Ангилал

Сайтын талаар ярилцъя Уншигчдын санал бодол

Риналдугийн хүний чандрыг алмааз эрдэнэ болгон хувиргах бизнес өргөжиж байнаУншсан16,947

Риналдугийн хүний чандрыг алмааз эрдэнэ болгон хувиргах бизнес цахиур хагалж байна

Хүмүүс бид бусдын сэдэж олоогүй цоо шинэ бизнес эхлүүлэхийг оролдож тархи толгойгоо гашилгах нь бий. Тэгэвч хэзээ ч, хэн нэгний эрхэлж байгаагүй цоо шинэ бизнес санаа олох нь өдрийн од мэт ховор. Швейцарийн бизнесмэн 37 настай Ринальдо Вилли бол “Algordanza” компанийг үндэслэгч, захирал нь. Швейцарь улс газар нутаг багатай, бүрлээчдийнхээ булш бунхныг барих, оршуулгын газар жинхэнэ утгаараа асуудал болсныг Ринальдо Вилли соргогоор олж харан нэгэн бизнес эхлүүлсэн нь санаанд багтамгүй боловч богино хугацааны дотор маш өндөр амжилтад хүрчээ. Түүний компани нэг ёсны оршуулгын товчоо бөгөөд талийгаачийн цогцсыг чандарлаж, чандрыг нь алмаз буюу үнэт чулуу болгон хувиргадаг аж. “Хэрэв та энэ амьдралаас тансаг явахыг хүсвэл манай Algordanza компани хамгийн сүүлийн үеийн технологийг ашиглан таны чандрыг синтетик алмааз болгон хувиргана” гэж тус компани өөрийгөө сурталчилдаг.

 

Чандарласны дараа алмаз болж хувирах төлбөр нь 5000 - 22000 доллар. Энэ үнэд алмаазыг хадгалах “сайхан модон хайрцаг” ч багтана. Гэхдээ энд сонголт бий, хүсвэл хайртай хүнийхээ чандрыг бөгж, хүзүүний зүүлт болгон үргэлж биедээ авч явж болох аж. Жил бүр 850 хүний чандар “Algordanza” лабораторид ирж, хэдэн жилийн дараа үнэт чулуу болон хувирч эздэдээ очдог. Өөрөөр хэлбэл, талийгаачийн шарилыг өвөрмөц үнэт эрдэнийн бунхан орлоно.

Энэ улсад газрын хомсдол нүүрлэж, хүн ам өсч байгаа тул уламжлалт оршуулгын газрыг халах шинэ арга гарч ирсэн тул татварын хөнгөлөлт ч эдлэх болж. Тиймээс Ринальдогийн санаагаар олон бизнесмэн, компаниуд цоо шинэ салбар руу хошуурч байгаа аж.

Ринальдо Вилли “10 жилийн өмнө би эдийн засгийн факультетын оюутан байхдаа энэ санааг гаргасан. Манай багш нэг удаа Оросын эрдэмтний лекцийг өгч уншуулсан. Тэнд синтетик алмазыг хагас дамжуулагчийн үйлдвэрлэлд өргөн ашиглана гэсэн байлаа. Анх би энэ алмазыг хүний чандраас гаргаж авдаг гэж буруу ойлгосон. Гэтэл ургамлын үнсээс гаргаж авдаг аж. Миний энэ алдаа багшид таалагдаж, нөгөө эрдэмтэнтэй холбож өгсөн. Тэр хүн Швейцарьт алмаз үйлдвэрлэдэг аппараттай байлаа. Ингээд бид хамтдаа “Algordanza”-г байгуулсан юм” хэмээн ярьсан юм.

Алмаз, бриллиант бол маш тансаг, цэвэрхэн тул шарил, хогондоо дарагдан зөнд нь орхисон оршуулгын газартай харьцуулшгүй. “Би нас барсан хүний биеийг таатай, харах болон хүрэхэд аятайхан зүйл болгож хувиргахыг хүссэн. Мөн алмазыг үеэс үед дамжин хадгалж болно. Тэгэхээр бидний алмаз бол хэзээ ч устахгүй, сарнихгүй дурсамж” хэмээн Ринальдо Вилли ярилаа. Хүний шарилыг алмаз болгон хувиргах процессыг товч өгүүлэхэд, эхлээд шарилыг чандарлаж, химийн тодорхой элементээр боловсруулж, бүх нүүрстөрөгчийг гаргаж авна. Дараа нь нүүрстөрөгчийг өндөр градуст халааж, графит болгодог. Тэгээд дэлхийн газрын гүний нөхцөлийг бүрдүүлсэн тусгай төхөөрөмжид хийж, маш өндөр даралт, цельсийн 1500 градуст хэдэн долоо хоног сар болгоход алмаз бий болдог аж. Дашрамд дурдахад, байгалийн алмаз мянга мянган жилийн турш бүрэлдэн тогтдог билээ.

Чандраар алмаз хийхэд боловсруулаагүй үедээ дөрвөн карат, засч янзалсны дараа нэг карат болдог гэнэ. Хааяа 1,6 ба 1,8 каратын алмаз ч үүсдэг. Ер нь алмазын хэмжээ нь графитыг хичнээн хугацаагаар аппаратад байлгаснаас хамаардаг аж. Удаан байлгавал том алмаз болдог ба үнс чандрын чанар ч үүнд нөлөөлдөг. Жишээлбэл хүн хиймэл шүдтэй, эсвэл өөр хиймэл эрхтэнтэй, тодорхой нэр төрлийн эм уудаг байсан бол түүний чандруу цэвэр биш байх ба алмазын чанар ч буурдаг. Түүнчлэн дээрх хүчин зүйлс үнэт чулууны өнгөд нөлөөлдөг. Жишээлбэл, химийн эмчилгээ хийлгэсэн хүмүүсийн чандраар хийсэн алмаз арай цайвар өнгөтэй болдог.

Ер нь хүний чандраар алмаз хийхэд голдуу цэнхэр өнгөтэй байдаг, энэ нь хүний бие организмд байсан борын үлдэгдлээс болдог аж. Ринальдо Вилли “Гэхдээ хүн бүр өвөрмөц алмааз. Тув тунгалагаас бараг хар хүртэл өнгөтэй алмааз болдог” гэж ярилаа. Сэтгүүлч түүнээс “Танай алмааз жинхэнэ алмаазаас ялгаатай юу?” гэж асуухад Ринальдо Вилли “Манай алмааз жинхэнэ. Алмаазын бүхий л физик, химийн шинж чанарыг агуулдаг. Гэхдээ манай синтетик алмааз жинхэнээс арай хямд. Хүн бүтээсэн учраас. Гэхдээ та жирийн нүдээр хараад ялгахгүй, алт мөнгөний дархан ч гэсэн. Түүнийг ялгах ганц арга бол химийн скрининг. Зөвхөн геммологийн тусламжтайгаар хиймэл алмааз эсэхийг тодруулж болно” гэж хариулав.

Хүний чандраар алмааз хийхэд ердөө 2 грамм нүүрстөрөгч хангалттай гэнэ. Онолын хувьд нэг хүний чандраар 50 ширхэг алмааз хийж болох ч амьдрал дээр дээд тал нь есийг хийдэг ажээ. “Манай зарим үйлчлүүлэгч, ялангуяа япончууд олон алмааз, бриллиант хийхийг гуйдаг. Тэд гэр бүлийн гишүүн тус бүртээ бэлэглэх гэж тэр” хэмээн Вилли тайлбарлав. Ийм бриллиант, алмаазыг захиалагчид нь голдуу талийгаачийн эх, ээж байдаг гэнэ. Гэхдээ зарим нэг хүн алмааз болох хүслээ амьддаа гаргадаг байна. Тэд голдуу эдгэршгүй өвчнөөр өвдсөн хүмүүс байдаг аж.

Сэтгэгдэл 1ЭнгийнХэвтээБосооСэтгэгдэл бичих-Aa+
6 сар 30. 10:32
Зочин

Буддын шашинт орнуудад хувилгаан, гэгээрсэн хүмүүсийн үлдэгдэл чандар нь алмааз болдог гэсэн итгэл бий. Энэ нь хоосон биш зүйл ажээ. Яахав буддын дагалдагчид жаахан ов мэх хэрэглэж химийн урвал явуулдаг байсан байж болно. Уг нь зүгээр санаа юм. Нээрэн нэг л мэдэхэд бид булшны газрыг түрж байшин барих нь тодорхой.

Сэтгэгдэл бичих
Санамсаргүй нийтлэл [ Энд дарна уу ]