Ангилал

Сайтын талаар ярилцъя Уншигчдын санал бодол

CNN: 2016 оны эгзэгтэй 20 агшин гэрэл зурагт хэрхэн буув?Уншсан1,331

CNN агентлаг шинэ, хуучин хоёр оны зааг дээр жил бүр дэлхийн дахинд болж өнгөрсөн үйл явдлуудыг эргэн сануулж, хамгийн эгзэгтэй агшнуудыг буулгаж авсан гэрэл зургуудыг уншигч олонд сонирхуулдаг.

CNN агентлаг шинэ, хуучин хоёр оны зааг дээр жил бүр дэлхийн дахинд болж өнгөрсөн үйл явдлуудыг эргэн сануулж, хамгийн эгзэгтэй агшнуудыг буулгаж авсан гэрэл зургуудыг уншигч олонд сонирхуулдаг. Тэдгээр гэрэл зургуудаас та бүхэндээ түүвэрлэн хүргэж байна. Гэрэл зураг бүхэн тухайн үйл явдлыг эргэн сануулахаас гадна, түүх болон үлдэж байгаа юм.


Бүр 2012 оны арванхоёрдугаар сард болсон аймшигт аллагыг эргэн санаж АНУ-ын Ерөнхийлөгч Барак Обама хэвлэлийнхний нүдэн дээр нулимс дуслуулав. АНУ-ын Коннектикут мужийн Ньютаун хотын Сэнди Хук бага  сургуульд гар буу, автомат винтовоор зэвсэглэсэн Адам Ланза гэгч дайран орж багш сурагчид руу эмх замбараагүй гал нээн 5-6 насны 20 хүүхэд, зургаан том хүний аминд хүрсэн аймшигт хэрэг гарч байсан. Үүнийг дөрвөн жилийн дараа буюу 2016 оны нэгдүгээр сарын 5-нд Цагаан ордонд болсон хэвлэлийн бага хурлын үеэр Америкийн Ерөнхийлөгч эргэн дурссан юм.


Мексикийн цагдаагийн байгууллага тус улсын төдийгүй дэлхийн хамгийн том хар тамхины мафи "Синаола картел"-ийн удирдагч "Эль Чапо" хочит Хоакин Гузманыг энэ оны нэгдүгээр сарын 08-нд баривчилсан юм. Баривчлах ажиллагааны үеэр хүчний байгууллагын 5 ажилтан амь үрэгдсэн бөгөөд энэхүү "Хар хун" ажиллагааны бичлэгийг сүүлд нийтэд дэлгэсэн юм.


Оны эхээр авахуулсан ОХУ-ын Ерөнхийлөгч Владимир Путины нэгэн зургийг Си Эн Эн агентлаг онцолжээ. 2016 оны турш дэлхийн хамгийн нөлөө бүхий, хүчирхэг хүн байж ирсэн тухай онцлоод Туркийн элчин сайд төдийгүй Ерөнхийлөгчийг нь Сирийн асуудлаас болоод хурцхан шүүмжилж, олон үйл явдлын төвд байсаар ирснийг сануулжээ.


Британийн домог болсон рок од, хөгжимчин, жүжигчин Дэвид Боуи 69 насандаа хавдрын өвчний улмаас таалал төгссөн. Дэвид Боуи 1970-аад оны үеэс рок хөгжмийн салбарт гялалзан од болж эхэлснээс хойш олон арван жилийн турш уран бүтээлээ туурвисаар ирсэн хуучны томоохон уран бүтээлчдийн нэг юм. Тэрээр 15 сарын турш хавдрын өвчинтэй тэмцсээр ийнхүү 69 насандаа таалал төгссөн юм.


Ираны усан хилд зөвшөөрөлгүй нэвтэрсэн хэмээн тус улсын эргийн хамгаалалтын албанаас АНУ-ын эргүүлийн хоёр завийг саатуулан, 10 усан цэргийг баривчилсан талаар “CNN” агентлаг анх түрүүнд мэдээлж байв. Пентагоны хэвлэлийн алба “АНУ-ын эргүүлийн хоёр завь Кувейт улсаас Бахрейн хүрэх замдаа холбоо тасарсан. Шуурхай мөрдлөгийн явцад хоёр завь Иран улсад саатуулагдсан болохыг тогтоосон” гэсэн юм. Уг асуудалтай холбогдуулан АНУ-ын Төрийн нарийн бичгийн дарга Жон Керри, Иран улсын Гадаад хэргийн сайд Жавад Зарифтай утсаар холбогдож, ярилцсан ба  хагас цаг ярилцсаны эцэст саатуулагдаад буй завь болон цэргүүдийг нутаг буцаахаар тохиролцож чадсан юм.


Энэ жилийн Оскарын шагналын хамгийн дуулиант өрсөлдөөн Леонардо ди Каприотой холбоотой байлаа. 20 гаруй жилийн жүжигчний карьерынхаа туршид гол төлөв томоохон уран бүтээлүүд, төслүүд дээр ажиллаж байсан ч өнөөг хүртэл Оскарын шилдэг эрэгтэй дүрийн шагнал авч байгаагүй Лео энэхүү шагналаа хүртэж чадсан нь 2016 оны дэлхий нийтийн анхаарлын төвд орсон онцлох үйл явдал зүй ёсоор мөн байлаа. Титаник киноны гол дүрд хамтран тоглосон Кейт Уинслет түүнд баяр хүргэж байна.


 

Дэлхийн улс орнуудын удирдагчтай холбоотой шуугианууд байнга л олны анхаарлын төвд орж байдаг. Нэгэн үе манай улсын Ерөнхийлөгч Ц.Элбэгдоржийн нүүрийг гараараа таглаж шуугиан дэгдээж байсан Барак Обама анх удаа Куба улсад түүхэн айлчлал хийхдээ бас л шуугиулаад авсан. Айлчлалын үеэр хоёр улсын төрийн тэргүүн хамтдаа камерын өмнө гарч ирэхэд Обама намхан Рауль Кастрогийн мөрөнд зүүн гараараа хүрч, нөхөрсгөөр алгадахыг оролдсон ч Кастро Обамагийн гарыг тун сурамгай шүүрэн авч болиулсан нь гэрэл зураг, камерт тодхон буусан юм. Улмаар Кастро Обамагийн гарыг дээш өргөж харуулсан нь нөхөрлөлийг илтгэж чадсан юм. Өөрөөр хэлбэл нөхөрлөл гэдэг нь нэг нь нөгөөгийнхөө мөрийг алгадах бус, харилцагч талууд эрх тэгш байхыг хэлдэг аж. Дипломат ёсонд энэ мэт биеэр хийсэн үйлдлээс болж шуугиулсан тохиолдол олон байдаг билээ.


2014 онд найз бүсгүйнхээ амь насыг хөнөөсөн хэрэгт сэжиглэгдсэн алдарт тамирчин, "илдэн дээр гүйгч" хочтой Оскар Писториусыг гурван жил дараалан шүүсний эцэст энэ жил шүүхээс зургаан сарын ял оноож, улмаар биеэр эдлэхгүй болгосон юм.


Туркийн ерөнхийлөгч Тайип Эрдоаны уриалгыг хүлээж авсан иргэд гудамжинд гарч эсэргүүцэл үзүүлснээр цэргийнхний төрийн эргэлт хийх төлөвлөгөө бүтэлгүйтсэн юм.  Истанбул хотын гудамжинд гарсан танкнуудыг цэргүүд нь орхин одсон ба бослогод оролцсон цэргийнхнийг иргэд довтолж байна. Туркийн Ерөнхийлөгч яаралтай хэвлэлийн хурал хийж эргэлт хийх гэсэн оролдлогыг “эх орноосоо урвасан үйлдэл” гээд санаачлагчид нь үүнийхээ төлөө их үнэ төлөх болно гэсэн юм.


АНУ-ын Ерөнхийлөгчийн сонгуульд Бүгд найрамдах намаас нэр дэвшсэн Доналд Трамп нам доторхи сунгаандаа илт давамгай ялалт байгууллаа. Энэ түүний дараагийн том ялалтын эхлэл болсон юм.


Харин Ардчилсан намаас Төрийн нарийн бичгийн дарга асан Хиллари Клинтон мөн л хол тасархай нам доторхи сунгаандаа түрүүлж Америк гүрнийг ирэх дөрвөн жилд удирдах Ерөнхийлөгчийн төлөө нэр дэвших эрхтэй болсон юм. Гэсэн ч хатагтай Хиллари Клинтон томоохон ялагдал хүлээсэн.


2016 оны онцлох үйл явдал зуны олимп байлаа. Эхнээсээ л тун ч их хэл ам, маргаан, шуугиан дагуулсан олимпод Ямайкийн алдарт гүйгч Усэйн Болт дахин түрүүлэв. Түүний бусдаасаа хол тасархай, тун ч баяр баясгалантай түрүүлж яваа зургийг Си Эн Эн агентлаг олимпийн бүх гэрэл зураг дотроос онцолжээ.


Гурван удаагийн халз мэтгэлцээнд бүгдэд нь Хиллари Клинтоныг яллаа хэмээн судалгааны байгууллагууд үзэж байлаа.


Гэсэн хэдий ч Ерөнхийлөгчийн сонгуулийн эцсийн үр дүн америкчуудыг төдийгүй дэлхий нийтийг гайхашруулсан юм. АНУ-ын 45 дахь Ерөнхийлөгч Доналд Трамп!


АНУ-ын 44, 45 дахь Ерөнхийлөгч нар. Гэхдээ энэ зураг дээр харц, үйл хөдлөл илүү чухал.


Социалист лагерийн сүүлийн удирдагчдын нэг, Кубын хувьсгалын лидер, Ерөнхийлөгч Фидель Кастро таалал төгсөв.


Турк улсад суугаа ОХУ-ын элчин сайд Карловын амь насанд халдсан хэрэг гарлаа. Алуурчин Туркийн хүчний байгууллагын ажилтан байсан бөгөөд яагаад түүнийг цагдаа нар амьдаар нь баривчилж чадалгүй шууд хөнөөсөн бэ гэдэг асуулт хариу нэхэж байна.

Сэтгэгдэл 5ЭнгийнХэвтээБосооСэтгэгдэл бичих-Aa+
Сэтгэгдэл бичих
Санамсаргүй нийтлэл [ Энд дарна уу ]