Ангилал

Сайтын талаар ярилцъя Уншигчдын санал бодол

Ертөнц аврагдсан түүхУншсан4,576

1983 оны есдүгээр сарын 26-ны өдөр түүхэнд онцгойлон тэмдэглэгдээгүй. Агуу нээлт юм уу шинжлэх ухаан, соёл урлагийн ямар ч үйл явдал энэ өдөр болоогүй.

1983 оны есдүгээр сарын 26-ны өдөр түүхэнд онцгойлон тэмдэглэгдээгүй. Агуу нээлт юм уу шинжлэх ухаан, соёл урлагийн ямар ч үйл явдал энэ өдөр болоогүй.

Олон жилийн турш энэ өдрийг австраличууд Америкийн цомын тэмцээнд америкчуудыг ялсан өдөр гэж л тэмдэглэсээр иржээ. Харин үнэн хэрэгтээ эл өдөр хүн төрөлхтөн түүхэнд байж болох хамгийн аюулт дайнаас аврагдсан юм. 1983 он хүйтэн дайны оргил үеүдийн нэг байв. Коммунист оросууд, капиталист америкчууд далайн хоёр эрэгт бие биеийнхээ эсрэг юу ч хийхэд бэлэн зогсож байлаа. Олон арван жил дайсагналцсан хоёр их гүрний харилцаа Солонгосын 007 дугаарын зорчигч тээврийн онгоцны сүйрлийн дараа улам хурцдаад байв. 1983 оны есдүгээр сарын 1-нд оросууд 269 хүнтэй явсан дээрх онгоцыг устгажээ. Тэдний дунд Америкийн сенатын гишүүн хүртэл байв. Ихэвчлэн америк тагнуулчдын хяналтад байдаг бүсэд нисэж явсан онгоц агаарын зурвас ялимгүй нэвтэрмэгцээ эргэн нисчээ. Цэргийн үйл ажиллагаа байж магадгүй гэж сэжиглэсэн оросууд шуудхан пуужин харваж онгоцыг хэдэн мянган метрийн өндрөөс тэнгист унагасан байна.

 

Дэлхий нийт цочирдож, АНУ уг үйлдлийг аллага, харгислал гэж нэрлэв. Улстөрийн уур амьсгал ширүүсэж, Америкийн агаарын хүчин дайнд бэлтгэж эхэллээ. Москва хотын захад байрлах нууц албаны хурандаа Станислав Петров АНУ Орос руу халдвал дайсандаа барих хариу бүхий л ажиллагааг хянаж байв. Түүний урд бүх цаг үеийн хамгийн аюултай цөмийн зэвсгийн удирдлага байлаа. Гэнэтхэн дэлгэцэн дээрх “Эхэл” гэсэн том улаан гэрэл асаж эхлэв. Энэ нь Америк Орос руу халдлаа, хариу цохилт өг гэсэн дохио боловч хурандаа хүлээхээр шийджээ. Тусгай албаныхан бүгд цочирдож хурандаагийн шийдвэрийг хүлээв. Эхний дохиоллын дараа дахин дөрвөн ч удаа гэрэл асчээ. Хурандаа С.Петровын тооцоолон бодох машин дээр Орос орныг чиглэн Америкийн цөмийн таван ч пуужин ирж яваа гэх ослын гэрэл анивчив. Түүнд шийдвэр гаргах 2-3-хан минутын л хугацаа байжээ. С.Петров гол товчлуурыг дарсан бол зөвлөлт засгийн тэргүүн болсон КГБ-ийн тэргүүн асан Юрий Андропов олон зуун сая хүнийг хэдхэн хормын дотор хөнөөх цөмийн пуужинг харвах тушаалыг үг дуугүй буулгах байлаа.

Харин туршлагатай хурандаа мэдлэгтээ бус мэдрэмждээ найдав. Юуны өмнө тэрбээр цөмийн пуужингууд нэг баазаас бус харин дайсны бүхий л хүчнээс зэрэг ирэхийг тооцоолсон байна. Мөн тооцоолох төхөөрөмж ташаа мэдээлэл дамжуулсан байж мэднэ гэж таамаглажээ. Удаан тээнэгэлзсэний эцэст хурандаа С.Петров сурсан бүхнийхээ эсрэг, өөрийн хөтөлсөн протоколынхоо эсрэг шийдвэр гаргаж гол товчлуурыг дарсангүй. Уг явдлын дараа хэргийг шалгах хороо мэдээлэл дамжуулагч сансрын хиймэл дагуул бүрэн чадлаараа ажиллаагүйг тогтоожээ. Ердөө цаг уурын тогтворгүй байдал цөмийн пуужин мэдрэгчийг хэлбэлзүүлсэн аж. Хэргийг шалгах хороо С.Петровыг ялласангүй, шагнасан ч үгүй.

Хожим хурандаагийн хэлснээр түүнийг гавьяа байгуулсан хэмээн өргөмжилсөн бол цөмийн асуудал хариуцсан мэргэжилтнүүдийг үл хүндэтгэсэн хэрэг болох байсан гэнэ. Ертөнцийг санаандгүй шахам аварснаасаа хэдхэн сарын дараа С.Петров цэргийн албаа орхиж мод бэлтгэгч болов. Зарим хүн түүнийг халагдсан гэдэг ч тэрбээр өөрөө цэргийн амьдралаас залхсан гэж даруухан өгүүлж байв. Гэхдээ нууц албаныхан түүнийг байцааж, үүргээ умартсан хэмээн яллаж хэсэг хугацаанд хорьсон гэх баримт бий. Дээрх хэргийн дараа сэтгэцийн хямралд хүртэл орсон тэрбээр өдгөө Москва хотын захад орших Фрязино сууринд аж төрдөг. 1990-ээд оны эхэн хүртэл улсын нууцад тооцогдож байсан хурандаа С.Петровын түүхийг түүнтэй мөр зэрэгцэн алба хаасан хурандаа генерал Юрий Вотинцев анх нийтэд дэлгэсэн юм.

Тэтгэврийн хэдхэн рублиэр амь зуудаг ч түүний гэрт талархагчдын хөл тасардаггүй. Түүнд өөрийг нь зорьж ирсэн олон зуун сэтгүүлчийн нэрийн хуудас хайрцаг дүүрэн бий. Тэдгээрийн ердөө гурав нь л орос сэтгүүлчийнх. Түүнийг 2004 оны тавдугаар сарын 21-нд Сан Франциско хотод төвтэй Дэлхийн иргэдийн холбооноос дэлхийн хүндэт иргэн цомоор шагнажээ. С.Петров 2006 оны нэгдүгээр сард уг шагналыг 1000 ам.долларын хамт Нью-Йорк хотноо гардаж авсан юм. Хүн төрөлхтөнийг аварсан энэхүү эгэл хүний амьдралаас сэдэвлэсэн “Ертөнцийг аварсан хүн” нэртэй баримтат кино энэ оны намар олны хүртээл болох аж. Хурандаа С.Петровыг барууны сэхээтнүүд баатар гэдэг. Харин өвгөн хурандаа “Би зүгээр л зөв газраа, зөв үедээ үүргээ гүйцэтгэсэн” гэдэг юм.

Г.Лхагвадулам

http://aniryortonts.blogspot.com

Сэтгэгдэл 0ЭнгийнХэвтээБосооСэтгэгдэл бичих-Aa+
Санамсаргүй нийтлэл [ Энд дарна уу ]

Унших СЭДЭВ-ээ өөрөө сонгодог боллоо

12 сард сонгогдсон сэдэв
Дундад зууны Европ
13 сарын онцлох сэдвийн санал хураалт явагдаж байнаЭнд дарж саналаа өгнө үү