдсаны дараа энэ тухай бичиг баримтыг чимээгүйхэн устгасан гэдэг.

1974 оны наймдугаар сарын 15-нд Колоничлолоос гарсны 29 жилийн ойн баяраар Сөүлийн Үндэсний Театрт Пакыг үг хэлэх үед урд эгнээнээс нь Мун Сэ Кван хэмээх залуу Пак руу буудав. Японд төрсөн Умард Солонгосыг дэмжигч алуурчны сум Пакыг бус эхнэр Юк Ён Сү (тэр өдрөө нас барсан) болон тайзан дээр байсан бусад хүнийг оножээ. Амьсгал хурааж буй эхнэрийг нь эмнэлэг рүү авч явж байхад Пак тайзан дээрээс үгээ үргэлжлүүлэн хэлж байлаа. Аллага үйлдсэн Муныг дөрвөн сарын дараа Сөүлийн шоронд цаазаар авсан.

Өмнөд Солонгос экспортод тулгуурласан хүчирхэг эдийн засагтай болоход Пак голлох үүргийг гүйцэтгэлээ. 1961 онд түүнийг засгийн эрхэнд гарах үед Өмнөд Солонгосын нэг хүнд ногдох ДНБ 72 ам.доллар байв. Харин Умард Солонгос эдийн засаг, цэргийн хүчний хувьд хангалттай сайн бөгөөд эрчим хүч, химийн үйлдвэрүүдтэйн зэрэгцээ Хятад, Зүүн Герман, ЗХУ зэрэг бусад коммунист улсуудаас санхүү, техник технологи, эдийн засгийн ихээхэн тусламж авдаг байв. Тиймээс Пак эдийн засагтаа ихээхэн анхаарал хандуулж улмаар Өмнөд Солонгосын үйлдвэрүүд үнэмлэхүй өндөр хөгжилд хүрсэн билээ. Засгийн газар болон корпорацийн хамтарсан нэгдэл нь Өмнөд Солонгосын экспортыг нэмэгдүүлэхэд ихээхэн үүрэг гүйцэтгэж, зарим компаниудаа өнөөгийн шилдэг дэлхийн аварга компаниуд болоход нь нөлөө үзүүлсэн юм.

1963 оны Үндсэн хуулиар ерөнхийлөгчийг дараалан хоёроос илүү удаа сонгогдохыг хязгаарласан байдаг тул 1967 онд дахин сонгогдож, үүрэгт ажлаа авсныхаа дараагаар Пак 1971 онд албан тушаалаасаа бууна гэж амлаад байв. Гэсэн ч энэ заалтыг өөрчилж, ерөнхийлөгчөөр гурван удаа дараалан сонгогдож болох заалтыг оруулсан. Түүний Ардчилсан Бүгд найрамдах нам Өмнөд Солонгосын Үндэсний Ассамблэйд олонх болсон учир ийнхүү өөрчилжээ.

1971 онд Пак өрсөлдөгч Ким Дэ Жуныг ялан дахин Ерөнхийлөгчөөр сонгогдлоо. “Олон улсын нөхцөл аюултай байна” хэмээн мэдэгдсэнийхээ дараагаар улсдаа онцгой байдал зарласан. 1972 оны аравдугаар сард Пак хууль тогтоох байгууллагыг тарааж, 1963 оны Үндсэн хуулийг түр түдгэлзүүлсэн. Үүний дараагаар шинэ үндсэн хуулийн төслийг бэлтгэж эхэлсэн юм. Хэдхэн долоо хоногийн өмнө яг ижилхэн алхам хийсэн Филиппиний ерөнхийлөгч Фердинанд Маркостай адил 1972 оны арваннэгдүгээр сард нэлээд удаан хэлэлцсэн Юшин Үндсэн хуулийг баталсан юм.

Шинэ Үндсэн хуульд засаг захиргааны албан бичгүүд бас байлаа. Ерөнхийлөгчийн сонгуулийг Үндэсний Конференц хэмээх сонгуулийн коллежид шилжүүлжээ. Энэ нь ерөнхийлөгчийн хүчийг нэмэгдүүлсэн билээ. Түүнд хүчээ нэмэгдүүлэх, үндсэн хуулиар эрх чөлөөг түр түдгэлзүүлэх эрхийг олгосон. Энэ бүх зорилго, зорилтын төлөө Пакын ерөнхийлөгчийн засаглал хууль ёсны дарангуйлал болсон. 1972 болон 1978 оны сонгуулиудад түүний эсэргүүцэх хүчин ч гарч ирсэнгүй.

 
Байгаа оносон аллага

 

1960-аад онд Пакыг ерөнхийлөгч болоход Өмнөд Солонгосын эдийн засаг үсрэнгүй хөгжсөн ч 1970-аад оны эхээр эдийн засгийн өсөлт саарч ирсэн. Өмнөд Солонгосчуудын дунд түүний дарангуйллын дэглэмийг буруушаагчид олон байв. Түүний аюулгүй байдлын арга ажиллагаа, хориг саад нь хувь хүний эрх чөлөөг хаан боож байв. Пак Солонгосын дайны үе шиг онцгой байдлын хуулиар далайлган өөрийн засаг захиргааг хуульчлан, хэвлэлийн болон үг хэлэх эрх чөлөөг хаасан. Үүнээс гадна түүний дор ажилладаг Солонгосын Тагнуулын төв гзар бусдыг баривчлах, байцаах эрх дархтай байсан тул Пакыг эсэргүүцэгч нарыг шүүлгүйгээр шууд цаазлаж байв. Ингэх тусам Юшиний системийг эсэргүүцэгчдийн жагсаал улс даяар өрнөж Пакын нэр хүнд унаж эхэлсэн.

1979 оны аравдугаар сарын 16-нд жагсагчдын хувьд шийдвэрлэх мөч болсон юм. Пусаны үндэсний их сургуулийн хэсэг оюутан Юшиний системийг дарангуйллыг дуусгахыг шаардав. “Пу-Ма” хэмээн нэрлэгдсэн (Пусан, Масаны нутгийн нэр) хөдөлгөөн төд удалгүй газар авч хотын гудамжинд оюутнууд, цагдаа нарын хооронд өдөржин мөргөлдөөн болж өрнөсөн. Тэр оройдоо Пусан хотын төв талбайд 500 000 хүн цуглажээ. Дараах хоёр өдөр нь эмх замбараагүй байдал үүсч, 400 жагсагчийг баривчилсан байна. Аравдугаар сарын 18-нд Пакын засгийн газар Пусанд дайны хууль гаргажээ. Яг энэ өдөр нь жагсагчид Масан дахь Кённам их сургуульд хүрсэн байлаа. Голдуу оюутан, ажилчдаас бүрдсэн 10 000 гаруй хүн Пакын байгуулсан Юшиний системийг эсэргүүцэн нэгдлээ. Эрх баригч намын удирдаж буй хотын захиргаа, цагдаагийн газрууд руу дайрснаар хүчирхийлэл маш хурдан газар авав. Шөнө дунд гэхэд Масанд тэр чигт нь хөл хорио тогтоосон юм.

1979 оны аравдугаар сарын 26-нд Пакын дарангуйллын гол баталгаа, гол зэвсэг нь болж байсан Солонгосын Тагнуулын төв газрынх дарга Ким Жэ Гюү ерөнхийлөгч Пакыг Сөүлийн Жонно гу дүүргийн Гунжён-дон дахь хамгаалалтай байшинд нь оройн хоолны дараагаар өөрийн гараар буудан хөнөөжээ. Ингэхдээ Ким ерөнхийлөгчийн бие хамгаалагчийг ч алсан юм.

СТТГ-ын бусад хүмүүс байшинд мөн амиа алдсан бөгөөд дөрөв нь ерөнхийлөгчийн бие хамгаалагч байжээ. Ерөнхийлөгчийг хөнөөсөн Тагнуулын газрын дарга Кимийн бүлгийнхнийг Өмнөд Солонгосын Армийнхан баривчилж, бүгдийг нь яллан цаазаар авсан. Болсон явдлыг бүхэлд нь тусгай албаныхны урьдчилан төлөвлөж, төрийн эргэлт хийх гэсэн оролдлого гэж үздэг. Пак ардчилалд садаа болж байсан тул өөрийгөө эх оронч алхам хийсэн гэж Ким зөвтгөжээ. Буддын шүтлэгтэй байсан Пакыг Сөүлийн Үндэсний оршуулгын газар хүндэтгэлтэйгээр нутаглуулсан. Харин Кимийг 1980 оны тавдугаар сарын 24-нд цаазаар авсан юм.

Пакын хувийн амьдралын хувьд залуудаа Ким Хо Нам хэмээх эмэгтэйтэй гэрлэсэн ч удалгүй салжээ. Үүний дараа Юк Ён Сүтэй гэрлэж, хоёр охин, нэг хүүтэй болсон. Сонирхолтой тохиол, хувь тавилан ч гэж хэлж болохоор үйл явдал болсон Пакийн том охин Пак Гын Хэ нь улс төрч болж улмаар 2012 оны арванхоёрдугаар сарын ерөнхийлөгчийн сонгуулиар өрсөлдөгч Мүн Жэ Инийг ялж, Өмнөд Солонгосын анхны эмэгтэй ерөнхийлөгч болсон ч саяхан олон жилийн ял авч шоронд суугаад байгаа билээ.

Өмнөд Солонгосчуудын олонх, ялангуяа Пакын төрсөн нутаг Ённам нутгийнхан Пакыг Солонгосын түүхэн дэх агуу удирдагчдын нэг бөгөөд түүний дэглэмийн дор Өмнөд Солонгосын эдийн засаг өсч, үйлдвэржсэнийг түүний байгуулсан алдар гавъяа хэмээн тооцдог. Ер нь Пак 1979 оныг хүртэл Өмнөд Солонгосыг удирдахдаа эдийн засгийн өсөлтийг нь хурдасгаж Хан мөрний эрэг дэх ид шидийг бүтээсэн ч гэж болно. Түүний дэглэмийн үед залуу насаа өнгөрөөсөн ахмад үеийнхэн социалист Умард Солонгосоос өөрсдийгөө хамгаалахын тулд Пакын бүтээн байгуулсан эдийн засгийн суурийг нь үнэлдэг. Гэсэн ч түүний хувь хүний эрх чөлөөг хязгаарладаг дарангуйлагч байсан нь яалт ч үгүй үнэн. Харин Солонгосын шинэ үеийнхэн болоод ардчиллын төлөө тэмцэж байсан хүмүүс түүний дэглэмийг буруушааж, Өмнөд Солонгосын ардчилалд хүрэх шилжилтэд саад хийсэн гэдэг.

Сэтгэгдэл 4ЭнгийнХэвтээБосооСэтгэгдэл бичих-Aa+
6 сар 1. 18:39
Зочин

Эдийн засгийн ямар ямар болдлого явуулсан талаар тодорхой бус байнаа .....

5 сар 27. 5:23
S.GBGoogle-р нэвтэрсэн

Хүчирхийлэл хэзээд муугын сүүдэрийг дагуулж цусан мөртэй байх юмдаа. Зорилго нь аргаа зөвтгөдөг нэрээр нийгэм олныг дарлаваас аяндаа хөөсрөн хага үсрэх юм даа!

6 сар 10. 9:51
Зочин

Угаасаа л өөр арга байхгүй.
Хийх л болохын бол хиых л болно. Түүний зөв

9 сар 15. 0:54
Зочинммм

Тухайн үедээ дээрмийн бүлэглэлүүдийг нам дарж авилгалчдыг шоронд хорьж эдийн засгийн үсрэнгүй хѳгжлийн суурийг тавьсан.Түүний байгуулсан цэргийн шүүх нь шударга ажиллаж хууль журамтай болгосон

Хүний эрх.эрх чѳлѳѳ зѳрчигдѳж байсан ч америк ах нар нь юу ч дуугараагүй.Одоо манайд ийм удирдагч л хэрэгтэй байна.

Сэтгэгдэл бичих
Санамсаргүй нийтлэл [ Энд дарна уу ]