Ангилал

Сайтын талаар ярилцъя Уншигчдын санал бодол

Түүхэн гэрэл зургуудын ард үлдсэн нууцуудУншсан8,021

“Хар салхи” хочит Рубин Картер торны цаана суух хүртлээ Америкийн хамгийн шилдэг боксчдын нэг байв

Орчин үеийн дэлхийн түүхийн (сүүлийн 100 жилийн гэж хэлэх нь зүйтэй болов уу) ихэнх хэсэг бидэнд гэрэл зургаар дамжин хүрдэг билээ. Хэдий бид тухайн түүхэн үйл явдлыг нүдээр үзээгүй, болсон явдлын талаар өнгөц ойлголттой байдаг ч дэлхийд танигдсан ганцхан зураг тэр талаарх хангалттай хэмжээний мэдээллийг агуулдаг. Ингээд бид та бүхэндээ бодит үнэнээс зөрсөн гэрэл зургуудыг танилцуулж байна.

Зургийн түүх 1: “Хар салхи” хочит Рубин Картер торны цаана суух хүртлээ Америкийн хамгийн шилдэг боксчдын нэг байв. Түүнийг аллагын хэрэгт буруутган шударга бусаар ялласан хэмээн иргэд, тэр дундаа залуу үеийнхэн үзэж байжээ. Зохиомол хэмээн үзэж байсан энэ дуулиант хэрэг олны анхаарлын төвд байсан нь алдарт Боб Диланы анхаарлаас гадуур өнгөрөөгүй байна. Хууч яриагаар бол, энэ зургийг Дилан хорих ангид тоглолт хийгээд буцах замд торны цаана суугаа Картертай санамсаргүй таарсан үед авчээ. Энэ уулзалт Бобд гүнзгий сэтгэгдэл үлдээж, улмаар алдарт “Hurricane” дуугаа бичихэд хүргэсэн гэдэг.

Бодит байдал: Үнэн хэрэгтээ сэтгүүлийн зурагчид энэхүү хуурамч зургийг хэдэн цагийн турш бэлтгэсэн бөгөөд Дилан болон Картер хоёрын хоорондох шоронгийн торыг төмөр хашаагаар орлуулан байршуулсан гэдэг. Гэхдээ шар сонины сэтгүүлчдийн энэ үйлдэл зургийн эздэд эерэгээр туссан байна. Боб Дилан "Хар салхи"-ийг хэдэнтээ эргэж очсон бөгөөд хэргийг нь цагаатгах, өмгөөлөх, давж заалдах ажилд гар бие оролцож Картерыг шоронгоос гаргаж чадсан байна.

Зургийн түүх 2: 1964 он. Рейтингээрээ хамгийн өндөрт яваа шинэ залуу хамтлагийн залуус "Эд Салливан"-ы шоунд оролцож, өөрсдийн шүтээн боксчин Кассиус Клейтэй (Мухаммед Али) зургаа авахуулсан байна. Зураг ч тухайн үеийн бүх сонин хэвлэлүүдээр гарч, хүмүүс ч алдартнуудын нөхөрлөлд таатай хандаж байв.

 

Бодит байдал: Үнэндээ Битлзийнхэн Мухаммед Алитай биш, Сонни Листонтой л зургаа авахуулах гэж төлөвлөж байжээ. Хүмүүс Битлзээр өвчилж эхэлж байсан тэр үед эсрэгээрээ Мухаммед Алигийн фен клуб ч сураггүй, түүнийг бүр дурсдаг ч үгүй байв. Тийм нэртэй боксчин байдгийг ч ихэнх нь мэддэггүй байлаа. Харин бокс сонирхогчид л Сонни Листонтой бүсийн аваргын төлөөх тулаанд гэнэтийн ялалт байгуулсан Кассиус Клейд (Мухаммед Али) найдвар тавьж байсан цаг байжээ.

Гэтэл тэр үед дэлхийд алдартай боксчин байсан Сонни Листонтой хамт патиараа татуулах гэсэн “Beatles”-ийн залуусын саналаас мөнөөх хямсгар Листон татгалзсан байдаг. Ингээд зөвхөн өрсөлдөгч нь буюу Мухаммед Али үлджээ. Мухаммед Алигийн хувьд хэн нэгэн алдартай хамтлагийнхан түүнтэй зургаа авахуулах эсэх нь огт сонин биш байв. Учир нь тэр тулаанд бэлдээд үүнийг анхаарах сөхөөгүй байжээ. Тиймдээ ч Ливерпүүлийн дөрвөлийг гарч явсны дараа тэрээр туслахаасаа “Энэ дөрвөн ижил хүйстэн британи чинь хэн билээ?” гэж асуусан гэдэг. Хэдхэн жилийн дараа боксчин нь ч тэр, хамтлаг нь ч ялгаагүй алдрын оргилд хүрцгээсэн төдийгүй зууны шилдэг хамтлаг, зууны шилдэг боксчин хэмээн түүхэнд үлдсэн билээ.

Зургийн түүх 3: Нью-Йорк хот. 1932 он. 400 метрийн өндөрт байрлах төмөр тавцан дээр суугаад үдийн хоолоо идэх 11 ажилтны хөл Нью-Йорк хотын дээр чөлөөтэй савах ажээ. Энэ хүчирхэг дүр зургийг гэрэл зурагчин Чарльз К.Эббетс авсан бөгөөд бүгд үүнийг хуурамч зураг хэмээн сэжиглэсэн юм. Нэгдүгээрт: Эдгээр ажилчдыг таних хүн нэгээхэн ч гараагүй юм. Харин хоёрдугаарт: Ийм өндөрт санаа амар хоол идэж чадах зоригтой хүмүүс байхгүй гэдэгт итгэж байв.

Бодит байдал: Жилийн өмнө энэхүү агуу зургийн нууц тайлагдсан юм. Эдгээр залуус үнэхээр ямар ч даатгалгүйгээр бас ямар ч хамгаалалтгүйгээр уг төмөр дээр сууж байжээ. Учир нь тэд мэргэжлийн акробатчид байсан бөгөөд “RCA Building” тэнгэр баганадсан барилгын сурталчилгааны ажилд дайчлагдсан нь энэ ажээ. Мэдээж амь насаараа дэнчин тавьсны төлөө тэд багагүй мөнгө халаасалсан байна.

Сэтгэгдэл 0ЭнгийнХэвтээБосооСэтгэгдэл бичих-Aa+
Санамсаргүй нийтлэл [ Энд дарна уу ]