Ангилал

Сайтын талаар ярилцъя Уншигчдын санал бодол

Орос гүрэн урвагчидтай ингэж тооцоо боддогУншсан19,405

Тагнуулч-урвагчид жирийн нэг урвагч иргэн, урвагч цэргээс илүү их улс орны нууц мэдээллийг мэдэж байдагт оршино.

 
Экс тагнуулч Сергей Скрипаль хордож дуулиан эхлэв

 

Их Британийн талд ажиллаж байсан Оросын цэргийн тагнуулын газрын ажилтан асан экс тагнуулч “үл мэдэгдэх бодис”-т хордон, эмнэлэгт хүргэгдсэн тухай олон улсын хэвлэлүүд мэдээлснээр ээлжит шуугиан дэгдсэн юм.

Түүнийг ням гарагийн үдээс хойш Лондон хотоос баруун зүгт 145 км зайтай орших Солсбэри хотын худалдааны төвд нэг эмэгтэйтэй хамт ухаангүй хэвтэж байхад нь олсон байна. Ухаангүй хэвтэж байсан уг хүн нь 66 настай Сергей Скрипал гэгч болохыг тогтоосон байна.

 

Сергей Скрипаль нь 1951 онд төрсөн, ОХУ-ын Зэвсэгт хүчний Жанжин штабт ажиллаж байгаад ГРУ гэгддэг Оросын цэргийн тагнуулын газарт ажиллаж, 1999 онд хурандаа цолтойгоор халагдаж, 2003 он хүртэл Гадаад хэргийн яаманд ажиллаж байсан, цэргийн тагнуулын мэргэжилтэй нэгэн юм. 2004 онд түүнийг эх орноосоо урвасан хэргээр Москвад баривчилсан бөгөөд тэрээр 1995 онд Их Британийн тагнуулын байгууллагад элсэж, Европ дахь Оросын цэргийн тагнуулчдын тухай мэдээлэл өгсний хариуд 100,000 ам доллар авч байснаа хүлээсэн ажээ. Скрипал Оросын шоронд хоригдож байгаад 2010 онд АНУ-Оросын хооронд тагнуулчдaa солилцох ажиллагаанд хамрагдаж, Их Британид шилжиж ирсэн аж.

Ингээд эрх чөлөөтэй болсон урвагч Скрипалын хувь заяа найман жилийн дараа тун бүрхэг болчихоод байна. 

Би-Би-Си агентлагийн дамжуулснаар Скрипалийг хордуулсан бодис VX байж болзошгүй гэнэ. Энэ төрлийн мэдрэл саажуулах бодис нэн хортой бөгөөд хүн арьсаараа дамжуулан 10 мг бодисоор хордвол хэдхэн мөчийн дотор амиа алдах магадлал 50 хувь аж. Хэдэн жилийн давтамжтайгаар байсгээд л Орост урвагчаар зарлагдсан тагнуулын албаныхан өрнөдийн орнуудад хорт бодист хордох зэргээр амиа алддаг. Үүний учрыг тунгаах гээд оролдоё.

Ер нь сайн нэртэй урвагчид ертөнцийн түүхэнд ховор. Байхгүйтэй л адил, учир нь эх орон, ард түмнээсээ урваж эсрэг этгээдийн талд орно гэдэг бол эхнэр хүүхдээ өөр эмэгтэйтэй араар нь тавьж урвахаас ч илүү жигшмээр бөгөөд аюултай зүйл гэсэн ойлголт өнөөг хүртэл бүх л үндэстнүүдийн дотор тархсан. Тиймээс ч урвагчдад хамгийн хүнд, хэцүү шийтгэлүүд оногдсоор ирж. Ялангуяа тагнуулч - урвагчдад.

Учир нь тагнуулч-урвагчид жирийн нэг урвагч иргэн, урвагч цэргээс илүү их улс орны нууц мэдээллийг мэдэж байдагт оршино. Бүхэл бүтэн улс орны аюулгүй байдлыг эмзэг байдалд оруулж, тогтсон системийг тэр чигээр нь унагах аюултай.

Бид энэ удаад Орос орон урвагчидтайгаа, тэр дундаа тагнуулын албаны урвагчидтай хэрхэн тооцоо боддогийг харуулах цөөн хэдэн жишээг онцолж байна.

Яагаад Оросыг сонгов оо гэж үү. Орос орон сүүлийн 200 жилийн турш эх орон - mother land гэдэг үгийн утга учрыг хамгийн тод томруунаар хэрхэн харуулж болох вэ гэдгийг дэлхий нийтэд харуулсаар ирсэн. Дэлхийн хоёр дайны хамгийн хүнд бэрхийг нуруундаа үүрсэн. Оросуудын эх оронч сэтгэлгээ, улс үндэс газар нутгаа хамгаалах сэтгэлгээ ямар ч цэрэг армиас илүү хүчирхэг байсаар, ялан дийлсээр иржээ. Гэхдээ л ийм нөхцөл байдал дундаас урвагчид гарсаар л ирж.

 Хэдийнэ олон нийтэд ил болж хэвлэлүүдээр цацагдсан хэдэн жишээ дурдая.

 
Александр Литвенкогийн үхэл

 

Дээрх хурандаа Скрипалын хордсон хэрэг явдлыг Оросын тагнуул асан Александр Литвенког 2006 онд Лондоны нэгэн зочид буудалд цацраг идэвхит бодистой цайгаар хордуулж, амийг нь хөнөөсөн явдалтай төстэй гэж үзэж байгаа. Тэгвэл жишээ болгон дурдсан Литвиненко нь мөн л Орос орны хувьд урвагч байлаа.

Түүний бэлэвсэн эхнэр Марина Литвиненко Скот­­ланд-Ярдын бай­цаагч­­дад өгсөн мэдүүлэг­т Литвиненко 2003 оны сүүлч, 2004 оны эхээр анх­ны цалин гэж 18 мянган паунд (27 мян­ган дол­лар), дараа нь 2007 оны гурав­дугаар сар хүр­тэл (нас барснаасаа хойш ч гэсэн) сар бүр хоёр мян­ган паунд авч, нийтдээ Бри­тани­йн таг­нуулын алба­наас 90 мян­ган паунд (136 мян­ган дол­лар) авсныг тодорхой дурджээ.

Литвиненко Английн тагнуулын алба Ми-6-д бүртгэлтэй, ца­лин­тай ажилтан байж. Түүний зуучлагч нь Мартин гэдэг нууц нэртэй ажилтан байсан ба түүгээр дам­жуулан Испанийн таг­нуулын албанд ч орос эр зүтгэж байжээ. "Британи, Ис­панийн тагнуулын алба Саша, Марина хоёрын банкны нэгдсэн данс руу ажлын хөлсийг нь шил­жүүлдэг байсан, зарим цалинг бэлнээр нь өгдөг байсан” хэмээн өмгөөлөгч Б.Эммерсон Оросын экс тагнуулчийн амийг хөнөө­сөн хэргийн талаарх шүүхийн анхны сонсгол дээр мэдэгдсэн билээ.

Алек­сандр Литвиненко хуучин ажлынхаа нууцыг өрнө­дийн­хэнд дэлгэж, үүгээр ч зогсохгүй “Холбооны аюулгүй алба Оросыг дэлбэлж байна” хэмээх ном гаргаад амжжээ. 2006 оны арван­нэгдүгээр сард Лит­виненко Лондон хотноо экс хамтран зүтгэгчид болох Андрей Луговой, Дмитрий Ковтун, Вячес­лав Соколенко нартай уулз­саны дараа бие нь муудаж, эмнэлэгт хэд хо­ног хэвтээд амьсгал ху­раасан билээ. Эмнэлгийн задлан шинжилгээгээр, Литвиненко нь полони хэмээх бодист хордон нас барсан болохыг тогтоожээ. Полони-210 хэмээх асар хортой бодис нь Орос, Франц, Америк зэрэг цөөхөн оронд, Засгийн газрын маш хатуу хянал­тад хадгалагддаг аж. Нэг хумхийн тоос шиг хэм­жээтэй полони хүний биед орвол үхэлд хүргэх аюул­тай байдаг.

Эндээс юу харагдаж байна, тийм ээ Оросууд урвагчтайгаа тооцоо бодчихож.

 
Тагнуулчдаа илчилсэн хурандаа

 

Одоо арай өөр жишээ дурдая. Дээрх хоёр экс тагнуулчийн тавилан давтагдах магадлал маш өндөр, аль хэзээний тодорхой болчихсон ч байж мэдэх нэгэн хурандаагийн түүх.

2010 онд Коммерсант сонинд АНУ дахь Оросын тагнуулчдын сүлжээг илчилсэн урвагчийг Оросын Аюулгүй байдлын албаны ажилтан хурандаа Шербаков байсныг илрүүлэн тогтоосон хэмээн мэдээлсэн юм. Энэхүү мэдээг Аюулгүй байдлын албаны гишүүн асан, Оросын Думын Аюулгүй байдлын комиссын дарга Геннадий Гудков нотолсон байдаг.

Хурандаа Шербаков нь Оросын Үндэсний аюулгүй байдлын албанд олон жил хэлтэс толгойлон ажилласан төдийгүй АНУ-д илчлэгдэн баривчлагдсан 10 тагнуулчийн үйл ажиллагааг удирдаж байсан дарга нь байжээ.

Хурандаа Шербаков тухайн үеийн ОХУ-ын Ерөнхийлөгч Дмитрий Медведевийг АНУ-д айлчлал хийхээс гурав хоногийн өмнө Оросыг орхин гарсан бөгөөд тагнуулчдыг илчилсэн хэрэг явдал Медведевийн айлчлалын дараахан дэгдсэн билээ.

Тэр үед ОХУ-ын Ерөнхий сайд Владимир Путин байлаа. Айхавтар хилэгнэсэн Ерөнхий сайд тагнуулчдыг илчисэн явдлыг “ноцтой урвалт” гэж дүгнээд “Урвагчдын хувь заяа хэзээд муугаар төгсдөг. Тэд гол төлөв архинд орж, эсвэл хар тамхи хэтрүүлэн хэрэглээд зүйл дуусдаг билээ" хэмээсэн байдаг. Ер нь бол В.Путин цаагуураа "Америкт бүгсэн хурандаа Шербаковтой хэзээ нэгэн цагт тооцоо бодож л таарна, чи удаан нуугдаж чадахгүй шүү" гэдгийг л дипломат байдлаар архи, хар тамхитай зүйрлэн хэлсэн гэж ойлгож болно.

Хурандаа өөрийнхөө хүмүүсийг Америкийн ТТГ-т дэндүү хайр найргүй илчилсэн гэдэг. Үүнээс болж Щербаков гэдэг нэр Оросын Гадаад тагнуулын албанд хараалын үгтэй дүйцэх болсон юм. Арван хүний хамгийн туршлагатай бөгөөд үнэ цэнэтэй туршуул болох Хуан Лазаро гэдэг нэрэн дор нуугдаж байсан 65 настай Михаил Васенковыг илчлэхэд урвагч Шербаков өөрөө биечлэн оролцжээ. Оросын тагнуул гэдгээ огтхон ч хүлээж өгөхгүй байсан Хуан Лазаротой америкчууд хурандаа Шербаковыг нүүрэлдүүлсэн. Хуан Лазарогийн үйл ажиллагааг олон жил удирдсан дарга нь хавтастай намтрын нь бариад зогсож байгааг хараад яах аргагүй тагнуулч гэдгээ хүлээн зөвшөөрсөн гэдэг.

Васенков бол Зөвлөлтийн тусгай албанд үр бүтээлтэй ажилласан тул бүр аль эрт 1980-аад оны эхээр л ЗХУ-ын дээд удирдлагын нууц тушаалаар ЗХУ-ын Баатар цол олгогдсон нэгэн байв. Түүний чадвар, танил тал нь үнэхээр мундаг байсан юм. Тэрбээр АНУ-ын Ерөнхийлөгчийн гадаадад хийх айлчлалуудын товыг хэдэн жилийн өмнөөс мэдчихдэг байсан аж. Хилийн чанадад очиж амьдрах хугацаандаа тэрбээр гурван ч удаа дээд боловсрол эзэмшжээ. 60 гаруй насандаа улс төр судлалын докторын зэрэг хамгаалсан гэдэг. Энэ бүх хугацаанд Васенков нөхцөл байдалдаа дэндүү ууссан тул орос хэлээ бараг мартжээ. Хэрэв урвагчид түүнийг илчлээгүй бол ийм мэргэжлийн тагнуулч нутагт нь ажиллаж байгаа гэдгийг АНУ хэзээ ч мэдэхгүй байсан юм.

Дуулиант үйл явдлаас сарын дараа Путин илчлэгдсэн тагнуулчдаа Орост хоригдсон Америкийн тагнуулын албаныхнаар сольж авсан билээ. Сүүлд Кремлийн засаг захиргааны нэгэн өндөр албан тушаалтан "Бид Шербаковыг хэн бэ, хаана байгаа вэ гэдгийг сайн мэдэж байгаа. Тэр этгээд мөнгөний төлөө ийм алхам хийсэн юм уу ямар нэг зүйлд барьцаалагдсандаа ингэсэн байх. Гэхдээ эргэлзээд хэрэггүй. Түүний араас өшөө авагчийг илгээсэн. Ийм хүний хувь заяа уйтгартайгаар төгсөнө. Тэр хүн бүхий л амьдралынхаа туршид үүнтэйгээ цуг амьдрах бөгөөд өдөр бүр өшөө авалтаас айх болно” гэж ярьсаныг хэвлэлүүд нийтэлсэн байдаг. Урвагч хурандаагийн хувь төөрөг тодорхой бололтой.

 
Шатаах зууханд шидүүлсэн хурандаа

 

Арай эртний нэг жишээ дурдах уу.

Илчлэгдэж, шүүхээс цаазын ял сонссоных нь дараа шууд л шатаах зууханд амьдаараа шидүүлсэн гэгддэг Олег Пеньковский жирийн нэг инженер байсангүйд хэргийн учир оршино. Зөвлөлтийн цэргийн хурандаа цолтой офицер энэ хүн дайны үед их бууны маршал Варенцовын штабт фронтоос хол ажиллаж байсан ба дайны дараа Энэтхэгт цэргийн атташегийн албанд бэлдэж байлаа. Гэвч томилолтоор очихоос нь өмнө хаант цэргийн офицер байсан бөгөөд улаан армитай байлдаж яваад Ростов хотын орчим алагдсан өөрийн эцгийн түүхийг худал (1919 онд хижиг өвчнөөр нас барсан) бичсэн нь илэрсэн тул бүтэлгүйтжээ. Улмаар маршал Варенцовын дэмжлэгээр Тагнуулын удирдах Ерөнхий газрын өмнөд болон хойд Америкийн болон Английн асуудал хариуцсан ахлах офицероор томилогдож мөн цэргийн дипломат академийн удирдах комиссын гишүүнээр сонгогдсон байна.

Гэсэн ч нэр алдар, хувийн эрх ашгийг илүүд эрхэмлэдэг хүний хувьд Энэтхэгийн асуудалд ихээхэн эмзэглэсэн тул барууны аль нэг тусгай албатай хамтран ажиллахаар шийдэж Америкийн Тагнуулын Төв Газар (ТТГ)-тай хэд хэдэн удаа нууцаар холбоо барих оролдлого хийж хамтран ажиллахаар тохиролцсон байна. Удалгүй Пеньковский Зөвлөлтийн төлөөлөгчдийн бүрэлдэхүүнд багтан Англид очихдоо Лондон хотын “Маунт Роял” зочид буудалд байрлаж, Английн Ми-6, Америкийн ТТГ-ын ажилтнуудтай уулзалджээ. Улмаар барууныхны хувьд Пенковский тагнуулын нууц болон онц нууц мэдээ мэдээллийг олж чадах асар ховор боломж чадвартай нууц ажилтан болон үнэлэгдэж, АНУ болон Английн аль ч улсын харъяат болсноор ажлын байраар бүрэн хангах болон Америк, Английн цэргийн “хурандаа” цол олгох баталгаа гаргаж өгчээ. Москвад эргэн ирэхдээ Пеньковский фото камер, радио хэрэгсэл, хальс, нууц мэдээ бичих тусгай цаас, техник хэрэгслээр бүрэн хангагдсан байлаа. Мөн мэдээ дамжуулах нууц газрыг урьдчилан бэлдсэн байна.

Барууны тусгай албадтай тогтоосон түүний харилцаа ойролцоогоор нэг жил хагас хиртэй үргэлжилсэн хугацаанд пуужингийн зэвсэглэл, Зөвлөлтийн гадаад, дотоод улс төрийн бодлого, АХХ-ны явуулж буй үйл ажиллагаа, цэрэг стратегийн зэрэг төрөл бүрийн сэдэвтэй 5 мянга орчим мэдээ, мэдээлэл шилжүүлэн өгөхөөс гадна ЗХУ-ын нам, төрийн зүтгэлтнүүд болон Москвагийн удирдах хүрээнийхний талаар гарч буй ноцтой асуудлууд, яриа өгүүлэл, хов живийн талаар ч мэдээлж байв.

Пенсковский нийтдээ 7750 хуудас бүхий 5500 баримт бичиг буулгасан 111 ширхэг бичил хальс, барууны тусгай албадад шилжүүлсэн байна.

Пеньковскийг 1962 оны 10 сарын 22-нд баривчлав. Сэжиглэгдэх үндэслэл нь гадаадын дипломат ажилтнуудтай ойр ойрхон харилцан уулзаж байсан тул түүний гэрийн утсанд чагнах төхөөрөмж суурилуулж, нууц нэгжлэг хийсний үр дүнд шууд баривчлах шийдвэр гаргажээ. ЗХУ-ын Дээд шүүхийн цэргийн коллеги Пеньковскийд буудан алах ял өгсөн ч эх орныхоо эсрэг хэтэрхий их хор хөнөөлтэй ажилласан тул амьдаар нь хайлуулах зууханд шатаасан тухай нэр бүхий хүмүүсийн яриа олны дунд байдаг ажээ. Энэ тухай Зөвлөлтийн цэргийн тагнуулын ажилтан Виктор Суворовын “Аквариум” номонд дурдсан байдаг. Хамгийн аймшигтай нь “Аквариум” номонд бичсэнээр баримтат кино бичлэг хийж, цэргийн тагнуулын ажилтнуудыг эх орноосоо урвасан тохиолдолд ийм л үхэл ирнэ гэдгийг харуулж бусдад сургамж болгодог байв. 

Пеньковскийн илчлэгдсэн явдал нь Зөвлөлтийн тусгай албаны нэр хүндэд ноцтой цохилт болж анх удаа өөрийн ажилтнуудаас урвагч төрсөн гэдгийг хүлээн зөвшөөрөхөд хүрэв. Илчлэгдсэнийх нь дараа урвагчийг чухал албанд арын хаалгаар татан оруулсан Варенцовын маршал цолыг хурааж хошууч генерал болгосон. Цэргийн тагнуул, Улсын Аюулаас Хамгаалах Хороог дахин зохион байгуулж, бараг 1000 гаруй генералын албан тушаалыг өөрчилсөн, цол бууруулсан, армиас халсан том үйл явдал болсон юм.

Жич: Дээр дурдсан хүмүүсийг урвагч болохыг нийтлэлч миний бие тодорхойлоогүй бөгөөд Оросын ард  түмэн, олон нийт, төр засгийн тодорхойлолт явж байгааг анхаарна уу.

Нийтлэлч Г.Ванчиг

Сэтгэгдэл 8ЭнгийнХэвтээБосооСэтгэгдэл бичих-Aa+
3 сар 16. 19:03
Зочин

Одоо хаашаа юм, бид ч гэсэн Оросуудын хяналтаас гарч, өөрсдийнхөөрөө байх гэж зүтгэвэл иймэрхүү хувь тавьлан хүлээж байгаа гэсэн үг үү? Хэрэв тийм биш бол харь улсын дотоод хэрэг бидэнд ямар хамаатай вэ? Зүгээр л өөрсдийн хэдэн авилгачидтайгаа тооцоогоо бодвол барав биш үү?

3 сар 14. 11:25
Зочин

Манай генерал Хурцыг чөлөөтэй явуулаад байж болохгүй л юм байгаа юм даа. Хүн нь асар найдваргүй учраас энд тэнд манай нууцыаар мөнгө хийгээд байж чадах хүн.

3 сар 14. 10:21
түүх

Манай урвагчууд юу болсон вэ хэдэн хүүхэн яваад байсан тэгээд чимээгүй болсон бид өөрсдөө баруунхны гар хөл болсон урвагч нарын дунд байгаа болохоор мэдэхээ больжээ

3 сар 13. 22:20
Зочин

с. баяр их идсэний дараа амарч маш хүнд өвчин туссан гэсэн яасан бэ. ерөнхий сайдаа хугацааг нь дуусгааагүй өгөө биз дээ . одоо мөн ийм маягаар үхэх нь болоогүй юу

5 сар 30. 13:52
Зочин

Идсэн,уусан гэж тогтоосон юм уу Би дуулаагүй байж болно Эхлээд гэм зэмийг нь тогтоогоод дараа нь ярих хэрэгтэй шүүдээ Хүний мууд дурлагчидаа

3 сар 13. 21:47
Зочин

Тамын эзэнт гүрэн юм даа,өөр хэлэхзүйл олдохгүй нь.

3 сар 13. 22:05
Зочин

Ванчиг гэдэг хүн юмыг уншаад цааш нь дүгнээд бичэж сур Орос улс химийн хороор хүн устгахгүй байх хуультай энэ хордуулгууд Оросоос урваад Ангилд ажилаад хэрэг нь дуусахаар англи устгаад Оросын эсрэг хэргийг болихоор ашиглаад баригдаад чимээгүй болдог шүү

3 сар 13. 20:12
Монголчууд

Баярыг бас хордуулж устга

Сэтгэгдэл бичих
Санамсаргүй нийтлэл [ Энд дарна уу ]