Ангилал

Сайтын талаар ярилцъя Уншигчдын санал бодол

Ийм их санал авсан Ерөнхийлөгч урд өмнө байгаагүй, цаашид ч бараг гарахгүй болов ууУншсан5,045

Вовка, Дональд мэтийн нөхдийг бодвол жинхэнэ маргаангүй, “шударга” сонгуульд ялж хамгийн олон санал аван Ерөнхийлөгч болсон, дэлхийн хамгийн “шилдэг” ерөнхийлөгчийг танилцуулъя.

 

Аливаа сонгуулийн үр дүнг үргэлж шахам шударга биш болсон талаар шуугьдаг. Саяхан Оросын холбооны улсын ерөнхийлөгчийн сонгууль болж ВВП 76 хувийн санал авсан мэдээ гарахад Оросын либералууд тэрхүү Путин гээч нь ямар бузар луйвар хийсэн тухай шуугих гэж оролдож оролдож тэгсгээд намждаг жамаараа намжлаа.

АНУ-ын сонгуулийн дүн ч гэсэн бөөн маргаан. Ерөнхийлөгчийн сонгуульд ард түмнээс цөөхөн санал авсан Дональд Трамп ялалт байгуулж, АНУ-ын сонгуулийн систем гэж нэг “дүүрсэн тэнэг юм”  байдгийг дахиад л санууллаа. Маргаан ч гардгаараа гарч ерөнхийлөгчийн сонгуулийн ялагч нь хаа байсан Оросын Путин гэдэг хүн болсон юм гэж ойлгохоор, яагаад тэр нэр нь сонгуулийн нэрс дотор байхгүй байсан юм бол гэж гайхмаар шахам сонгууль болж өнгөрсөн бөгөөд  одоо хүртэл маргасаар, хэрэлдсээр.

Вовка, Дональд мэтийн нөхдийг бодвол жинхэнэ маргаангүй, “шударга” сонгуульд ялж хамгийн олон санал аван Ерөнхийлөгч болсон, дэлхийн хамгийн “шилдэг” ерөнхийлөгчийг танилцуулъя. Энэ хүнтэй адил санал авсан ерөнхийлөгч урд өмнө байгаагүй, цаашид ч бараг гарахгүй болов уу гэмээр дүнтэй сонгуульд оролцсон учир хамгийн “шилдэг” гэж нэрлэн бичиж байгаа билээ. Энэ бол Чарльз Данбэр Бёрджесс Кинг хэмээх Либерийн  17 дахь ерөнхийлөгч бөгөөд 1920-1930 оны хооронд төр барьж байжээ.

Энэхүү Теслатай дэндүү адилхан боловч (Илон Маскын тесла биш, “ориг” Теслаг хэлж байна) орчин үеийн соёлт хэлээр бол  “афро” өнгөтэй нөхөр бол өнөөх “шилдэг” маань.

Энэ ” шилдэг” ерөнхийлөгч улс орондоо ямар гавьяа байгуулсан бэ гэвэл:

-Дэлхий дахинд эдийн засгийн их хямрал болон хаа сайгүй хүнд байх үед “шилдэг” маань АНУ орж зээл тусламж гуйхаар явжээ. Өөрсдөө баларч байсан Америкчууд яаж ийж байгаад холбоотон болох “шилдэгт” маань  5 сая долларын зээл бүтээж чаджээ. Эр хүн! зээл авч чадлаа. Одоо харин яаж зээлээ үр дүнтэй зарцуулах вэ?

Тун удалгүй өнөө зээл хаашаа ч юм алга болж (бид гаднын зээл хаашаа алга болдгийг мэдэхгүй биш) дахин зээл хэрэгтэй боллоо. Энэ удаа улсаас биш харин том компаниас зээл авбал илүү дээр тухай далайн цаад хавиас нууцхан шивнэн, зөвлөсөн бололтой.  Зээл өгч магадгүй ганцхан компани байгааг ч хэлж өгч. Тэр нь Firestone хэмээх компани байлаа. Хэлэлцээний явцад дахиад 5 сая долларын зээл олж чадсан ба Firestone оронд нь сая акр газар 99 жилээр түрээслэн авах ба энэ хугацаанд татвараас бүрэн чөлөөлөгдөх, түрээсэлж байгаа газраа 100 % хяналтдаа байлгахаар тохирчээ. (Миний хувьд зарим нэг тоо нь л өөр болохоос ихээхэн танил дүр зураг харагдаад байх шиг ) Бас нэг өвөрмөц зүйл нь Либери улс гаднаас дахин зээл авах бол Firestone-оос зөвшөөрөл авах ёстой явдал юм.

Компани төсөвтөө энэ бүхнийг оруулан засвар хийсэн ба эдгээрийг санхүүгийн шинэ зөвлөх яаралтай хийхийг “зөвлөсөн” байна. Энэ зөвлөх маань АНУ-ын эрх баригчдын томилж ирүүлсэн хүн байсныг далимд нь нэг дуулгах нь зөв болов уу.

Firestone-той хийсэн гэрээ Парламентаар орж батлагдах ёстой байсан бөгөөд маш их эсэргүүцэлтэй тулгарч байсан ч хэрэлдсээр байгаад  (эсвэл хэрэлдэх мэт жүжиглэж байгаад) гарын үсэг зурагдаж бүх зүйл хуулийн дагуу боллоо.  Ингээд Либерт зээл орж ирэн, газар нутагт нь Firestone-ийн салбар байгуулагдсан ба АНУ-ын төрийн нарийн бичгийн дарга байсан Эдвин Барклей, сенатор Уильям Табмен нар энэ салбарын хуульч болцгоосон байна.

Зээл, зээлийн хүү  төлөх нь Либерийн төсөвт маш том дарамт болж байсан бөгөөд 1952 онд л энэ зээлээс салсан гэдэг.

-1927 онд “шилдэгтэй” ерөнхийлөгчийн сонгуульд өрсөлдөж ялагдсан Томас Фолкнер гээч нь ерөнхийлөгч болон тэдний ойр тойрныхон, эрх баригчид Либерийн нутаг дотор боолчлол хэрэгжүүлж байгаа, Испанийн колони болох Фернандо-По-д боол нийлүүлж, боолын худалдаа эрхэлж байгааг шүүмжлэн ярьж эхэлсэн байна. Байдал улам хурцдан сүүлдээ Үндэстний лиг (League of Nations) энэ талаар шалгалт явуулж эхэлсэн ба бүр Америкчууд хүртэл хэсэг хугацаагаар дипломат харилцаагаа зогсооход хүрсэн байна.

1930 онд шалгалтын дүн гарч боолын худалдаа эрхэлж байсан талаар нотолгоо олоогүй ч “шилдэг” болон зарим нэг эрх баригчид нь хүнийг хүчээр хөдөлмөр эрхлүүлэн, түүнээс их хэмжээний орлого олж байсныг тогтоожээ. Энэ бүхний эцэст “шилдэг” маань өөрийн эрхгүй огцрохоос өөр аргагүй болсон байна.

Одоо хамгийн амттай хэсэг буюу шилдэг ерөнхийлөгч болсон нь.

Хамгийн шилдэг ерөнхийлөгч гэж хамгийн өндөр хувийн санал авсан хүнийг хэлэх байх. Зарим газар 99 хувийн санал авч байсан нөхдүүд зөндөө их. Харин Чарльз маань эдгээрийг давж гарч чадсан билээ. Тэрээр 1927 оны ерөнхийлөгчийн сонгуульд 234 000 хүний санал авсан ба энэ үед санал өгөх эрхтэй хүний тоо 15 000 байжээ. Энд ямар нэг тоо, орон алдаагүй юм шүү. Чарльз нийт сонгогчийн 1500 хувийн санал авч ялалт байгуулжээ.  Сонгуулийн дүнг шалгаж үзэн ямар нэг булхай, алдаа мадаг олоогүй байна.

Яах аргагүй “шилдэг” нь Чарльз..

Нийтлэлч Чалчаа саарал
Сэтгэгдэл бичихийг түдгэлзүүлсэн байна
Санамсаргүй нийтлэл [ Энд дарна уу ]