Ангилал

Сайтын талаар ярилцъя Уншигчдын санал бодол

Чингис, Өгөдэй, Гүюг, Мөнх, Хубилай энэ тав болваас Их Монгол Улсын агуу их хаад билээ.

"...Монголчуудтай хийх тэмцэлд Европын бүх хүчнийг зориулах хэрэгтэй"Уншсан4,541

Тус чуулган монголчуудтай хийх тэмцэлд Европын бүх хүчнийг зориулах хэрэгтэй гэхийн зэрэгцээ тэдэнтэй хэлэлцээр хийх гэсэн папын төлөвлөгөөг ч сайшаажээ.

Tolgoilogch.mn сайт Монсудар хэвлэлийн газраас эрхлэн гаргадаг түүх газарзүй, өв соёл, зан заншлын холбогдолтой бүтээлүүдээс уншигчдадаа хүргэж байгаа. Олон нийтийн боловсролыг дээшлүүлэх, ухаарал нэмэх, соён гэгээрэх хүсэл тэмүүллийг бий болоход зорин ажилладаг Монсудар хэвлэлийн газрын хамт олны эх түүхээ таньж мэдэх, өв соёлоо хадгалан дээдлэх хүсэлтэй монголчуудад зориулсан бүтээлүүдийг уншигч та амтархан уншина биз ээ.

Чойнзонгийн Баатар орчуулж, 2015 онд Монсудар хэвлэлийн газраас эрхлэн гаргасан Г.Вернадскийн "Монголын эзэнт гүрэн" хэмээх номын хэсгээс хүргэж байна. Г.Вернадский нь Евразийн үзлийг үндэслэгчдийн нэг, нэрт түүхч, соёл судлаач бөгөөд дэлхийн түүхийн салшгүй нэгэн хэсэг болсон Монголын түүхийг сонирхон, тусгайлан судалж эерэг, зөв байр сууринаас хандсан олон бүтээл туурвисан юм.

“Монголын эзэнт гүрэн” хэмээх энэхүү номд Их Монгол Улсын засаг захиргаа, цэргийн бүтэц, зохион байгуулалт, хууль цаазын онцлог түүнчлэн Чингисийн дараах хаадын амьдрал, үйл ажиллагааг товч боловч ойлгомжтойгоор авч үзэн шинжлэх ухааны үндэслэлтэй үнэлэлт дүгнэлт өгснөөрөө онцлогтой юм. Та энэхүү номыг Интерном номын их дэлгүүрийн бүх салбараас худалдан авах боломжтой.


Өмнөх нь:  Г.Вернадский: "Монголын эзэнт гүрэн"-1

Ярославаас гадна Сельжукийн султан Ил-Арслан VI, Гүржийн хаан V Давид, Бага Армений хаан I Хетумын бие төлөөлөгч, түүний дүү Самбат зэрэг Монголын эзэнт гүрний хараат бусад ноёдыг ч Монгол оронд дуудсан байлаа. Пап ламын элч, Иоанн де Плано Карпини хувраг ч Гүюгийг их хаанаар өргөмжлөгдөх үед тэнд ирсэн байж таарчээ. Плано Карпинигийн үүрэг даалгавар нь 1243 онд папын сэнтийд заларсан IV Иннокент ламтны Монголын асуудалд цоо шинээр хандах болсны үр дүн, илрэл байжээ. II Фридрих хааны эсрэг Ромын хийж байсан эцэж цуцащгүй тэмцлийг цааш залган үргэлжлүүлсэн пап ламтан католик сүм хийдийн нэр хүндийг сэргээхийг хичээхдээ,

  1. Палестин дахь загалмайтны аян дайныг үргэлжлүүлэх,
  2. Цэргийн биш харин дипломат арга замаар дорно дахины сүм хийдүүдэд папын эрх мэдлийг дэлгэрүүлэх,
  3. Бололцоо нөхцөлийн хэрээр монголчуудыг Христийн шашинд оруулах замаар тэдэнтэй харилцан ойлголцолд хүрэх гэсэн гурван үзэл санаанд тулгуурласан олон улсын хүчирхэг бодлого явуулахыг эрмэлзэж байжээ.

Их эзэн хаанаас бусад өрнөдийн бүх эрх баригчид исламын шашинтнуудтай зөвшилцөхийг хүсэхгүй байсан учир Өмнөд Дорнод дахь нөхцөл байдал улам бүр таагүй болж байв. 1244 онд Египетийн султан хорезмчуудыг Иранаас Сири тийш зүглэн хөдлөхөд булаан эзэлж, цөлмөн хоосолжээ. Тэр үед пал ламтан загалмайтны долдугаар аян дайныг адислан соёрхохоор шийдсэн байлаа. Энэхүү аян дайныг эхлүүлэхийн тулд тэрээр 1245 онд Францын Лион хотноо сүм хийдийнхний чуулганыг хуралдуулсан нь XIII зууны Ромын католикуудад орчлон дэлхийн чуулган гэж нэрлэгдсэн ажээ. Францын эзэн ван IX Людовиг шинэ аян дайныг удирдах үүргийг дуртайяа хүлээн авав. 1248 оны 9-р сар гэхэд л Людовигийн арми Кипр арал дээр бөөгнөрчээ.

Лионы чуулганаар мөн Монголд хамаарах нөхцөл байдлыг хэлэлцсэн тухай мэдээллийн ихэнхийг Оросын сүм хийдийн зүттэлтэн, епископ Петр үлдээсэн байдаг. Тус чуулган монголчуудтай хийх тэмцэлд Европын бүх хүчнийг зориулах хэрэгтэй гэхийн зэрэгцээ тэдэнтэй хэлэлцээр хийх гэсэн папын төлөвлөгөөг ч сайшаажээ. Чүулган нээгдэхийн өмнө пап лам монголчуудтай харилцаа тогтоохын тулд хэд хэдэн удаа элч төлөөлөгч илгээсэн байна. Тэдгээрээс хоёр нь амжилтад хүрсэн аж. Доминиканы хувраг Асцелин дагуулуудынхаа хамт Персийн баруун хойд хэсгийг зорин одсон бол францисканий Иоанн де Плано Карпини, Польшийн Бенедикт ламтан нар Монголд очсон байна. Иоанн хувраг 1245 оны 4-р сард Лионоос мордсон бөгөөд түүний авч мордсон «тартарын хаан хийгээд ард олонд» хэмээн хаягласан захидалд пап ламтан христийн шашинтнуудын тэргүүнийхээ хувьд монголчуудыг христийнхний нутаг оронд цөмрөн орсонд нь зэмлэн буруушааж, бурхны уур хилэнгээр заналхийлэн сүрдүүлэхийн хамт цаашдаа иймэрхүү аян дайнаас тудгэлзэх, христийн шашинд орохыг сэнхрүүлэн ятгасан байлаа. Тэд Өрнөд Оросыг нэвт туулан аялах ёстой байсан тул Оросын баруун нутгийн ван ноёд, сүм хийдийхнийг сайтар ятгаж, сэнхрүүлтүгэй хэмээн пап лам элч нартаа зааварласан байна.

Плано Карпини ламтан Богеми, Силезийг туулан Краков хотноо ирж, их тал нутгаар аялан явах бэлтгэлээ хэдэн сарын турш дагалдагсдынхаа хамт базаажээ. Василько Волынский ван тэднийг ихэд нөхөрсгөөр угтан авсан байна. Гэвч тэрээр, энэ үед Батын өргөөнд байсан ах Данил Галицкийн соёрхолгүйгээр католик шашинд орохоосоо татгалзсан аж. 1246 оны хоёрдугаар сард Иоанн болон түүний дагуулууд цөлмөн тоногдсон Киевт ирж, дөревдүгээр сард Бат ханы өргөөнд очин, пап ламын захиаг гардуулжээ. Тэдгээр хуврагууд уг захиаг орос, сарацин (перс), татаар (монгол) хэлнээ орчуулахад нь Батын орчуулагчид тусалсан бөгөөд Бат хан тэр бүх хувилбар болгоныг тусгай элчээр Хархорин руу илгээхийн хамт цааш Монгол руу хөдлөхийг францисканчуудад зөвлөсөн байна. Тэд долдугаар сарын 22-нд их хааны орд өргөөнд хүрэлцэн ирэв.

Тэднийг ихэд хүндэтгэлтэйгээр хүлээн авсан хэдий ч их хааныг сэнтийд нь өргөмжлөн залахаас урьд папын илгээлтэд хариулт өгөх аргагүй хэмээн мэдэгдсэн байна.

Сэтгэгдэл 0ЭнгийнХэвтээБосооСэтгэгдэл бичих-Aa+
Санамсаргүй нийтлэл [ Энд дарна уу ]