Ангилал

Сайтын талаар ярилцъя Уншигчдын санал бодол

Хүн төрөлхтний ургийн бичигт багтаагүй одой HominidaeУншсан308

Энэ оны эхээр Hominidae-ийн судалгаа өргөжсөн ч энэхүү эртний хүнийг таньж мэдэх гэж хэдий их хичээнэ, төдий чинээ нууцлаг, үл ойлгогдох зүйлс ар араасаа хөвөрч эрдэмтдийг бүр төөрөгдүүлж орхижээ.

 

Индонезийн Флорес аралд нэгэнтээ нутаглаж асан, олон мянган жилийн өмнө устаж үгүй болсон Hominidae хэмээх хүн дүрст босоо явдалтныг одоогоос зургаан жилийн өмнө илрүүлж, өнөөг хүртэл судалж буй ч цаг үе, тархац нутаг болон дээд өвөг нь тодорхойгүй энэхүү одой хүн Homo-чуудын эгнээнд албан ёсоор нэгдээгүй байна. Энэ оны эхээр Hominidae-ийн судалгаа өргөжсөн ч энэхүү эртний хүнийг таньж мэдэх гэж хэдий их хичээнэ, төдий чинээ нууцлаг, үл ойлгогдох зүйлс ар араасаа хөвөрч эрдэмтдийг бүр төөрөгдүүлж орхижээ. Эд 1.8 сая жилийн тэртээх Homo erectus-ийн их нүүдлийн өмнө Африкаас гарсан эртний давжаа биетнүүд үү? Африкт үүссэн Чулуун зэвсгийн үеийнхэн 2.5 сая жилийн тэртээ Ази хүртэл нүүдэллэж чадсан гэж үү? Тэд Азид цоо шинэ төрөлтөн болон хувьсаж Африк руу буцсан уу? Бусад сүүн тэжээлтний үүсэл хөгжлийн түүхэнд ийн буцсан тохиолдол, нэг үгээр нүүдлийн хоёр урсгал байхгүй атал хоббит гэгдсэн Hominidae иймэрхүү урвуу хувьслын жишээ юү?

Эдгээр асуултаас сүүлийнх нь хамгийн хачирхалтай таамаг юм. Ямар ч амьтны хувьслын түүхэнд урвуу хувьсал буюу буцаад дээд өвгийнхөө замаар явсан тохиолдол үгүй. Тиймээс ч Hominidae-ийн асуудал мэргэжилтнүүдийг талцуулж, эрдэмтэн судлаачдын толгойг гашилгах болжээ. Одой Hominidae буюу хоббитуудыг судлах, нууцыг нь тайлахад бүхнээ зориулсан эрдэмтдийн нэг Стоуни Брүк их сургуулийн профессор Уиллиам Л.Жангерсийн хэлснээр хоббит нь антропологийн ухааны "хар хун" гэнэ. Урьдаас таамаглах аргагүй, тайлж ойлгоход амаргүй хоббит гаж сонин үзэгдэл хийгээд хар хүчний илэрхийлэл болжээ. Үнэхээр ч хоббиттой холбоотой бүхэн ер бусын. 

Флорес арлаас 2003 онд олдсон Hominidae-ийн төрөл маш жижиг, ердөө 90 орчим см өндөр байжээ. Богино хөл нь орчин үеийн хүнийх шиг алхаж гишгэхэд сайтар зохицоогүй байсан байх талтай ч лав гүйдэг байсан нь тогтоогдсон байна. Метр хүрэхгүй биеийнх нь хэсгүүд жижиг авч харьцаа сайтайг нь эрдэмтэд онцолдог. Гавлын яс нь л гэхэд жижиг тарваснаас томгүй агаад орчин цагийн хүний уураг тархинаас ялигүй том аж. Харин жижиг тархитай атлаа Hominidae хавьгүй том тархитай төрлийнхний хийж байсантай адил чулуун зэвсэг урлаж байсан нь тун сонирхолтой баримт юм. Австралид хүртэл орчин цагийн хүн суурьшсаны дараа буюу 17 мянга гаруйхан жилийн өмнө Hominidae-чууд алслагдсан аралд амьдарч байсныг гэрчлэх ул мөр олджээ.

Одоогийн Ази-Номхон далайн бүсэд олон зуун мянган жилийн турш амьдарсан Homo erectus-тай нэгэн үед хамаарахыг нь нотлох баримт ч мөн байдаг. Гэхдээ эрдэмтдийн тогтоосноор Homo erectus, Homo sapiens-ийн аль аль нь хоббиттой гэхээсээ өөр хоорондоо илүү хамаатай. Флорес арлаас олдсон нэгэн эмэгтэйн гавлын яс Hominidae-ийн урьд өмнө нь бүртгэгдээгүй  Homo floresiensis хэмээх шинэ төрлийнх хэмээн тэмдэглэгджээ.

Hominidae-ийг зарим судлаач ген, патологийн согогтой хүний одой төрөл гэж үздэг. Харин Hominidae судлалд мэргэшсэн Уильям Л.Жангерс нарын судлаачид Hominidae-ийн H.floresiensis  зүйлийг Homo sapiens-аас ч өмнө оюунлаг болсон хүн дүрстэн гэж үзэж байна. Индонез, Австралийн судлаачдын дээрх олдворыг хайхарсангүй хэмээн мэргэжил нэгтнүүдээ шүүмжилж байсан Стоуни Брүк их сургуулийн харьяа хүрээлэнгийн тэргүүн, Hominidae-ийн зартай хайгуулч Ричард Лики, дээрх судалгааны багийн гишүүн, Австралийн Воллонгонг их сургуулийн эрдэмтэн Майкл Ж.Морвүүд нар тэдний төлөөлөл бөгөөд Hominidae-ийг хүний аймгийн бие даасан төрөл гэдгийг нотлохыг хичээж байна. Тэдний тооцоогоор эртний хоббитууд Флорес аралд 880 мянган жилийн тэртээ хөл тавьжээ. Үүнийг нотлохын тулд Hominidae судлалыг өргөжүүлж, хайгуул судалгааны ажилд зарцуулах хөрөнгийн хэмжээг нэмэх хэрэгтэйг тэд олонтаа ярьж албаныхан, хөрөнгө оруулагчдад ханддаг ч нааштай хариу сонсох нь ховор гэнэ.

Флорес арлаас олдсон шиг хэд хэдэн олдвор Hominidae-ийн төдийгүй хүн төрөлхтний хөгжлийн түүхийг өөрчилж мэдэх юм. 880 мянган жил хэмээх дээрх тооцоо дуулиан дэгдээхэд хангалттай ч шинжлэх ухаан хангалттай баримт шаарддаг тул Флорес арлын H.floresiensis дангаараа Hominidae-ийг хүн төрөлхтний ургийн бичигт багтааж дөнгөхгүй.

Орчин цагийн хүнтэй холбоотой хамгийн эртний олдвор 11 мянган жилийн настай билээ.

Одой эмэгтэйн гавлын яс олдсон Флорес арлын Лианг Буа хэмээх агуйд судалгааны ажил үргэлжилж буй ч дээрх мэргэжилтнүүд зэргэлдээх арлуудад хайгуул хийхийг тэсэн ядан хүлээж байна. Судлаачдын таамаглаж буйгаар Флорес шиг алслагдмал аралд нутаглаж байсны хувьд Hominidae-ийн хөгжил Homo erectus, Homo sapiens-ийнхаас огт өөр байжээ. Тодорхойгүй шалтгаанаар бие нь олон мянганы турш давжаарсан Hominidae-ийг судлаачид анхандаа Homo erectus-ийн удам гэж таамаглаж байсан ч Африкаас дэлхийн бусад хэсэгт тархсан босоо явдалт анхны хүн гэгддэг уг төрөлтэй холбоогүй болох нь удалгүй батлагджээ. Эрдэмтдийн сонирхлыг хамгийн ихээр татдаг давжаарах явцтай холбоотой ихэнх зүйл өнөө ч нууцлаг хэвээр байгаа хэдий ч Hominidae-ийн хөгжлийн түүхээс нэг зүйл гарцаагүй байгаа нь энэхүү давжаарах явц тархиных нь хөгжилд сөргөөр нөлөөлөөгүй явдал юм.

Hominidae-ийн гар, хөлийн ясыг судалсан эрдэмтдийн онцолдгоор хоббитуудын яс орчин цагийн хүн болоод неандертальчуудынх шиг шөвгөр биш, харин бичнийх шиг шаантаг хэлбэртэй нь хоббитууд хүний аймгийн эртний төрлөөс 1-2 сая жилийн өмнө салаалж хөгжсөнийг харуулж буй гэнэ. Гэсэн ч эдгээр бяцхан хүн чухам хаана үүсэж, хаанаас ирсэн нь нууц хэвээр.

http://aniryortonts.blogspot.com

Г.Лхагвадулам

Сэтгэгдэл 0ЭнгийнХэвтээБосооСэтгэгдэл бичих-Aa+
Санамсаргүй нийтлэл [ Энд дарна уу ]