Ангилал

Сайтын талаар ярилцъя Уншигчдын санал бодол

Зэв жанжны нөхөрлөсөн ньУншсан1,745

Түүхч, зохиолч Г.Энх-Амарын “Монголын нууц товчооны мянган оньс хэмээх Нуман түлхүүр оршвой” номоос (зохиогчийн зөвшөөрөлтэй)

Түүхч, зохиолч Г.Энх-Амарын “Монголын нууц товчооны мянган оньс хэмээх Нуман түлхүүр оршвой” номоос (зохиогчийн зөвшөөрөлтэй)

Нэг.

Чингис хаан өөрийн шартсанаа далдалж морио шархатсан мэтээр хэлж байгаа нь зэлмэ мэт цөөн хүн мэдэж ихэд нууцалж байсныг мөн цаашид тодорхой хугацаанд нууцалж байхаар тохирцсныг Зургаадай соргогоор мэдэрч ойлгож өчил өчсөн нь Чингис хаанд онцгой таалагдсан байна. Зургаадай холоос гайхамшигтай мэргэн харвах онц ур чадвартай, шударга зоригтой зан төлөв, соргог ухаалаг мэдрэмж, цэцэн ухаан чин сэтгэлийн андгай тангараг Чингис хааны сэтгэлийн гүнд хүрч, Зургаадай нэрийг сольж Зэв хэмээн дуудах бүрийд Чингис хааны өршөөл түүнд ямагт санагдаж андгай тангарагаа үнэнч биелүүлэхийн сэтгэгдэл төрүүлэх бөлгөө. Чингис хаан бас өөрхийхөө дэргэд ямагт зэв мэт хамгаалж яв гэсэн нь үүрэг хариуцлага хүлээлгэсэн нь онцгой содон шийдвэр байв.

Хоёр.

Чингис хааныг харваж шархтуулсан хүнийг мөрдөж олох нь зайлшгүй байсан учир Зургаадай харваснаа нуух боломж маш бага байсан юм. учир нь тэр цагт эр бүр өөрийн сумаа дархалдаг байсан болохоор Чингис хааныг харвасан сумыг олзлогсдод үзүүлэхэд ийм сумыг хэн хийдэг болохыг хялбархан олж өгнө. Бас уулан дээрээс буюу хол зайнаас хэн ийм холч мэргэн харваж чадахыг ч төвөггүй тодруулж чадах байв. Иймээс Зургаадай муу нуухаар сайн илчил гэсэн зарчмаар өөрийн биеэр харваснаа илчилсэн нь өлзийтэйг соргог ухаанаар ойлгожээ. Тэр бас Сорхан шартай хамт ирсэн ч ихээхэн учир холбогдолтой юм. Чингис хааныг харвасан тухайгаа Сорхан шард хэлж одоо яавал зохиолтойг зөвлөсөн байж магадгүй. Чингис хаан уужим саруул ухаанаар шийдэлгүй Зургаадайг үхүүлсэн бол хожмоо Татаар, Найман, Мэргэд аймгийг нэгтгэх Хүчүлүгийг устгах Хорезм, Орос, Алан, Хибчак, Тангуд, Алтан улсыг бут ниргэх олон тулалдаанд манлайлан удирдан орж Монгол цэргийн суу алдрыг цууриатуулсан аугаа их Зэв жанжин гэж түүхэнд үлдэхгүй байлаа. Эдгээр улс орныг нэгэн насандаа байлдан ялж байсан Зэв, Сүбээдэй хоёроос өөр нэг ч цэргийн жанжин түүхэнд гараагүй юм.

Гурав.

Хятадын алдарт цагаан хэрмийн хэцүү бэрх бэхлэлтүүдийг Зэв жанжин хамгийн олон удаа эвдэн давж гарч байсан тул хятадын үндэсний дээрэнгүй үзэлт түүхчид Зэвийн аугаа гайхамшигт ялалтуудыг мартагнуулахыг хичээдэг. Тийм ч учраас Зэв ноёныг 1224-1225 онд Ижил мөрний зүүхэнтэй аян дайнаас буцах замдаа нас барсан гэж бичдэг. Гэтэл хойно 272 дахи зүйлд туулай жил /энэ нь 1231 оны туулай жил юм/ Өгөдэй хаан Алтан улсад морилж Зэвийг манлайд илгээв. Төдий хятад цэргүүдийг дарж ... өмх хожуул мэт хядаад Цавчаалыг давж зүг зүг хот балгадад цэрэг довтолгон явуулж, Өгөдэй хаан шар хээрт / одоогийн бээжин орчим талархаг нутаг / буув гэж бичжээ.

Дөрөв.

 

Хүйтэний голын тулалдаан бол Чингис хаан Их Монгол улсаа байгуулахдаа хийсэн олон тулалдаан байлдаанаас хамгийн олон тоотой хамгийн хүчирхэг цэргүүдтэй тулаан байв. Хүйтний голын байлдаанд ялагдсанаар Жамуха Чинги хааны эсрэг өргөн холбоо, эвсэл байгуулах хаалга зам хаагдсан юм. энэ байлдаанд ялснаар Чингис хаан Онон хэрлэний уугуул Монгол аймгуудыг өөрийн захиргаанд бүрэн нэгтгэж эсгий туургатны нэгдсэн улсын цөм болов. 5. Заримууд энэ тулааныг Ононоос олон хоногийн зайтай Өвөрмонголын хүйтний голд, бас заримууд огт уул толгодгүй ус булаггүй Хүйтэн хэрэмтийн талд болсон мэтээр зүтгүүлдэг нь Монголын нууц товчоонд бичсэнтэй огт авцалддаггүй юм. Хүйтний голын алдарт тулалдаан болсон газар болох Хэнтий аймгийн Баян-Адарга Биндэр сумын нутгаар урсах Хүйтний голын Шувуут уул, Баян-Өлзийт уулын хооронд Зэгст нуурын баруунаа орших дэвсэг дээр Баян-Адарга сумын ИТХ Засаг даргын тамгийн газар Чингис хаан дээд сургууль хамтарч сүрлэг сайхан хөшөө босгож түүхийг баримтжуулаад байна.

Сэтгэгдэл 0ЭнгийнХэвтээБосооСэтгэгдэл бичих-Aa+
Санамсаргүй нийтлэл [ Энд дарна уу ]