Ангилал

Сайтын талаар ярилцъя Уншигчдын санал бодол

Чалчаа саарал: Америкийн тэнгэрт болсон агаарын байлдаанУншсан13,887

1956 онд, Америкийн тэнгэрт ямар агаарын дайн болдог хэрэг вэ? гэж зарим нэг нь гайхаж байж магадгүй.

1956 оны хаврын нэгэн өдөр энэ агаарын байлдаан болсон гэдэг. Байз 1956 он... Америк ...юу вэ? Хэн хэнтэйгээ дайтах хэрэг вэ? Америкийн тэнгэрт ямар агаарын дайн болдог хэрэг вэ? гэж зарим нэг нь гайхаж байж магадгүй. Чухам энэ хачирхалтай, сонирхолтой үйл явдлын тухай өгүүлэх гэж байна.

F6F Hellcat
 

1956 оны 4-р сарын 16 өдөр хуучин F6F Hellcat-ын нисгэгчгүй, пуужингийн бай болгон өөрчилсөн хувилбар нь Поинт Мугу дахь тэнгисийн цэргийн флотын нисэх буудлаас (онгоц тээгчээс  гэх нь бас бий) агаарт хөөрлөө. Алсын зайнаас удирдах энэ байг тэнгисийн цэргийн агаараас эсэргүүцэн хамгаалах хүчнийхэн далай дээгүүр нисэх үед нь буудаж унагах ерөнхий төлөвлөгөөтэй сургуулилалт эхэлсэн нь энэ.  Бурхны инээдийг хүргэх гэж хүн юм төлөвлөдөг гэсэн. Нээрээ “Бурхны инээд хүрсэн” бололтой өнөөх бай маань далай чиглэн нисэх биш харин Америкийн том хот болох Лос Анжелес чиглэн нислээ . Газраас удирдах удирдлага ч ямар ч үйлчилгээгүй болсон учир нисгэгчгүй онгоц хот дээр унаж хүний амь насанд хүрэхээс өмнө буудаж унагах хэрэгтэй байдаг. Агаарын нисэх хүчнийхнийг л гуйхаас өөр аргагүй болж тэд ч тэнгисийн цэргийнхэнд хэн гэдгээ харуулахаар хоёр амдан сөнөөгч F-89 D Scorpion  хөөргөсөн байна.

Энэхүү эмгэнэлт-инээдмийн үйл явдлын тухай ярихын өмнө F-89 хэмээх онгоцны тухай цөөхөн хэдэн үг зайлшгүй хэлэх шаардлагатай болох нь.

F-89

Хүйтэн дайны үед Америкийн агаарын хүчин Зөвлөлтийн бөмбөгдөгч нисэх онгоцны цуваа-эгнээг устгахын тулд бүтээсэн энэ амдан сөнөөгчийн анхны загварууд нь их буутай байсан боловч онгоцны хурд их болсон учир бөмбөгдөгчийн араас дайрах үед удаан хугацааны турш бөмбөгдөгчийн арын хамгаалах зэвсгийн хараанд байх шаардлагатай , урдаас дайрах үед агаарын их буу нь тэрхэн богино хугацаанд маш том бөмбөгдөгчийг найдвартай устгах хэмжээний сум гаргаж чадахгүй зэрэгтэй холбоотой зарим нэг өөрчлөлт хийсэн нь далавчны хоёр үзүүрт томоохон хэмжээтэй, удирдлагагүй пуужин харвах суурь хийж түүндээ (нэг далавчинд 52, нийт 104) 52 ширхэг 70 мм-ийн  Mighty Mouse хэмээх пуужин байрлуулсан байна. Бүхээгийн компьютер нөхцөл байдлыг хянаж пуужин харвах боломжтой үеийг хэлж өгөх ба боломжгүй үед систем огт ажиллахгүй.  Цуваа-эгнээгээр яваа бөмбөгдөгч онгоцны бөөгнөрөл рүү нэг дор ийм олон пуужин харвахад асар их үр дүнд хүрнэ гэж зохион бүтээгчид тооцож байснаас уг онгоцонд агаарын их буу болон түүний хараалах систем хэрэггүй боллоо хэмээн зэвсэглэлээс хасжээ.

Энэ шинэ системийн нэг дутагдалтай тал нь бай нэгэн жигд хурдаар, тогтвортой чиг барин нисэх үед л үр дүнтэй байх явдал юм. Бөмбөгдөгч онгоц ингэж л нисэх хойно.

Далавчны үзүүрт байрлах удирдлагагүй пуужингууд харагдаж байгаа нь

Ингээд “тамын муур”-ыг хоёр амдан сөнөөгч маань барьж авах үед тэд Лос-Анжелесын тэнгэрт байсан ба хотод аюултай байдал үүсгэхгүйн тулд буудалгүй даган ниссээр хотоос гарлаа.

Пуужин харвах гэтэл жижигхэн онгоц маань дайрагчдын хүссэн шиг чигээр, тогтвортой нисэхгүй “янз бүр” болж байсан учир автомат систем ажиллахгүй болж нисгэгчид хараалах системийг салган нүдээр баримжаалан буудах шийдвэрт хүрсэн байна. Хараалж, хараалж нэгэн зэрэг 42 пуужин харвасан ч байгаа оносонгүй. Харин ч пуужин нь газарт унан тэсрэхдээ ихээхэн том түймэр тавьсан бөгөөд зарим пуужин Indian Oil Co хэмээх нефтийн агуулах,түүний  насосын систем, Bermite Powder Co-гэсэн тэсрэх бодис үйлдвэрлэх үйлдвэрийн хажуугаар их ойрхон гарсан нь чухамдаа азтай хэрэг байлаа.

Тулалдаан үргэлжилсээр... Дараагийн ээлжид 32 пуужин тавьсан ч өмнөхтэй адил үр дүнтэй болсон учир дараагийн 30 пуужинг харвалаа. Бас л оносонгүй.  Удалгүй бай маань шатахуун дуусан учир газарт уналаа.

Бүрэн зэвсэглэсэн үедээ ийм айхтар араатан болдог байна.

Энэ тулалдаанд нийт 124 пуужин харвасан бөгөөд ганц нь ч байгаа оноогүй боловч эхний харвалтын дараа 100 акр газарт түймэр гарч 200 гал сөнөөгч нар түймэр унтраахаар очсон бол дараагийн харвалт нуурын ойролцоо газар бас л түймэр тавин 150 акр газар шатаж 100 гал сөнөөгч очсон байдаг. Сүүлийн харвалтаар 350 акр газарт түймэр гарч 500 гал сөнөөгч шаардлагатай болсон болон Палмдейл хотод олон пуужин унасан гэдгийг бас дурдах хэрэгтэй байх. Мөн олон пуужин тэсрэлгүй аюултай байдалтай талаар нэг тарсныг дараа нь цуглуулж аюулгүй болгох гэж ихээхэн хүн хүч, хугацаа, хөрөнгө зарцуулсан байна. Агаарын нисэх хүчин дараа нь нийт 13 тэсрээгүй пуужин олсон гэдэг ба аз болж ганц ч хүний амь нас эрстээгүй билээ.

Энэхүү шившигтэй үйл явдлын дараагаар Америкийн сэтгүүлчид тус явдлыг Battle of Palmdale хэмээн тохуурхан нэрлэсэн байна.

Палмдейлийн тэнгэрт нэг иймэрхүү байдлаар цацаад байж, цацаад байж...

P.S.

Үүнтэй адил төстэй үйл явдал цаашид нэлээд хэд тохиолдсон байдгаас хамгийн алдартай нь Польшид байрлаж байсан ЗХУ-ын агаарын нисэх хүчний сөнөөгч Миг-23 хөдөлгүүрийн гэмтлээс болон доголдох үед нисгэгч нь шүхрээр үсрэн буусны дараа онгоц цааш явсаар хоёр ч улсын хил даван Бельгийн газар нутагт амины орон сууц мөргөн унасан явдал юм.

Нисгэгчгүй онгоц унасан газар

Төстэй, хамгийн сүүлийн үйл явдал нь Сири дэх Оросын байж болзошгүй нисгэгчгүй онгоц (Израилийн үйлдвэрлэсэн онгоц) операторын буруугаас болж Голаны өндөрлөг хавиар Израилийн хил нэвтэрсэн бөгөөд түүнийг устгах гэж “Патриот”-ын хоёр пуужин харваад, хоёр F-16 агаарт гаргаад ч унагаж чадалгүй, өнөөх нь буцаж Сирийн хил давсан явдал юм. Ядаж байхад саяхан Иеменчүүдийн харвасан пуужинг амдан устгах ёстой “Патриот” бас л бүтэлгүйтэж , энэ нь видео хэлбэрээр интернетээр цацагдаж энэ системийн нэр нүүр улам бүр унасаар...

Нийтлэлч Чалчаа саарал

Сэтгэгдэл 0ЭнгийнХэвтээБосооСэтгэгдэл бичих-Aa+
Санамсаргүй нийтлэл [ Энд дарна уу ]