Ангилал

Сайтын талаар ярилцъя Уншигчдын санал бодол

Сталин: Энэ ч гайгүй хэрэг, надад гар буугаа өгөөд унтаж байдаг хүн шүүУншсан15,909

Энэ удаа Сталины сайн, муугийн тухай ярих гэлгүй түүнтэй холбоотой зарим нэг бодит, инээдтэй зүйлийн тухай дурдах гэсэн юм.

“Түүх гэдэг маш олон талаас харж, тайлбарлаж, муулж, магтан дуулж болдог эд бөгөөд тэдгээр нь бүгд өөрөө өөртөө үнэн зөв байдаг нь сонирхолтой” гэж нэг их ухаантай хүн хэлсэн юм гэнэ лээ. Үнэн ч байх.

Сталин. Энэ нэрийг сонсоод олон хүн айж, зэвүүцдэг бол зарим нь бахархан дуурсдаг. Үнэхээр ч цагтаа б**стай бурхан байсан энэ хүн Хрущевийн алдарт 20-р хурлаас хойш адгийн амьтан болсон бөгөөд хэсэг хугацааны дараа аажмаар сэргэсээр, 90-ээд оноос эргээд хорвоогийн хамгийн бузар хүмүүсийн нэг болсон байдаг. Монгол Улсад ч гэсэн энэ хүний тухай дээрх хоёр туйлаар л ярьж бичдэг.

Энэ удаа Сталины сайн, муугийн тухай ярих гэлгүй түүнтэй холбоотой зарим нэг бодит, инээдтэй зүйлийн тухай дурдах гэсэн юм. Харж чадвал жижиг зүйлээс олон юм тод болдог доо. Гэхдээ зарим нэг нь домог байж болох юм гэдгийг бодолцоорой.

1. Нэгэн удаа дарга нарт ”хов хэлж, хоолоо олж иддэг” нэгэн нөхөр Сталинд ийм хов хэлжээ.

-Нөхөр Сталин! Маршал Рокоссовский Валентина Сероватай (тухайн үеийн алдартай, царайлаг жүжигчин) хувийн харилцаатай болсон байна.  Маршалыг яах вэ?

Сталин гаансаа харан хэсэг бодсоноо, Юун яах? Атаархахаас өөр яах юм. Атаархаад л байж байхаас... гэжээ.

 

2.1939 онд “Галт тэрэг дорно зүгт гэдэг” киног төр засгийн удирдлагуудад үзүүлэх болов. Кино маань олигтой зүйл биш байсан ба Сталин зэрэг хүмүүс нэлээд залхаж эхэлсэн байна. Киноны нэгэн хэсэгт галт тэрэг зогсдог хэсэг гарахад Сталин “Энэ ямар станц вэ?” гэж асууж гэнэ. Найруулагч “Демьяновка станц” гэхэд “За тэгвэл энд чинь галт тэрэгнээсээ бууна аа” гэсээр Сталин кино танхимыг орхисон байна.

3. Нэгэн хурандаа генерал Сталинд илтгэл тавьжээ. Ерөнхий командлагч их л сэтгэл өндөр байгаа бололтой илтгэлийн дундуур толгой дохин байсан байна. Илтгэлээ дуусаад генерал ямар нэг зүйл хэлэх гээд чадахгүй байгаа бололтой зогсоход нь Сталин “Та ямар нэг зүйл хэлмээр байгаа юм аа даа?” гэв. Генерал “Тиймээ нөхөр Сталин, нэгэн хувийн зүйл байгаа юм. Германд би нэг сонирхолтой жижиг зүйл олж авсныг маань шалгалтын хэсэг дээр саатуулсан байна. Хэрвээ болох бол та түүнийг минь надад эргүүлж өгөх тушаал гаргаж өгөөч” гээд хармаанаасаа бэлдсэн жагсаалт гарган үзүүлсэн байна. Сталин жагсаалтыг хараад буцааж өг гэсэн утгатай гарын үсэгтэй бичиг өгчээ. Генерал ч маш их баярлан “Нөхөр Сталин маш их баярлалаа. Гэхдээ энд нэг үг орхигдож. Хурандаа генерал гэдэг үгийн генерал нь орхигдоод хурандаа болчихож” гэв. Сталин “Үгүй ээ ямар ч алдаа алга. Нөхөр хурандаа” гэжээ.

4. Сталины бие хамгаалагч А.Рыбины дуртгалаас.

Сталин ийш тийшээ явах болоход бие хамгаалагч Туков цуг явдаг байжээ. Тэр хамгаалагч урд, жолоочийн хажууд суугаад замдаа унтаж явдаг нэгэн гэнэ. Нэгэн удаа улс төрийн товчооны нэг гишүүн Сталинтай цуг машинд сууж явахдаа “Нөхөр Сталин. Та хоёрын чинь хэн нь бие хамгаалагч, хэн нь Ерөнхий командлан захирагч гэдгийг ялгаж мэдэхэд хэцүү юм байна даа” гэжээ. Сталин “Энэ ч гайгүй хэрэг. Заримдаа наадах чинь “янз бүрийн юм болвол” гээд надад гар буугаа өгөөд унтаж байдаг хүн шүү” гэжээ.

5. Нэгэн удаа гадаадын сурвалжлагч нар Сталинаас "Яагаад Зөвлөлт Армений сүлд дээр Арарат уул байдаг юм бэ? Арарат уул Армений нутагт байдаггүй биз дээ? гэж асууж. Туркийн сүлд дээр сар байж л байдаг. Сар чинь Туркийн нутагт байдаггүй юм байгаа биз дээ гэж Сталин хариуг нь өгчээ.

6. Ялалтын дараа холбоотнууд Германы флотыг яах тухайд нэлээд маргалдсан байна. Сталин энэ флотыг хувааж авах тухай санал тавихад Черчиль эсэргүүцэж флотыг тэр чигээр нь живүүлэх хэрэгтэй гэж хэлжээ. Сталин хариуд нь “хувааж авсны дараа та өөрт оногдсоноо живүүлээрэй” гэсэн байна.

7. Нэгэн удаа Сталин цаг уурчдаас гаргаж байгаа таамаглал нь ямархуу хэмжээний магадлалтай тухай асуужээ. Нөгөөдүүл нь "Дөчин хувь нөхөр Сталин" гэж. Сталин хариуд нь "Тэгвэл урьдчилан сэргийлэх мэдээгээ эсрэгээр нь, буруугаар хэлж байгаач. Дөч биш жаран хувийн оновчтой болох нь байна шүү дээ" гэж хэлэн инээж байжээ.

8. Победа (Ялалт) машиныг бүтээж байх үед ямар нэр өгөх талаар их ярилцаж байгаад Родина (Эх орон ) хэмээхээр тохирчээ. Энэ тухай сонссон Сталин зохион бүтээгч нараас “Эх орноо ямар үнээр худалдах гэж байна” гэж асуужээ. Удалгүй шинэ машин маань "Ялалт" нэртэйгээр худалдаанд гарсан байна

9. Дайны дараахан профессор К гээч нь нэлээд будлиантай байж мэдэх аргаар олсон маш их мөнгөөр сайхан зуслангийн байр барин амьдран суух болсныг Сталин мэджээ. Профессортой уулзах үедээ “Та ... үнээр сайхан зуслангийн байр бариулсан гэж үнэн үү?” гэж асуухад профессор ч “Үнэн. Нөхөр Сталин” гэж хүлээсэн байна. “Өнчин хүүхдэд бэлгэлсэн энэ сайхан байрны чинь төлөө хүүхдүүдийн өмнөөс баярлаж талархаж байгааг минь хүлээн авна уу“ гэж Сталин хэлсэн бөгөөд энэ профессорыг Новосибирскт ажиллуулахаар “цөлсөн” байна.

10. Подстамын конференцийн үеэр Гарриман Сталинаас ингэж асуужээ.

-1941 онд Германууд Москвад 18-хан км ойртож чадсан. Гэтэл одоо та Германуудын  нийслэл ялагдсан Берлинийг хувааж байгаадаа сэтгэл өндөр байгаа биз дээ?

-Александр хаан (царь Александр) Париж орж байсан явдал ч бий гэж Сталин хариулжээ.

***

1953 оны гуравдугаар сарын 5-ны 22.00 цагт нөхөр Сталин нас барсан бөгөөд Бериягийн тушааснаар түүний үлдээсэн хувийн эд зүйлийг жагсаан бүртгэсэн байна.

  1. Саарал арьсан хавтастай тэмдэглэлийн дэвтэр
  2. Улаан арьсан хавтастай тэмдэглэлийн дэвтэр
  3. Хувийн тэмдэглэл, болон бусад зүйлс бичсэн 67 хуудас
  4. Улаан хавтастай зузаан дэвтэр
  5. Гаанс 5 ширхэг.
  6. Цагаан өнгийн китель-2 ширхэг. (аль аль нь Зөвлөлтийн хөдөлмөрийн баатрын тэмдэгтэй)

 

Унтлагын өрөө

  1. Саарал китель, өдрийн-2 ширхэг.
  2. Хар-ногоон өнгөтэй китель-2 ширхэг
  3. Өмд-10 ширхэг
  4. Дотуур хувцас 2 номерийн хайрцагт.

3 номерийн хайрцагт 6 китель, 10 өмд, 4 шинель, 4 малгай хийв. 1 номерийн хайрцагт тэмдэглэлийн дэвтэр зэрэг зүйлсийг хийв. 4-р хайрцагт угаалгын, ариун цэврийн хэрэгслийг нь хийв.

Унтлагын өрөөнд хадгаламжийн дэвтэр байсан ба 900 рублийн хадгаламжтай байжээ.

Бусад эд хөрөнгийг жагсаалтад бүртгээгүй гэж тэмдэглэсэн ба энэ нь үнэгний хэлбэртэй, ширээний сэрүүлэгтэй цаг, (үнэгний нэг чих нь хугархай) Рузвельтийн бэлэглэсэн баримал зэрэг болно.

Жагсаалт гаргасан 1953 оны гуравдугаар сарын 6-ны 00 цаг 45 минут.
 Орлов, Старостин, Туков, Бутусова гэжээ.

Сэтгэгдэл бичихийг түдгэлзүүлсэн байна
Санамсаргүй нийтлэл [ Энд дарна уу ]