Ангилал

Сайтын талаар ярилцъя Уншигчдын санал бодол

Намайг өршөөгөөч, би үхэх ял хүртэхээр нүгэлтэйУншсан33,518

Өмнөд Солонгосын анхны эмэгтэй ерөнхийлөгч Пак Кын Хед шүүхээс 118.5 тэрбум вон төрөөс завшсан, авлига авсан, улсын нууц задруулсан хэргээр 24 жилийн хорих ял оноолоо

 

Өмнөд Солонгосын анхны эмэгтэй ерөнхийлөгч Пак Кын Хед шүүхээс 118.5 тэрбум вон төрөөс завшсан, авлига авсан, улсын нууц задруулсан хэргээр 24 жилийн хорих ял оноолоо. Шүүх хурлыг телевизээр шууд дамжуулан хүргэж, гудамжинд ард иргэд нь баярын цуглаан хийж байна. Гурван жил дамнан шуугиулсан Пак Кын Хегийн хэрэг ийнхүү шүүхээр шийдүүллээ. Ямар нэг байдлаар түүний ялыг хөнгөвчлөхгүй бол өдгөө 66 настай Пак Кын Хе 90 настайдаа шоронгоос суллагдах ажээ.

Анх 2016 оны 10 сард Пак Кын Хе багын найз Чой Сүн Шилийнхээ үгээр төрийн олон хэргийг шийдэж байсан баримт, мэдээлэл бүхий ipad олдож хэвлэл мэдээллийнхэнд хүрснээр Ерөнхийлөгч эмэгтэйг огцруулах олон нийтийн эсэргүүцэл эхэлсэн юм.  Хоёр сарын турш Солонгосын олон нийт 1-2 сая хүний эсэргүүцлийн жагсаалыг удаа дараа хийж үүний хариуд Пак Кын Хе хоёр ч удаа уучлал гуйсан ч нэмэр болоогүй. Олон нийт түүнийг шууд огцрохыг шаардаж байв.

Эцэст нь 2016 оны 12 сарын 9-нд Солонгосын Үндэсний Ассамблей Ерөнхийлөгчөө огцруулах санал хураалт явуулж 300 гишүүнээс 234 нь дэмжсэнээр албан тушаалаас нь түдгэлзүүлсэн. Улмаар мөрдөн байцаалтын явцад Пак Кын Хэг бизнесийн магнатуудаас авлига авсныг баттай тогтоож, албан тушаалаас нь огцруулж, урьдчилан хорих төвд хорьж байсан билээ.

БНСУ-ын прокурорууд түүнийг томоохон бизнес эрхлэгчдээс олон сая ам.долларын хахууль авсан 18 хэргийг шалгаж, түүнд 30 жил шоронд хорих ял төлөвлөсөн. Пак Кын Хэгийн талаас олон шалтаг шалтгаанаар шүүх хуралд оролцохоос татгалзаж, шүүх хурлыг хойшлуулж байсан ба өнөөдөр ийнхүү шүүх бүрэлдэхүүн шийдвэрээ гаргаж 24 жилийн ял оноогоод байна.

 
Анхны эмэгтэй Ерөнхийлөгч - Ээлжит авлигач Ерөнхийлөгч

 

Пак Кын Хегийн нэр холбогдсон олон тэрбум ам.долларын авлигын хэрэг огцом томорсон. Сөүлийн тойргийн прокурорын газраас экс ерөнхийлөгчид 18 хэрэг үүсгэснээ мэдэгдсэн. Тэрээр тагнуулын байгууллагаасаа хүртэл их хэмжээний авлига авсан нь тогтоогдсон. Ингэхдээ тагнуулын албаны гурван албан тушаалтнаар дамжуулан албаны сангаас 3,5 тэрбум воныг (3.3 сая ам.доллар орчим) авч хувийн зорилгоор ашигласанаа хүлээсэн байдаг. Тэр мөнгөөр Пак Кын Хе хувийн сууцныхаа засвар үйлчилгээг төлж, хамтран амьдрагчдаа хувцас хунар авч өгөх, зөвлөхүүдээ урамшуулах зэрэгт зарцуулжээ. Уг хэрэгт холбогдуулан тагнуулын албаны хоёр өндөр албан тушаалтныг баривчилсан юм.

Мөн энэ бүх хэргийн сэжүүр болсон түүний дотны найз Чой Сун Шилд шүүхээс 20 жилийн ял оноож хэдий нь ялыг нь эдлүүлж эхэлсэн. Үүнээс гадна авлигын хэрэгт Өмнөд Солонгосын томоохон компанийн удирдлагууд ч холбогдож, Самсунг группийн өв залгамжлагч И Жэ Ён таван жилийн ял сонсож шоронд орсон. Мөн Лоттэ группийн захирал Шин Дун Бинд прокуророос дөрвөн жил, өөр бас нэг томоохон компанийн эзэнд зургаан жилийн ял оноосон билээ.

 

Намайг өршөөгөөч, би үхэх ял хүртэхээр нүгэлтэй

 

Дөчин жил нөхөрлөсөн найзаараа хэлэх үгээ хянуулдаг нь ард түмэнд ил болсноор Пак Кын Хе сүйрэн унасан гэж хэлж болох. Германд оршин суудаг Чой Суншил нь Ерөнхийлөгч Пак Кын Хетэй найз нөхдийн холбоогоо ашиглан олон сая ам.доллар завшиж, төрийн хамаг л хэрэгт хутгалддаг нь ил болсон. Дуулианы улмаас хууль хүчнийхэн Чой Суншил Германаас албадан ирүүлж мөрдөн байцаалт явуулаад 20 жилийн ял өгч, АНУ, Герман дахь олон тооны үл хөдлөх газар, хоёр ч томоохон зочид буудал, тансаг зэрэглэлийн хувийн орон сууцуудыг нь улсад хураан аваад байгаа.

Тэрээр байцаалт өгөх үеэрээ өөрийгөө цөөн хэдэн удаа л найзын хувиар Ерөнхийлөгчийн хэлэх үгийг засан, хянаж байсан. Түүнээс өөрөөр ямар ч байдлаар төрийн хэрэгт оролцсон зүйл байхгүй гэдгээ хэлсэн. Харин олон нийтийн хүчтэй эсэргүүцэлтэй тулгарах үеэрээ “Намайг өршөөгөөч, би үхэх ял хүртэхээр нүгэл үйлдсэн” хэмээн уйлан ярьж байсан юм.

Өмнөд Солонгосын Ерөнхийлөгчийг тойрсон дуулиан оюутны эсэргүүцлийн жагсаалаас эхтэй. Ихва эмэгтэйчүүдийн их сургуулийн оюутан Жон Юра гэгч тусгай элсэлтээр шалгалт өгөлгүй сургуульд орж, хичээлдээ суудаггүй атлаа өндөр үнэлгээ авсанд бусад оюутнууд шударга бус явдал хэмээн үзэж эсэргүүцжээ. Учир нь Ихва их сургууль улсдаа нэр хүндтэй төдийгүй эмэгтэй улс төрчид энэ сургуулиас төрөн гардаг байна. Ийм нэр хүнд бүхий сургуульд орох гэж олон зуун хүүхдүүд хоорондоо өрсөлдөж, элсэн орсон хэсэг нь үүнийгээ батлах гэж шамдан сурах болдог аж. Гэтэл Жон Юрагийн их сургуульд шалгалтгүй орсон болон хичээлийн үнэлгээнүүд нь авлигатай холбоотой болох нь илэрч Ихва сургуулийн захирал огцорчээ. Өмнөд Солонгосын сэтгүүлчид оюутнуудын жагсаалын үеэр Жон Юра гэгч хэн болохыг судалж эхэлсэн ба хувийн ipad нь алдагдаж, доторх мэдээлэл нь сэтгүүлчдийн гарт орсноор ерөнхийдөө бүх зүйл олон нийтэд илчлэгдсэн билээ. Ipad доторхи бүх баримт Жон Юраг Ерөнхийлөгчийн дотны найз Чой Суншилийн охин болохыг илчилж өгсөн юм.

Өмнө нь авлигад идэгдсэн БНСУ-ын экс Ерөнхийлөгч  нар болох Ким Ён Сам, Ким Дэ Жүн, Ну Мү Хёнь, И Мён Паг нар гэр бүлийнхнийхээ хязгааргүй шуналаас болж огцорч байв. Харин Пак Кын Хег эцэг, эх нь хоёул нас барсан, дүү нараасаа хөндий байдаг учраас гэр бүлийн авлигаас ангид хэмээн хүмүүс хардаг байв. Гэтэл Пак Кын Хегийн олон жил нөхөрлөсөн дотны найз Чой Суншил гэгч авлигын мастер болох нь сэтгүүлчдийн эрэн сурвалжлах ажиллагааны үр дүнд илэрсэн байдаг.

Чой Суншилийн эцэг Чой Тэмин нь авлигач нэгэн байсан бөгөөд 1970-аад онд өөрийн гэсэн шашны урсгалыг үүсгэн байгуулж хүмүүсийг өвчнөөс эдгээнэ хэмээн номлодог байжээ. Чой Тэмин 1975 онд анх Пак Кын Хетэй уулзсан байв. Тухайн үед Пак Кын Хе 23 настай, дөнгөж ээжийгээ алдаад байжээ. Хойд Солонгосын тагнуул Пак Кын Хегийн ээжийн амийг хөнөөсөн аж. Чой Тэмин нас барсан ээжийнх нь сүнстэй холбогдсон хэмээн Пак Кын Хед итгүүлснээр байнга харилцаатай байх болжээ. Энэ цагаас эхлэн Чой Суншил, Пак Кын Хе нар нөхөрлөж, дүү нараасаа хөндийрч эхэлсэн байна.

Пак Кын Хе 1997 онд эмэгтэйчүүдийн ассамблейд нэр дэвшснээр улс төрд хөл тавьжээ. Тухайн үед түүнийг далдаас найз Чой Суншил нь дэмжиж байсан аж. Пак Кын Хе Ерөнхийлөгч болохоосоо өмнө хэд хэдэн буяны сан нээсэн нь сүүлд Чой Суншилийн мөнгө угаах хэрэгсэл болсон аж. Өмнөд Солонгосын соёл, спорт, аялал жуулчлалын яамнаас Чой Суншилийн төсөл, хөтөлбөрүүдэд жил бүр 150 сая ам.долларын төсөв баталж байсан нь илчлэгдсэн юм.

Сэтгэгдэл 0ЭнгийнХэвтээБосооСэтгэгдэл бичих-Aa+
Санамсаргүй нийтлэл [ Энд дарна уу ]