Ангилал

Сайтын талаар ярилцъя Уншигчдын санал бодол

Дунд сургуулийн түүхийн сурах бичиг агуулга муутай, ойлгомжгүйУншсан499

...сурах бичгийн агуулга ойлгомжгүй. Хичээл, бүлэг бүрийн даалгавар ямар ч сонирхолгүй, ярилцах, асуулт, хүснэгт нөхөх, эх зохиох гэх мэт хэдхэн төрлийн даалгавартай. Сурагчид бие даан хийх, цаашид гүнгийрүүлэн судлах ямар ч нөхцөлгүй.

Ерөнхий боловсролын сургуулийн 7-р ангиас эхлэн түүхийн хичээл үзэж эхэлдэг бөгөөд ингэхдээ дэлхийн түүхийн хичээлээр эхэлж байгаа нь хүн төрөлхтний үүсэл гарал, анхны иргэншлүүдээс эхлэн таниулахад логик дараалал, ач холбогдолтой мэт боловч сурах бичгийн агуулга нь дөнгөж түүх үзэж эхлэж байгаа 7-р ангийн хүүхдэд дэндүү хүнд, ойлгомжгүй  байдлаар бичигдсэн байдаг. Стандарт, хөтөлбөр, төлөвлөгөө гэж баталдаг ч бодит байдал дээр маш олон сургуульд номноос нь товчлол бичүүлэх маягаар түүхийн хичээл заагдаж байна. Багш төвтэй сургалтаас шавь төвтэй сургалт руу шилжиж байгаа хэмээн ярьсаар байгаа ч хамгийн гол хэрэглэгдэхүүн болох сурах бичиг нь багш төвтэй сургалтаар явахаас өөр аргагүй байдалд хүргэдэг.

Түүх I буюу дэлхийн түүхийн сурах бичиг нь 2006 оноос хойш шинэчлэгдэн хэвлэгдэлгүй байсаар 2014 онд  шинэчлэгдэн хэвлэгдэж байна. Анх хэвлэгдэхдээ 11 жилийн сургалттай Ерөнхий боловсролын сургуулийн 6-7 дугаар ангид үзнэ гэсэн заалттайгаар гарсан боловч  ерөнхий боловсролын сургууль 11-12 жилийн сургалттай болсон, сурах бичгийн агуулга  шинэчлэл нэрийн дор одоо зөвхөн 7-р ангид үздэг болсон. Ингэснээр сурагчид сурах бичгийн агуулгыг нэг хичээлийн жилд багтаан үзэх боломжгүй болжээ. Хуучин сурах бичгийн хувьд (2006 оны сурах бичиг) нэг хичээлийн жилийн түүхийн хичээлийн цагт сурах бичгийн агуулгыг хуваан үзэхэд 7 бүлгээс дээд тал нь 5-р бүлэг буюу аж үйлдвэржилт  хүртлэх агуулгыг үзэж амжих хугацаа гарч байна.  Энэ нь 2 жил үзэх хичээлийг нэг жилд багтаан үзэж байна  гэсэн үг юм.

Мөн дээр дурдсанчлан сурах бичгийн агуулга ойлгомжгүй. Хичээл, бүлэг бүрийн даалгавар ямар ч сонирхолгүй, ярилцах, асуулт, хүснэгт нөхөх, эх зохиох гэх мэт хэдхэн төрлийн даалгавартай. Сурагчид бие даан хийх, цаашид гүнгийрүүлэн судлах ямар ч нөхцөлгүй.

Боловсролын салбарт шинэчлэл хийж “хүүхэд нэг бүрийг хөгжүүлэх, хүүхдээ оношлох, бие даасан чадвартай болгохыг зорьж байна” хэмээн боловсролын сайдаас эхлээд бүх шатны хүмүүс нь ярьж байгаа ч бодит байдал дээр ингэж өөрчлөгдөх ямар ч боломжгүй байна.

Шинэ сурах бичиг (2014 оны сурах бичиг)-т хуучин сурах бичгээсээ ямар өөрчлөлт шинэчлэлт гарав.

Хамгийн эхний өөрчлөлт бол нийт 7 бүлэг байсан агуулгыг 4 бүлэг болгон хураангуйлсан. Ингэхдээ түүх бичлэг, агуулга, доторх даалгавар огт шинэчлэгдээгүй. Зөвхөн сэдвүүдийг дэлгэрүүлсэн болон хураангуйлсан.

Зөв бичихзүйн алдаа гарчигнаас эхлээд үргэлжилж байна. Нэг нүүрэн дээр нэг үгийг хоёр янзаар бичсэн тохиолдол ч байна.

Өмнөх сурах бичгүүдийн нэгэн адил тухайн насны хүүхдийн нас, сэтгэхүйн онцлогт тохирсон зохиомжгүй текстийн хэмжээ их, ямарч сонирхолгүй.

7-р ангийн анх түүх үзэж байгаа хүүхдэд ойлгомжгүй үг хэллэг найруулгатай. Жишээ нь: ...Феодалын төр нь дундад зууны янз бүрийн үеүдэд янз бүрийн хэлбэрээр оршиж байв...Хожуу дундад зууны сүүлч буюу шинэ үеийн эхээр феодалын төр нь абсолют хэмжээгүй эрхт хаан төр болон хувирсан байна... г.м

 

Харин бусад орны түүхийн сурах бичиг нь хавтасныхаа зургаас эхлээд тухайн цаг үеийг бүрэн тодорхойлхуйц зурагтай, нэр нь хүртэл хүүхдийн анхаарал татахуйц (германы сурах бичиг – цаг хугацаагаар аялахуй гэдэг нэртэй), доторх загвар дизайн нь хүүхдийн нас, сэтгэхүйн онцлогт тохирсон, аль болох энгийнээр ойлгомжтой зураг, хүснэгт гэх мэтээр тайлбарласан. Сэдэв бүрийн даалгавар хүүхэд бие даан хийх боломжтой асуулт хариултын төрөл бүрийн тоглоом, эртний зарим зүйлсийг хийж болох туршилтуудтай, он дараалалын маш ойлгомжтой зураглалуудтай, тухайн сурах бичигт орсон эх материалуудын болон зургийн бүх эх сурвалж нь тодорхой байх юм. Манай улсын түүхийн бүх сурах бичигт ашигласан зургуудын эх сурвалж, зохиогчийн эрхийн талаар дурдах ч хэрэггүй биз ээ.

Гэтэл манайд яагаад ингэж хийхгүй байна вэ? Энгийнээр тайлбарлах боломжтой зүйлүүдийг ч хүндрүүлэн ойлгуулж анх үзэж эхлэхээс нь эхлээд л түүх гэдэг бол асар их унших материал гэсэн ойлголтыг төрүүлж, түүхийн хичээлд дургүй болгох ямар шаардлага байна? Нэг сурах бичиг дээр нь МЭӨ, нөгөө сурах бичиг дээр нь НТӨ  зэргээр нэг нэр томьёог хэдэн янзаар бичиж ойлголтын зөрүү үүсгэдэг гэх мэт маш олон асуудал байна. Энэ бүхний үр дүнд зөвхөн сурагчид л хохирон үлдэж байна.

Сурагчдад хичээл заах, сурагчид мэдлэг олж авах хамгийн гол хэрэглэгдэхүүн бол сурах бичиг. Гэтэл сурах бичгийн шинэчлэл нэрийн дор гаднах өнгө, доторх хэдэн гарчигийг нь наана цаана нь оруулж бичихээс биш яг нөгөө яриад, хэрэгжүүлэх гээд байгаа шигээ шавь төвтэй боловсрол олгох, хүүхэд бие даан хөгжих ямар ч боломжгүй байдлаар бичигдсэн сурах бичигтэйгээс гадна зөв бичихзүйн алдаатай.

Мөн 10-р ангийн түүхийн сурах бичгийн 2-р бүлэг дэлхийн түүх байдаг бөгөөд өмнө нь буюу 7-р ангид үзсэн дэлхийн түүхийн хичээл нь дахин ордог.

Эцэст нь дүгнэхэд боловсролын тогтолцоондоо шинэчлэл хийж байгаа л юм бол сурах бичгээ үүнтэйгээ уялдуулан шинэчлэх шаардлагатай. Сурах бичгийн шинэчлэл гэж хавтасны өнгө өөрчилж, гарчиг нааш цааш нь зөөх биш агуулга, аргыг нь яаралтай шинэчлэх хэрэгтэй. Сурагчид ч бие даан үзээд ойлголт авчихдаг, багш ч хэцүү болголгүйгээр заачихдаг тийм ойлгомжтой сурах бичигтэй болох шаардлагатай байна.

Сэтгэгдэл 0ЭнгийнХэвтээБосооСэтгэгдэл бичих-Aa+
6 сар 19. 22:45
Зочин

tuuh sain ch bai muu ch bai batlah barimttai yum zaagaarai daa hytad japan korea 3 tuuhee duraaraa zohiodog

Санамсаргүй нийтлэл [ Энд дарна уу ]

Унших СЭДЭВ-ээ өөрөө сонгодог боллоо

12 сард сонгогдсон сэдэв
Дундад зууны Европ
13 сарын онцлох сэдвийн санал хураалт явагдаж байнаЭнд дарж саналаа өгнө үү