Ангилал

Сайтын талаар ярилцъя Уншигчдын санал бодол

"XX зуун": 100 жилийн гамшиг эхэлсэн нь-2

Англи улс дайны шинэ тактик хэрэглэх болсон нь “Дотор талаас нь мөхөсдүүлэх” арга байлаа.

Цувралын өмнөх нийтлэлийг ЭНД дарж уншина уу.

Британийн эзэнт гүрэн дайны шинэ тактик хэрэглэх болсон нь “Дотор талаас нь мөхөсдүүлэх” арга байлаа. 1916 оноос Англи улс Германы холбоотон Османы эзэнт гүрнийг нураан унагах ажиллагааг ийм тактик урдаа барин явуулж эхлэв. Тэрхүү ажиллагаанаас нэгэн домог болсон баатар төрөн гарчээ.

Османы эзэнт гүрэн нь Германтай цэргийн холбоо үүсгэн Дэлхийн 1-р дайнд оролцож байлаа. Германы эзэн хаан 2-р Вильгелм Османы султаны урилгаар айлчилж буй бичлэг үлдсэн байдаг. 600 жилийн турш Европ, Азийг холбосон асар их газар нутгийг эзлэн оршсон Османы эзэнт гүрэн. Гэвч дэлхийн нэгдүгээр дайны үед олон удаагийн дайн, тулаанаар хүч нь мөхөсдөж “Үхлээ хүлээсэн өвчтөн” гэж нэрлэгдэж байв. Османы эзэнт гүрний газар нутгийг өнөөгийн дэлхийн улс төрийн газрын зурагтай давхцуулан үзье. Газар нутаг нь өнөөгийн Ойрхи Дорнодын газар нутагтай ижил байжээ.

Тухайн үед Османы эзэнт гүрэн нь 18 сая хүн амтай, турк, араб үндэстэн нийлээд хүн амынх нь 70 хувийг эзэлж күрд, еврэй зэрэг олон үндэстнээс бүрдсэн улс байв. Англи улс нь Араб үндэстний тусгаар тогтнолын хөдөлгөөнд анхаарлаа хандуулж, тэдний үйл хөдлөлийг ашиглан Османы эзэнт гүрнийг дотор талаас нь нураан унагаах бодлого явууллаа. Англичуудын гол зорилго нь Османы эзэнт гүрний нутаг дэвсгэрт ихээр олдох болсон газрын тосны асар их нөөцийг эзэмшихэд байв.

1919 он. Парис хот. Версалийн гэрээний үеэр. Урд эгнээнд хунтайж Файзал. Арын эгнээнд зүүнээс Рустум Хайдар, Нури ас Саид, франц ахмад Писани, "Арабын" Лоуренс, ахмад Хассан Хадри. Арын эгнээнд хунтайж Файзалын зарц

 

Англи улс Арабын нөлөө бүхий хүмүүстэй нууцаар уулзах болов. Лалын шашныг үндэслэгч Мухаммедийн үр сад гэгдэх Хусейн, түүний цусан төрөл Файзал (Faysal)-тай холбогдох үйл ажиллагааг хариуцах болсон хүн нь идэр залуухан тагнуулч Томас Эдвард Лоренс.

Файзалд британичууд буу зэвсэг, мөнгө санхүүгийн дэмжлэг үзүүлэн Османы эзэнт гүрнээс тусгаар тогтноход нь туслав. Англи гаралтай ч Арабын соёл иргэншлийг сайн мэдэж ойлгодог, араб хэлээр маш сайн ярьдаг "Арабын" гэх тодотголтой Лоренст Файзал маш их итгэдэг байжээ.

Англи улс нь Файзалд Османы эзэнт улсыг хамтран мөхөөсний хариуд Араб үндэстний тусгаар тогтносон улс байгуулахыг хүлээн зөвшөөрнө гэсэн хэлэлцээр хийв. Английн хэлэлцээрт итгэсэн Файзал тусгаар тогтнолын төлөөх босогчдын армийг зохион байгуулав.

Лоренсийн номноос: Османы эзэнт гүрнийг ялахын тулд Араб үндэстний хүсэл эрмэлзэл маш чухал байв. Тиймээс би “Англи улс амласнаа заавал биелүүлнэ” гэж итгэлтэйгээр хэлж байлаа. Миний хэлсэн үг Араб үндэстнийг зоригжуулсан билээ.

Арабын босогчид Османы төмөр замын ачааг дэлбэлж партизаны дайны аргаар Османы армид ихээхэн хохирол учруулж байв. Лоренсийн нэрийг дэлхий дахинд алдаршуулах боломжийг тавьсан хүн бол АНУ-ын кино найруулагч Ровер Томас. Холбоотны армийн захиалгаар үзэл суртлын кино хийж байсан тэрээр Лоренстэй танилцсан байдаг.

Томасын дурсамж: Араб үндэстний хувцас өмссөн Лоренстэй санамсаргүйгээр танилцсан тэр мөчид түүнд бусдыг татах маш их хүч чадал байгааг мэдэрсэн.

1962 оны Английн “Арабын Лоренс”

уран сайхны кино.

Лондонгийн Роял дуурийн театр. Томас нь Лоренсийг “Цөлийн баатар” болгон өргөмжилсөн кино хийв. Нээлтийн өдөр, Лоренсийн амь дүйсэн ажиллагаа бүхий киног Томас өөрөө тайлбарлав. Киноны нэр нь “Арабын Лоренс”. “Османы эзэнт гүрний дарангуйлал дор зовж зүдэрч буй Араб үндэстэнд тусалсан Англи улсын Лоренс. Араб үндэстний удирдагч Хаашимийн гэр бүлийн Файзал. Түүний хажууд байгаа хүн бол Арабын титэмгүй хаан Лоренс” гэж гайхамшиг болгон харуулсан дүрс бичлэг хөвөрсөөр, Томасын авьяаслаг яриа нь хүмүүсийн сэтгэлийг татаж Лоренс дэлхий даяар од болсон юм.

Гэвч Лоренсийг Арабын ард түмний нүдээр харвал “Урвагч” байв. Англи улс тухайн үед Арабын тусгаар тогтнолыг хүлээн зөвшөөрнө гэж амлаж байсан ч дайны дараа Османы эзэнт гүрнийг хувааж эзэмших нууц гэрээг Франц улстай байгуулсан байжээ. Мэдээж тэрхүү гэрээг Арабын ард түмнээс нууцалсан байлаа.

Эцэг хүү Морган

Англичууд бас нэмээд Еврей үндэстэнд өөрсдийнх нь улс байгуулахыг хүлээн зөвшөөрсөн байжээ. Лоренс нь Английн үнэн бодит зорилгыг нуун дарагдуулангаа Араб үндэстэнд тусалж байв. Англичуудын худал хуурмагаар дүүрэн гэрээнүүд нь өнөө үед ч үргэлжилж буй гай гамшгийн эхлэл байлаа.

Англичууд дайнд дундыг баримталж байсан АНУ-ыг ч дайн оролцуулах тактик хэрэглэв. Үүний тул Англичууд Уолл Стритийн санхүүгийн байгууллагыг өөрсдийн талд орууллаа. Уолл Стритийг удирдах Америкийн банкны эзэн J.P.Morgan Junior бол одоо ч үйл ажиллагаа явуулсаар байгаа үндэстэн дамнасан корпорацийн үндэслэгчийн хүү. Англи улсын зэвсэг үйлдвэрлэлийн 80 хувийг санхүүжүүлж байсан бөгөөд АНУ-ын зэвсгийн үйлдвэрүүдэд ч санхүүжилт өгч байв. Хэрвээ Англичууд дайнд ялагдвал асар их алдагдалд хүрнэ. АНУ-ыг дайнд оролцуулахын тулд Уолл Стрийт болон Английн ашиг сонирхол нийцэв. АНУ-ын ерөнхийлөгч Вудро Вильсон ард олны өмнө АНУ төвийг баримтална гэж байсан ч дараа жил нь Уолл Стрийтийн дарамтыг хүлээн зөвшөөрөхөөс өөр аргагүйд хүрчээ.

В.И.Ленин

Герман улс ч гэсэн дотроос нь мөхөөх тактик хэрэглэв. 1917 он. Германы асар их тусламжийг хүлээн авсан нэгэн хувьсгалч Орос руу явсан нь Владимир Ильич Ульянов байв. Түүний хувьсгалч нэр нь Ленин. 12 жилийн өмнө Оросын хааны эсрэг бослогод оролцож, нууц цагдаа нараас зугтан Швейцарьт орогнож байлаа. Герман улс нь Ленинийг Орос руу явуулахын тулд тусгайлан галт тэрэг гаргажээ. Германы зорилго нь дайтаж байсан Оросын Хаант улсыг дотроос нь мөхөөх байв.

Орос улс Герман, Австритай тулалдах зүүн фронт. Оросын арми зэр зэвсэг, хоол хүнс ч үгүй сүйрлийн ирмэгт тулсан тулаан хийж байв. Утга учиргүй дайнд дургүйцсэн дургүйцэл нь оргилдоо хүрч 1 сая цэрэг армиас зугтан Оросын арми сүйрэв.

Нийслэл Петрград. 2-р сарын хувьсгал.Нийслэл Петрград хотод хоол хүнсний хомсдолд орсон эмэгтэйчүүд “Бидэнд талх өг” гэцгээн жагсав.

Цэргүүд, ажилчид хамт эсэргүүцэн босож хувьсгал болон өргөжин ард түмэн 300 жил үргэлжилсэн Романовын хаант засаглалыг түлхэн унагааж түр засгийн газар байгууллаа. Сүмд нуугдаж байсан хааныг Сибирт цөлжээ.

2-р Николай хаан гэр бүлийн хамтаар

Германы армиар хамгаалуулан Петрградад хүрэлцэн ирсэн Ленин цэргүүдийг зохион байгуулалтад оруулж төрийн эргэлт гарган Түр засгийн газрыг унагаав. 10-р сарын хувьсгал. Хүн төрөлхтний түүхэнд анхны “Коммунист улс Зөвлөлт”-ийг байгуулав. Лениний маш ховор дуу хоолойн бичлэг үлдсэн байдаг. Ленин: Орос улсын түүхэнд анх удаа ажилчин тариачны “Зөвлөл” байгуулагдлаа. Энэ зөвлөл нь төр засгийн бүхий л эрхийг барих болно. Зөвлөлтийн хувьсгалт засгийн газар Герман улсад үг дуугүй бууж өгч германчууд хүсэж байсан үр дүндээ хүрэв.

Германы дипломат ажилтан “Бидний тусламж, санжүүжилт байгаагүй бол нэг хэвлэлийн машин ч үгүй ядуу большевик нар өргөн хүрээний сурталчилгаа явуулан ард иргэдийн итгэлийг олж авч хэзээ ч чадахгүй байлаа” хэмээн эзэн хаандаа мэдээлсэн байдаг.

Зүүн фронтод дайн дуусаж Герман улс зэр зэвсгээ баруун фронт руу нүүлгэн шийдвэрлэх тулаанд бэлтгэв. Холбоотны гүрнүүд ч дампуурлын ирмэгт тулсан байв. Английн цэрэг зэвсгийн зардал улсын төсвөөс нь 6 дахин их боллоо.

Төвийг сахих бодлого баримталж байсан АНУ дайнд оролцохоо зарлав. Хэрэв холбоотны арми ялагдвал асар их хэмжээний зээл төлөгдөхгүй болно. АНУ-ын ерөнхийлөгч Уолл Стрийтийн дарамт шахалтыг давж чадсангүй. 1917 оны 6-р сард АНУ-ын армийн сая гаруй цэргүүд Европ рүү илгээгдэв. Дайн дуустал АНУ-ын 2 сая цэрэг дайны талбар руу явсан байдаг. Парист ирсэн АНУ-ын цэргүүдийг баяр хөөртэйгөөр угтан авч буй бичлэг үлдсэн байдаг. Холбоотны улс ялалтанд хүрэх томоохон алхамаа хийлээ.

Дэлхийн дайнд оролцохгүй болсон Орос улсад түүнээс хойш ч иргэний дайн үргэлжлэв. Хувьсгалын эсрэг Романовын хаант засаглалыг хамгаалсан цагаан арми большевикүүдийн улаан армитай тулалдлаа. Цагаан арми нь большевикүүдээс гадна еврэй үндэстнүүдийг дайснаа болгосон байв. Нийгмийн өөрчлөлтийг хүсэмжлэх еврей хүмүүс большевикүүдийн удирдлагад ихээхэн байсан бөгөөд еврэй хүн л бол большевикийн гар хөл гэж хэлэгддэг байжээ. Украйн дахь олон арван еврэй хүмүүсийг алан хядсан дүрс бичлэг үлджээ.

Цагаан армийн цэргийн дурсамж: Манай армийн олон цэргүүд баяр хөөртэйгөөр алан хядах ажилд улайрсан байлаа. Хэн ч тэдний харгис хэрцгий үйлдлийг зогсоож үл чадна.

19-р зуунаас хойш Орос улсад хамгийн олон буюу 7 сая еврэй үндэстэн амьдарч байлаа. 1915 онд тухайн үед Орос улсын эзэмшилд байсан Польшид амьдрах еврэй хүмүүс. 2000 жилийн өмнөөс улс орон гэж үгүй болсон еврэй үндэстэн дэлхийн энд тэндгүй оршин суух болсон ч өөрсдийн шашин шүтлэг, итгэл үнэмшлээ хадгалан өөрсдийн холбоо хэлхээгээ хадгалж байв.

Гэвч аливаа нэг улсын нийгэмд үймээн самуун дэгдэхэд буруутныг нь өөр шашинтай еврэйчүүд рүү түлхдэг байв. Оросын хувьсгалын үймээн самуун ч тэрхүү жишээг давтжээ. Тэр үед 100,000 еврэйг алж устгасан гэдэг. Алан хядлагаас амьд үлдсэн еврэй хүмүүс Орос улсаас зугатан түүнээс хойш АНУ, Палестинд еврэй хүмүүсийн хүчтэй нийгмийг байгуулсан.

Таван жил үргэлжилсэн дайн арай гэж төгсгөлдөө хүрч ирэв. Баруун фронтод АНУ-ын арми амжилттай давшилтанд орж байлаа. АНУ-ын санхүүжилтээр үйлдвэрлэсэн 600 ширхэг танк, 800 бөмбөгдөгч онгоц. Германы арми сүйрэлд хүрэх хохирол амслаа.

1918 оны 8-р сарын 8-ны өдөр. Германы армийн “Хар өдөр” байлаа. 1918 оны 10 сард Германы холбоотон Османы эзэнт гүрэн бууж өгөв. Хамгийн их цэрэг зэвсгийн хүч хуримтлуулсан Дамаск хот бууж өгөв. Арабын босогчид Дамаскт орж ирж буй бичлэг ч байдаг. Босогчдын удирдагч Файзелийн ялалтын жагсаал. Английн Лоренс хамт явж байлаа. Файзэл Араб үндэстний улсын тусгаар тогтнолыг зарлав.

Араб зохиолчийн номноос: Файзэл хотод орж ирэхэд ард түмний баяр хөөр оргилдоо хүрсэн байв. Араб үндэстний олон жилийн турш хүсэн хүлээж байсан эрх чөлөө бодит байдалд хүрлээ гэж бодож байлаа.

Хамтран тэмцсэний хариуд тусгаар тогтнолыг нь хүлээн зөвшөөрнө гэж байсан Англи улс. Гэвч Английн генерал Аренби Файзелд тэрхүү амлалтыг биелүүлж чадахгүй нь гэж анх удаа өөрийн биеэр хэлэв.

Лоренсийн дуртгал: Тэр хоёрт би орчуулга хийсэн. Файзел харьсны дараа генерал Арэнбид би энэ ажлаас болимоор байна гэж хэлэв. Миний сэтгэл зүрх шимширч байлаа.

Дэлхийн 1-р дайн дууссаны дараа Араб руу дайрах дайралт эхлэв. Дайны үед хамтран байлдаж байсан Францын арми хэнийг ч үл ялгаварлан бөмбөгдсөн. Арабын тусгаар тогтнол хоосон мөрөөдөл болон үлдэв. Файзелийг холбоотны улсууд ашигласны эцэст хэнд ч хэрэггүй болгон орхилоо. Араб үндэстнийг бас дахиад хууралт хүлээж байлаа. Дайны дараа Палестинийг эзэмшилдээ авсан нь Англи улс байлаа. Палестиний хүн амын 90 хувь нь араб үндэстэн байв. Гэвч Англи улс дайны дундуур энэхүү газарт еврэй үндэстний тусгаар тогтносон улс байгуулах нууц гэрээ хийсэн байв. Энэ нь Росс чайлд зэрэг еврэй үндэстэн хөрөнгөтнүүдийг өөрсдийн талд оруулах зорилготой байжээ.

Оросын алан хядалтаас зугатан ирэх зэрэг дэлхийн өнцөг булан бүрээс еврэй хүмүүс Палестинд ирж байв. Араб үндэстний тусгаар тогтнолыг хүсэж байсан газар нутагт еврэй хүмүүс өөрсдийн амьдралаа эхлүүлсэн нь Израйль улсын эхлэл байлаа.

21-р зууны өнөө үед ч үргэлжилж буй үзэн ядалтын гинжин холбоос эндээс эхэлжээ.

1918 оны 11-р сарын 11. Герман улс бууж өглөө. Амь үрэгдсэн хүмүүсийн тоо 17 сая. Шархдаж гэмтсэн хүмүүсийн тоо 20 сая. Дайнд ялсан Их гүрнүүд түүнээс хойшхи дэлхийг хэрхэн удирдахаа хэлэлцэв.

АНУ-ын ерөнхийлөгч Вильсон Парисын найрамдлын гэрээ болох “Версалийн гэрээ” байгуулахаар явлаа. "Ялагч гэж үгүй энх тайван" гэсэн үзэл баримтлалаар дайнд ялагдсан улсад их хэмжээний торгууль ногдуулахын эсрэг байлаа. Гэвч ерөнхийлөгч Вильсоний үзэл баримтлал Англи, Францын эсэргүүцэлтэй тулгарч биелэлээ олсонгүй. Вильсоны оронд дайны төлбөр авах комисст гол үүрэг гүйцэтгэсэн хүн нь Волл Стрийтийн Морган Банкны төлөөлөгч Томас Рамонд. Цэрэг дайны зардалд Англи улсад зээлдүүлсэн асар их хэмжээний мөнгөө эргүүлэн олж авахыг үндсэн зорилгоо болгосон гэрээ зохиов. Герман улсад ногдуулсан дайны төлбөр нь 132,000,000,000 /132 тэрбум алтан марк/ алтан марк. Энэ нь Герман улсын 20 жилийн улсын төсөвтэй тэнцэх мөнгөн дүн байлаа.

Английн төлөөлөгчдийн нэг гишүүн байсан эдийн засагч Кейнз асар их мөнгөн торгуулийг эсэргүүцэн өөрийн хүсэлтээр ажлаа өгөв. Тэрээр Вильсоныг маш ихээр шүүмжлэв.

Кейнз: Ерөнхийлөгч АНУ-ын санхүүгийн хүчинд тулгуурлан гайхамшигтай үр дүнд хүрч чадах байсан. Гэвч ерөнхийлөгч юу ч хийсэнгүй. Түүнийг хүрээлж буй хүмүүсийн ихэнх нь Волл Стрийтийн бизнесмэнүүд. Тэд нар Европын тухай юу ч мэдэхгүй бөгөөд нийтийн эрх ашгийн асуудлыг хэлэлцэх туршлага ч байхгүй.

Версалийн гэрээг сонссон Германы ард түмэн маш ихээр дургүйцэн хүлээн авав. Тэр жил нь Мюнхенд найрамдлын гэрээг эсэргүүцсэн улс төрийн байгууллага бий боллоо. Тэнд нэгэн залуу оролцож байсан нь Адольф Гитлер. Дайныг удирдаж байсан Германы эзэн хаан 2-р Вильгелм Голландад цагаачлав. Цагаачлаж байсан тосгондоо хагалсан мод хурааж буй эзэн хааны бичлэг үлдсэн байдаг.

2-р Вильгелмийн үгнээс: Ард түмэн өөрсдийн хаанаасаа урван ийм ч зүйл хийлгэнэ гэдэг дэлхийн түүхэнд байхгүй. Бурханы аймшигт шийтгэл Германд ногдох байх даа.

1924 он. Оросын хувьсгалыг байгуулсан Ленин хорвоогоос халив. Хувьсгалын эцэг Ленин нь “Аймшигт дарамт, сүрдүүлэгийн улс төр”-ийг бий болгосон хүн байлаа. ЗХУ задран унасны дараа маш нууц бичлэг нийтэд дэлгэгдлээ. Ленин нь албадан хөдөлмөрлүүлэх лагеруудыг байгуулан үндэстэн ястан, нийгмийн гарал үүсэл, намын эсрэг үзэлтэн бүхий 80,000 хүнийг 84 хорих лагерьт илгээсэн байжээ. Мөн нууц цагдаагийн байгууллага “Чекист буюу КГБ”-г байгуулан Польш гаралтай хэт коммунист үзэлтэн Дзержинскигээр толгойлуулав. КГБ нь Лениний үед 200,000 хүнийг алан хядсан байжээ. Дэлхийн хамгийн анхны “Эв хамт нийгэм болох Коммунизм”-ын бодит байдал ийм байлаа.

Цөлийн баатар гэж шагшин магтагдаж байсан Лоренс дайны дараа мотоциклийн ослоор нас барав. Түүний оршуулгын ёслолд Черчиль ч хүндэтгэл үзүүлжээ. Арабаас урвасан нүгэлдээ бачуурсан Лоренс дайны дараа нэрээ солин нууц байдалд орсон.

Лоренсийн номноос: Дайн дуусвал Араб хүмүүст амласан гэрээ хэлцэл нь тасархай цаасны адил болно гэдгийг урьдаас мэдэж байлаа. Миний жүжиглэл нь АНУ, Англид магтан дуулагдаж ард түмэн хүлээн авах романтикаар дүүрэн домог болон зохиогдсон ч миний хувьд байж ядсан ичгүүр, өөрийгөө үзэн ядах туйлд хүрч байна.

Дайн дууссаны дараахан авсан Европ. Хаашаа ч харсан үнсэн нурам үргэлжилнэ. Дэлбэрэх бөмбөгнүүдийн бий болгосон тоо томшгүй нүхэн тогоо. Дэлхийн өнцөг булан бүрт дайны галын үрийг тарьсан дайн дууслаа.

Дайны дараахан Европт айлчилсан нэгэн Япон хүн байлаа. Тухайн үеийн хан хүү Шёова эзэн хаан. Тэр үеийн дурсамжаа ийнхүү бичин үлдээжээ. “Эвдэрч нурсан хот тосгод, устаж үгүйрсэн ой модод, талхлагдаж сүйрсэн тал хээр газар. Дайн, хүч хэрэглэхийг магтан дуулах хүний нүдэнд хэрхэн харагдах бол. Эдгээр нь миний сэтгэл зүрхийг ихээхэн шимшрүүлж байна”

Дэлхийн их дайныг урьдаас таамаглаж байсан зохиолч Вейлс. Тэрээр энэ дайн нь энд тэндэхийн олон дайныг төгсгөх дайн болж дараа нь дэлхий дахинд энх тайван ирнэ гэж хэлсэн. Гэвч их дайнаас шалтгаалан дэлхийн өнцөг булан бүрт дайн тулаан, мөргөлдөөн эхлэж, дүрвэгсэд нэмэгдэн үзэн ядалтын хуй давалгаа нөмрөв.

Олон улс орнууд ирээдүйд болох дайнд бэлдлээ. Вейлс “Их дайн нь төрөл бүрийн дайн тулааныг төрүүлэх дайн байх болно” гэж таамаглан хэлэх ёстой байсан байж мэднэ.

Хүүхдүүдийн дунд байлдаж тоглох нь дэлгэрэв. Цэргийн асрагчийг дуурайх, нуувчны офицер болох, дайснаа алах тушаал өгөх зэрэг. Хэдэн жилийн дараа энэхүү хүүхдүүдийн ихэнх нь үнэн бодит дайнд тулалдах хувь тавилантай байлаа.

Дэлхийн 1-р дайны төгсгөл нь урт хугацааны дайныг түр зогсоосон явдал байв. 21 жилийн дараа хүн төрөлхтөн дахин тамын халуун галд нөмрүүлэв.

Цувралын дараагийн нийтлэлийг ЭНД дарж уншина уу.

Ч.ДӨЛГӨӨН

Сэтгэгдэл 5ЭнгийнХэвтээБосооСэтгэгдэл бичихAa
  • Аа
  • Аа
  • Аа
  • Аа
  • Аа
  • Аа
  • Аа
  • Аа
  • Аа
  • Аа
2016, 9 сар 30. 18:32
zzz

Zusandaa hamgiin muuhai 2 oron

2016, 9 сар 27. 13:36
Зочин

Яг үнэн англи америкчууд одоогийг улсаа цусаар л байгуулсан Тийм учир тэд эд байялгийг улс орныг сүйтгэж байж олж авдаг Ингэхдээ худал хэлэх хууран мэхлэх алж хядах айлган сүрдүүлэх засгийн томчуудыг худалдан авах устгах зэрэг технологи хэрэглэдэг Тэд хүнд худал зүйлийг зуун удаа хэлэхэд үнэнн болдог гэдэг Харин манай одоогийн үе америкчууд нэг удаа үг хэлбэл түүнд нь хуурагдаж үнэн үүнээс өөр байхгүй гэж итгэдэг болсон байна Улс төрийн бодлого бол эдийн засгийн бодлогын төвлөрсөн илэрхийлэл гэж нэг хүн маш үнэн хэлсэн байдаг Даанч энэ хүний хөшөөш Үүл баатар нураачихсан Уг нь үнэн үгнүүдийг нь хөшөөн дээр бичээд орхичих байсан ч байж магадгүй Т

2016, 9 сар 27. 10:59
Зочин

Хорвоогийн бүх бузар булай муу юм болгон Англи болон Америкаас гардаг юм шүү. Тэднийг шүтэх биш жигших ёстой

2016, 9 сар 26. 10:13
Oyun

Tsagaan aristnuud zuun umnud azi, arab, oirhi dornodod ochood humuusiig ni gegeeruuleed, nuguuduul ni ter tsagaan aristnii "buyanaar" nud ni neegdeed avragdaad iim aguulgatai kino har myanga baidag. Tsagaan aristnuud uusdiiguu hamgiin mundag, busad ni bol zugeer amitnaas neg ih yalgagdahgui gedgiig todruuld haruulj ugsun kino zunduu bdag. Undsendee bol uursduusuu busdiig hun bish gedeg deerengui iherhuu uzliinh ni neg heseg bolj, propagandaa hiisen kinonuud

2016, 9 сар 25. 11:50
Зочин

Turkuud sunutugei

Сэтгэгдэл бичих
Санамсаргүй нийтлэл [ Энд дарна уу ]