Ангилал

Сайтын талаар ярилцъя Уншигчдын санал бодол

Ирээдүйн эхнэрийнхээ онгоцыг буудаж унагасан сөнөөгч онгоцны нисгэгчУншсан14,159

Дайсны эдгээр онгоцыг унагаж явах үедээ өөрийнхөө Р-38 дотор нэгэн бүсгүйг боддог байсан нь Орос гаралтай, нэг кинонд тоглоод амжсан кино жүжигчин бусгүй Валерия Барнуэлл гээч байжээ.

Дэлхийн хоёрдугаар дайны түүхэнд Герман болон түүний холбоотон бүх улсын ядаж нэг онгоцыг унагасан, дээр нь нэмэрлээд өөрийнхөө улсын онгоцыг унагасан сөнөөгч-нисгэгч хэр олон байдаг бол?  Лав л нэг байдаг ба тэр нь Герман, Итали, Япон, АНУ-ын (!) зэрэг нийт 10 гаран онгоц унагасан Америкийн ас Луис Кердс (Louis Edward Curdes) юм.

 

Перл Харбор-ын үйл явдал болсны дараа жирийн инженер байсан Луис Кердис цэрэгт сайн дураараа мордон мэргэжлийн дагуу нисэх хүчний ангид очжээ. Сөнөөгч нисгэгч болох тэрээр олон сар жил бэлтгэл хийсний дараа 1943 оноос Газар дундын тэнгист агаарын тулалдаанд оролцсон байна. Аливаа сөнөөгч нисгэгчийн анхны тулалдаан ямарваа нэг онцлог явдлаар дүүрэн байдаг ёсоор Луис эхний тулалдаандаа 3 “мессершмит-109” унагаажээ. Анхны тулалдаанд гурав шүү. Дараа нь Сардиний дээр дахиад хоёр, дараа нь Салерногийн тэнгэрт Италийн “Макки” унагаж ас хэмээгдэх нэр зүүж авлаа. Дайсны эдгээр онгоцыг унагаж явах үедээ өөрийнхөө Р-38 дотор нэгэн бүсгүйг боддог байсан нь Орос гаралтай, нэг кинонд тоглоод амжсан кино жүжигчин бусгүй Валерия Барнуэлл гээч байжээ.

Америкийн цэргүүдийн сэтгэл санааг өргөх жүжигчдийн тоглолтод оролцож явсан бүсгүй маань тоглолтыг нь үзэж байсан Луис-тэй танилцан улмаар... ямар ч байсан танилцан, залуу нисгэгчийн сэтгэл зүрхэнд  гал асааж орхисны хүчинд тэр юм уу сөнөөгч маань ганц нэгхэн сарын дотор өчнөөн олон дайсны онгоц унагаж баатар эр болсон байдаг.

Ингээд 1943 оны 8-р сарын 27 нд Луисын “аянга” (Lockheed P-38 Lightning) хэсэг мессерүүдтэй “нохойн зодоон” хийх явцад,  дайсны нэг онгоцыг буудаж унагаж байх үедээ хамгаалагчид нь буудуулж өөрөө унажээ. Хэдийгээр амьд мэнд буусан боловч Италичуудын хяналтад байгаа нутагт газардсан байсан учраас удалгүй баригдан цэргийн олзлогсдын лагерьт хоригдсон байна.

Хэдхэн хоногийн дараа оргосон мань эр (Италичууд бууж өгөн хорих лагер эзэнгүй болсон гэсэн хувилбар ч бий) Германчуудын гарт орохгүйн тулд нуугдан явсаар 8 сарын дараа буюу 1944 оны 5-р сард өөрсдийнхөн дээрээ хүрч очсон байна. Ийм урт хугацаанд хаагуур юу хийж явсныг өөрөөс нь өөр мэдэх хүн үгүй бололтой, ямар нэг мэдээ сэлт харагддаггүй билээ.

Нэлээд онгоц унагаж байсан, дээр нь олзлогдсон (олзлогдох бол Зөвлөлт, Япончуудын хувьд шившиг бол Америкт ийм биш) учир баахан одон медалиар шагнагдсан Кердс дахин тулалдах хүсэлтэй байгаагаа илэрхийлэн удалгүй Номхон далай явах болов. Тэнд Герман, Италийн онгоц дээр нэмэн Японы хүнд сөнөөгч  Ки 46 унагаж холбоотон гурван улсын онгоц унагасан цөөхөн хүний нэг боллоо.

 

Дараагийн олз буюу хувь заяаг нь шийдсэн тулалдаан

1945 оны 2-р сард P-51D Mustang-ын дөрвөл даргалсан Луис Кердис Японы нисэх буудлуудыг хайж олон дайрахаар агаарт гарлаа.

Нэгэн арлын дээр дөрвөл хоёр хуваагдан Луис дагуултайгаа хойд зүгт , нөгөө хос нь урд зүг чиглэсэн байна. Удалгүй урагшаа явсан хоёроос дайсныг илрүүлэн дайрч байгаа тухай мэдээ аван, туслахаар яаравчлан очиход өнөө хоёрын нэг нь унагаагдсан усанд байхыг олж харжээ. Эргэж очин аврах ажиллагааг эхлүүлэхээр яарсан Луис гэнэт Америкийн цэргийн тэмдэг бүхий зорчигч тээврийн онгоц Япончууд байгаа арал руу чиглэн нисэж яваатай таарлаа. Холбоогоор өөрийнхөө нэр ус, дуудлагыг хэлэн яаралтай эргэхгүй бол Япончууд буудаж унагана, олзолно гэж анхааруулсан ч өнөөх онгоцноос ямар ч чимээ анир байдаггүй. Аргаа барсан баатар маань онгоцны урдуур хэд хэдэн удаа дайрч замыг нь хаан хөндөлдөн орсон ч  онгоц чиглэлээ өөрчилсөнгүй. Одоо яах вэ?

Харсаар байж нутаг нэгтнүүдээ Япончуудад олзлуулах уу? Япончууд баригдсан хүнийг хэрхэн яргалж, тамладаг тухай Луис мэдэх учир сүүлийн арга болгож өөрийнхөө талын онгоцыг тулган буудлаа. Буудуулж гэмтсэн онгоц ч арлын ойролцоо усанд ослйын буулт хийсэн байна.

Онгоцноос аврах завь хаян түүн дээрээ гарч сууж байгаа хүмүүс бүгд Америкчууд болохыг Луис доогуур нисэхдээ харсан байна. Тэрхүү хүмүүс өөрсдийг нь буудсан Америк эрийг чухам юу гэж харааж загнаж байсан бол гэдгийг төсөөлөхөд хэцүү биш байх. Луис ч шатахуун дуусах дөхөж байснаас осолдсон онгоцыг удаан тойрох аргагүй болон буудлын зүг жолоо заллаа.

Маргааш нь Луис Каталан гидро-онгоцоор (усанд бууж, тасрах боломжтой онгоц)” хэрэг хийсэн” газраа очиж хүмүүсийг аврах ажилд оролцсон байна. Онгоцны нисгэгч зүг чигээ алдан төөрч явсаар шатахуун дуусах үед газрын бараа харсан ба тэр газарт хүрэхээр хамаг юмаа шавхан явахад  ”манайхны нэг тэнэг ” замд нь саад болж байгаад, дараа нь бүр буудаж унагасан тухай ярьжээ.

Тэр “нэг тэнэг” нь чухам өөрөө байсан гэдгийг Луис хэлж байх үед нэгэн бүсгүй гэнэт дуу алдсан ба Луис гайхан хартал өнөөх , өмнө нь нэг “танилцсан” бүсгүй байжээ. Тэр бүсгүйн сууж явсан онгоцыг буудан унагасан нь тэр байж.

Хачин сонин байдлаар ч гэсэн дахин учрах хувьтай байсан Луис Эдвард Кердс нь Светлана Валерьевна Шостакович  (Брануэлл гэсэн нэр нь тайзны нэр байжээ) -той 1946 онд хуримлан амар сайхандаа жаргасан гэдэг.

Нийтлэлч Чалчаа саарал

Сэтгэгдэл бичихийг түдгэлзүүлсэн байна
Санамсаргүй нийтлэл [ Энд дарна уу ]