Ангилал

Сайтын талаар ярилцъя Уншигчдын санал бодол

Умард Солонгосын эсрэг тархи угаалт буюу танканд няцлуулсан бүсгүйУншсан21,519

Тэндхийн хүн амын тал нь улс төрийн хоригдол бол нөгөө тал нь хуяг. Тэнд улс төрийн өрсөлдөгчөө миномётын аманд хүлж байгаад бууддаг, нохойд идүүлдэг...гэх мэтээр яриа их бий.

Хойд Солонгос гэж нэг ядарсан, тун хэцүү амьдралтай, хэддүгээр ч юм Ким хэмээх эзэн хааны хаанчлал дор зовж, гуньж, гутаж яваа улсын тухай мэдээллийг хаанаас ч олж болно. Олж болно гэж өөрөө хүрээд ирнэ. Дайсагнагч хажуу талын Өмнөд Солонгос нь Азийн хамгийн баян орны нэг бол БНАСАУ -ын нэг хүнд оногдох ДНБ нь ердөө 1800 доллар...

 

Тэндхийн хүн амын тал нь улс төрийн хоригдол бол нөгөө тал нь хуяг. Тэнд улс төрийн өрсөлдөгчөө миномётын аманд хүлж байгаад бууддаг, нохойд идүүлдэг...гэх мэтээр яриа их бий.

Гэхдээ энд зарим нэг зүйлийг мартаж болохгүй. Энэхүү улс нь АНУ, Япон, БНСУ-тай дайны байдалтай байгаа бөгөөд эдийн засгийн маш хүчтэй, ихээхэн хэмжээний хоригоос болж олон  жил ганцаардаж байгаа улс билээ. Олон жил... бууж өгөхгүй үзсээр л байна.

Хойд Солонгосчууд энэ дайныг яаж ч оролдоод дуусгаж чадахгүй байгаа бөгөөд учир нь Америкт ийм л байдал хэрэгтэй. Тэд энэ бүс нутгийн улс төрийн уур амьсгалыг тодорхойлж байгаа ба хэрвээ хоёр Солонгосын хүсээд байгаа шиг нэгдэж нийлээд ирвэл энэ бүс нутаг дахь Америкийн нөлөө буурч Хятад, ОХУ зэрэг улстай харьцахад маш их ач холбогдолтой түшиц газраа алдах болно. Магадгүй бүр нэгдсэн Солонгост Америкийн эсрэг үзэл бодол давамгайлж ч болох юм.

Дэлхийн 2-р эдийн засаг (Хятад), 4-р эдийн засаг (Япон), 6-р эдийн засаг (ОХУ), Азийн бас нэг том гүрэн болох Солонгос зэрэг улс байдаг энэ чухал бүсийг хянаж байх боломжийг америкчууд зүгээр нэг харж байгаад алдчихгүй. Ядаж л мэдээллийн дайн хийх нь ойлгомжтой.

Ингээд АНУ, Өмнөд Солонгосын зарим хэвлэл мэдээлэл Хойд Солонгосын тухай чухам юу ярьж бичдэг талаар тун товчхон дурдая.

Нэг. Танканд няцлуулсан дуучин бүсгүй

Энэ оны нэгдүгээр сард Хойд Солонгосын албан ёсны төлөөлөгчид болох, Самчмж... мжчжээ.. нэг тийм нэртэй хамтлагийн долоон гишүүн Өмнөд Солонгост болох Олимпийн наадмын үеэр тоглолтод оролцож ая дуугаа өргөхөөр иржээ. Тоглолт болох газраа үзэж танилцаж байгаа тэдгээр албаны хүмүүсийг Өмнөд Солонгосын хэвлэл мэдээллийнхэн маш их сонирхож байсан нь Хён Сон Воль гээч сайхан эмэгтэйтэй холбоотой юм. Тэрхүү эмэгтэйн гоо сайханд нь ч болсон юм биш харин 2013 онд Өмнөд Солонгос, дараа нь дэлхий дахинаар тарсан нэгэн түүхээс болж ийн анхаарал татаж байжээ. Тэр жил энэхүү бүсгүй нь нэлээд задгайдуу хувцастай концертод тоглосон учир Ким Чен Ын (Kim Jong-un) уурлаж энэ бүсгүйг маш зэрлэгээр алуулсан гэж шуугиж байсан билээ.

Өмнөд Солонгосын Чосон Ильбо сонин БНАСАУ-д арван хүнийг садар самуун сурталчилсан хэргээр олны өмнө цаазалсан бөгөөд тэдгээрийн дунд хуучин Ким Чен Ын-ы “явдаг бүсгүй” байсан Хён Сон Воль байжээ гэж мэдээлснээр энэ хэрэг дэлхий нийтэд тарсан хэрэг.

 Олон түмний өмнө, аав ээж, ах дүү, үр хүүхдийг нь байлцуулж байгаад алсан юм гэнэ гэсэн цуу тарж байх үед Хойд Солонгосоос зугтан ирсэн Лим Хи Ён гээч нь бүр ч аймаар, гунигтай түүх ярьсан нь "дээрх бүсгүй болон түүнтэй цуг дуулж бүждэг байсан 10 гаруй хүмүүсийг 10 000 хүний өмнө цаазалсан бөгөөд маш олон сургуулийн насны хүүхдүүдийг хүчээр авчирч харуулж байгаад... танкаар (!) дайрч алсан" гэнэ.

2018 онд өнөөх танканд няцлуулсан бүсгүй маань амьд мэндээр барахгүй бүр дуулж бүжиглэсээр, гялалзсаар яваа юм байна. Харин тэр няцлуулахыг нь харсан гэх  Лим Хи Ён ямар ч тайлбар өгсөнгүй.  Хаа газрын зарим цагаачид гэж...

Хоёр. Хөлбөмбөгийн дэлхийн аваргатай холбон умардуудыг хэрхэн гүтгэдэг вэ?

Бразилд болсон хөл бөмбөгийн дэлхийн аваргын тэмцээний үеэр Хойд Солонгосын удирдлага нар БНАСАУ нь финалын тоглолтод БНСУ-ыг хожин дэлхийн аварга болсон тухай мэдээлжээ хэмээн дэлхий даяар бас нэг шуугиж байсныг бүгд л санаж байгаа байх. Манайд ч гэсэн бараг л сайт болгон үүнийг бичсэн ба өнөөх “диваны генералууд” маань айхтар мундаг дүгнэлт бүхий комментоор булж байсныг сайн санаж байна. Гэтэл бодит байдал дээрээ Хойд Солонгост дэлхийн аваргын нийт тоглолтын ихэнх хувийг хэдэн цагийн хоцролттойгоор дамжуулсан ба тэмцээний үр дүнгийн талаар яг л үнэнээр нь мэдээлж байж.

Дараахан нь энэ тэмцээнд амжилтгүй оролцсон хөл бөмбөгийн шигшээ багийн ахлах дасгалжуулагчийг шоронд хийж, ялтны хүнд хөдөлмөр эрхлүүлж байгаа, буудаж алсан (буугаар, танкаар, гар бөмбөгөөр, пуужингаар ... сонголт нь таных)... гэх зэргээр зүйл дууссан мэтээр л ярьж бичиж, орчуулж байжээ. Тэрхүү дасгалжуулагч Ким Жон Хун нь одоо “11-р сарын 25” хэмээх багийг дасгалжуулж байгаа ба энэ баг цагтаа чухам энэ хүний удирдлага дор БНАСАУ-ын 3 удаагийн аварга болсон байна. Тэрээр тэрхүү дэлхийн аваргын тэмцээний дараа албан тушаалаасаа огцорсон нь үнэн бөгөөд мэдээж "муу тарган" Ким л хэлмэгдүүлсэн байж таараа.

Гурав. Дэлхийн хар нүх

Хиймэл дагуулаас авсан нэгэн зураг интернетээр маш их тархсан байдаг нь гэрэлтэж байгаа Өмнөд Солонгосын хойд талд байх “харанхуй хар нүх” юм. “Чөлөөт Ази” хэмээх радио станц энэ зургийг анх тараасан гэдэг бөгөөд тэд энэ зургаа Америкийн NASA-гаас авсан гэж хэлсэн байна.

Гэтэл зарим анхааралтай уншигч нар энэ хар нүх дотор ганцхан Хойд Солонгос төдийгүй, Хятадын хил орчмын том хотууд, бүр Оросын Владивосток хүртэл орсон байхыг анзаарчээ. Хиймэл дагуулаас авсан зурагт тэдгээр Хятадын хотууд, тэр тусмаа Владивосток ямар ч гэрэл гэгээгүй гарна гэж байхгүй юм гэнэ. Өөрөөр хэлбэл муухан фотошоп.

Гэхдээ Хойд Солонгос нь үнэхээр цахилгааны хомсдолтой улс бөгөөд үүнийг шийдэхээр хэд хэдэн том төсөл хэрэгжүүлж байгаагаас хэдэн том  усан цахилгаан станц баригдаж, ашиглалтад орж байгаа бөгөөд саяхнаас салхинаас эрчим хүч гарган авах тал дээр бас их анхаарал тавьж байгаа юм байна. Ядуу зүдүү хүн болгон гуйлгачин биш гэдэгсэн.

Дөрөв. Сельфи зургийн төлөө цаазын ял

2016 онд Бразилд болсон Олимпийн нэг алдартай зураг нь хоёр Солонгосын гимнастикийн тамирчид болох Ли Ын Жун, Хон Жон Юн нарын цуг авахуулж байгаа сельфи билээ. Эдгээр хоёр тамирчин тэмцээний үеэр тааран ийн зургаа татуулсан нь дэлхий дахинаар тарж хоёр Солонгосын ард түмэн улс төр, дайн дажнаас болж салж сарнисан, ямар хэцүү хувь зохиолтой... гэх маягийн тайлбартайгаар бүх л том хэвлэлүүдийн хуудсанд гарсан байдаг.

Гэтэл удалгүй Британийн Dailystar хэмээх хэвлэл “ийм зураг авахуулсныхаа төлөө хойд Солонгосын тамирчин цаазаар авах ялд ч унаж болно” гэсэн утгатай зүйл бичсэн ба яваандаа бүр цаазаар авахуулсан гэж шар сонинуудаар тарсан байдаг. Үнэхээр ч дараагийн том тэмцээнд Хойд Солонгосын шигшээ багт тус тамирчин байхгүй нь энэ яриаг хүчтэй болголгүй яахав. Энэ бүхнийг бичиж, тарааж байсан зарим нэгний аз дутахад энэ бүсгүй маань зодог тайлаад гимнастикийн холбоондоо албан тушаалтан болчихсон, ажил хэргийн хувцастайгаар дараагийн тэмцээний байранд орж ирсэн байна. Зарим нэг хүн жинхэнээсээ энэ бүсгүйг буудаад унагамаар болсон байх.

P.S.

Хойд Солонгос бол үлгэрийн орон биш, бүр огтоос биш. Маш хүнд эдийн засгийн болон улс төрийн байдалд байгаа орон. Тийм улсад янз бүрийн болох бүтэхгүй юм зөндөө л байж таараа. Харин тэрийг нь ямар нэг улс төрийн, тархи угаах зорилгоор ашиглаж байгааг, тэрийг нь даган “далжганаж “байгааг харахад их л эвгүй санагддаг юм.

 Хэдэн жилийн өмнө Хойд Солонгосын нэгэн эмнэлгийн байдал ийм байна гэсэн барууны бас нэг зураг тарж олон хүнийг хэрдхийлгэж байсныг сайн санаж байна. Үүнийг бичигч би вээр тэр зургийг харснаас хойш энд, Монголдоо хөдөө явж байгаад нэгэн аргаа барсан хүний гуйлтаар мухар олгойн хагалгаанд орох хэрэгтэй болсон хүнийг аль ойрхон сумын эмнэлэг хүргэх тусч хүн болох гэж оролдож билээ. Манай Монголын сумын эмнэлэг ямар байдалтай байсан гээч?

Яг адилхан. Илүү юм юу ч байхгүй. Үгүй, нэг ялгаатай зүйл байсан нь Солонгост тэр эмнэлэг нь ямар нэг байдлаар ажиллаж, мэс заслаа бүдүүлэг, бохир орчинд хийж байсан бол манай сумын эмнэлэгт тэр мэс заслыг бүдүүлгээр байтугай ямраар ч хийх аргагүй байлаа. Эмч нар нь намайг наад хүнээ аваад өөр сум руу давхи, энд ямар ч найдвар байхгүй, наад хүн чинь ч эвгүй байна гэсэн юм хэлж байлаа. Эмнэлгийн А байхгүй над шиг хүнд тэр хүнд өвчтэй хүнийг даатгаж байгаа юм даа. Бид энд тэндхийн улс орны элдэв дутагдал, сайн мууг нь дооглож, дээрэлхэж, доромжилж байх хэн юм бол?

Нийтлэлч Чалчаа саарал

Сэтгэгдэл 9ЭнгийнХэвтээБосооСэтгэгдэл бичих-Aa+
5 сар 29. 12:34
Зочин

үнэн шд. Манай сумын төв ямаршуу байдгийг та нар нэг очиж үзээч. Баруун болон говийн сумдууд үнэхээр өрөвдөлтэй. За төвийнх арай гайгүй. Гэхдээ л бас хэцүү дээ

5 сар 31. 7:23
монгол

Би хедее сумын тевеес бэлгэвч авах гэсэн туухээ ярий. Дэлгуурээс Аптек байна уу гэлээ байхгуй та эмнэлэгруу оч гэх юм. Очтол нэг сувилагч бололтой хуухэн сууж байна. Хэлтэл за одоохон гээд утсаа гаргаж ирээд нэг хунд хэлж дуудах юм. Нэг хуухэн удалгуй ирсэн нь эмч нь гэнэ. Негеех маань дахиад л утсаараа яриад нэг хунд хэлээд байгаа бололтой юмаа. Би ч бага зэрэг эвгуйцэс хийгээд байж байтал хоер эр эм ороод ирсэн нь нярав нехертэйгее явж байгаа бололтой. Тэр будуун авгай юу гэсэн гээч даргаар цохуулах ухааны юм яриад унасан. Би ч тэвчээр алдаад болийдоо гэтэл негеедуул маань бугд тевег тарьсан надруу ууртай гээч нь харцгаах юм. Тэнд нь ганц тэд ч биш хэд хэдэн нутгийн индианууд байсан нь ч надруу сонин харцгаах байсан. Би ч тэр дороо даргатайгаа утсаар яриад хэлчихлдээ гэж гуйлаа. Гэтэл негеех маань хэдийг авах гэсийн гэж байнааа. Би ч баахан тевег удсан этгээд ямар ганц хоерыг авий гэлтэй нь биш нэг хайрцагийг гээд дугарч орхилоо. Нярав эгч юу ч болоогуй аятай нэг харанхуй ереенд ороод тужигнуулж байснаа нэг жижиг биш хайрцаг гаргаж ирээд май энэн дээр гарийн усэгээ зур гээд падаан бололтой цаас сарвайхаар харсанч угуй зураад хэд болох вэ гэтэл унэгуй дээрээс унэгуй тараа гэсэн юм гэдэг байгаа би ч баахан нутгийн индиануудын харцан дор хелерч улайсан гар ум хумгуй гарч одсондоо. Машиндаа иртэл манай хэд юун удаж байгаад юу аваад ирэвээ гэцгээгээд би ч дуугарсанч угуй хайрцагаа нээгээд узтэл тэнд нь 50 -60 жижиг хайрцаг байсан нэгэндээ 3 байдаг байхаа. Би ч хурдан хеделж уз гээд эргээд хартал эмнэлгийн гадаа негеедуул маань бугд гарч ирээд зогсож байсан. Бараг баяртай гээд гар даллаагуй байх. Би ч бушуухан буруу харчихсан байсан машин маань хар тентэй ч гэсэн. Манай хэд сонсоод элгээ хештел инээлдэж билээ намайг том онигоонд оруулж

5 сар 29. 1:42
Зочин

НАСА гаас авсан фото зураг чинь үнэн шүү Өмнөд гэрэлтэй Умард харанхуй гэдгийг оросын хиймэл дагуулаас дамжуулсан фото давхар баталсан

6 сар 3. 0:20
Зочинmmm

chi yamar hudalch yum be ...

6 сар 1. 20:23
Зочин

1950 онд Хойт тал нь гэрэлтэй Өмнөд нь харанхуй байсан юм

6 сар 4. 12:38
Зочин

Фото шоп. Америкийн тархи угаалт. Хойдууд эрчим хүчнийхээ 90 хувийг УЦС р хангачихдаг.

5 сар 29. 10:06
Зочин

хэрэвээ үнэн зураг юм бол, энэ бол үнэхээр сайн зүйл байгал дэлхийдээ ихээхэн ээлтэй зүйл гэж бодож байна

5 сар 29. 10:06
Зочин

хэрэвээ үнэн зураг юм бол, энэ бол үнэхээр сайн зүйл байгал дэлхийдээ ихээхэн ээлтэй зүйл гэж бодож байна

5 сар 28. 9:51
Зочин

zoo zoo

Сэтгэгдэл бичих
Санамсаргүй нийтлэл [ Энд дарна уу ]