Ангилал

Сайтын талаар ярилцъя Уншигчдын санал бодол

Ерөнхий нарийн бичгийн даргын үнсэлт ба онцлог шинжүүдУншсан6,262

Гэхдээ тэрээр хошин шогийн өндөр мэдрэмжтэй нэгэн бөгөөд гадаад улсуудын удирдагчидтай хэлэлцээ хийх үеэр ядаргаагаа тайлахын тулд элдэв онигоо ярих юмуу хошигнож чаддаг байжээ.

ЗСБНХУ-ыг 18 жил удирдсан Леонид Брежнев 1906 оны 12 дугаар сарын 19-нд төржээ. Амьдралын сүүлийн жилүүдэд биеийн байдал нь дордсонтой холбогдон Брежнев шинэ шинэ шагнал авахад л ахиухан анхаарч, харин улс орны чухал чухал асуудлыг шийдвэрлэхэд төдийлөн анхаарал тавьдаггүй байж.

Эдийн засаг, улс төрийн болон нийгмийн амьдралын зогсонги байдлыг Брежневийн төрөлх Днепропетровск мужаас гаралтай голдуу ахимаг насны хүмүүс засгийн эрхэнд байснаар голчлон тайлбарладаг байв. Тэд юуг ч өөрчлөхийг хүсдэггүй байжээ.

Гол албан тушаалуудад өөрийн найз нөхдийг тавьснаар тэр Никита Хрущевыг авч хаясан шиг өөрийг нь зайлуулчихгүй байхаас өөрийгөө хамгаалж байсан хэрэг.

Хуйвалдаанаас тэр сэргийлж чадсан ч, харин Брежневийн засаглалын жилүүдэд улс орны хөгжил ихээхэн удааширч эхэлсэн юм.

Гэтэл олон хүн тэр үеийг эргэн санагалзаж байдаг бөгөөд юу гэвэл энэ нь иргэдийг сэтгэл санааны хямралаас хэрэг дээрээ ангижруулсан тогтвортой үе байсан хэрэг. Одоог хүртэл Оросын ард түмний дунд эргэн дурсагдаж байгаа түүний онцлогуудаас сонирхуулъя. Ямар ч удирдагчид түүн шиг ихээр онигооны баатар болоогүй бизээ.

1976 онд Брежнев клиник үхэлд орж, түүнийхээ дараагаар хөдөлгөөн, хэл яриа нь эвгүй болсон шалтгаан ч үүнд нь нөлөөлсөн байх. Гэхдээ тэрээр хошин шогийн өндөр мэдрэмжтэй нэгэн бөгөөд гадаад улсуудын удирдагчидтай хэлэлцээ хийх үеэр ядаргаагаа тайлахын тулд элдэв онигоо ярих юмуу хошигнож чаддаг байжээ. Өөрийгөө егөөдөж, доорхи хүмүүстэйгээ ярилцахдаа, өөрийгөө ч шоолж дамшиглаж чаддаг байсан гэнэ.

Сонирхолтой нь тэрээр гадаад байдалдаа асар их анхаарал тавьдаг байж. Хувийн оёдолчноор хувцсаа оёулж, үргэлж дэгжин хувцасладаг байжээ. Хүзүүгээ бариулахгүй гэхдээ резинтэй зангиа зүүдэг байсан байна. Энэ нь бүгд дан ганц гадаад үйлдвэрийн зангиа байжээ.

Брежнев үнсэлтээрээ алдартай бөгөөд дэлхийн олон орны удирдагчдыг үнсэж явсан хүн. Эхлээд тэдний нэг хацрыг, дараа нь нөгөө хацрыг, сүүлд нь уруул дээр нь үнсдэг байжээ. Ийм үнсэлтийг “Брежневийн гурвал” хэмээн хочилдог байсан байна.

Байнга өмсдөг малгайгаараа социалист лагерийн бүхий л орнуудын намын ажилтнуудын дунд “Москвичка” хийцийн хавтгай каракуль малгайн моодыг дэлгэрүүлжээ.

 

Түүний хобби ан ав. Бүр нэг талаараа донтсон ч гэж хэлж болох. Зэрлэг гахай, баавгай агнаж, нугасны анд тогтмол явдаг түүнтэй энэ л үеэр нь улстөрчид аливаа асуудлыг шийдүүлж авах дуртай байжээ. Учир нь тэр ан авын үед гойд сайхан ааштай болдог байж.

Шагналыг ч бас түүний хобби гэж хэлж болохоор. Учир нь Брежнев ЗСБНХУ-ын түүхэнд баатрын алтан таван хошуу медаль дөрвөн удаа, Хөдөлмөрийн баатрын нэг медаль авсан цорын ганц хүн юм. Тэр нийтдээ дотоод, гадаадын нэг зуу гаруй шагнал авчээ.

Тэрээр “Новость” янжуур татдаг байсан бөгөөд энэ хортой зуршлаа огт орхиж чадаагүй байна. Брежневт механик түгжээ бүхий тамхины тусгай хайрцаг байсан бөгөөд түүнийг нэг янжуур авсны дараа тамхины хайрцаг нь 45 минутын дараа л нээгддэг байж. Эрүүл мэндээ бодсон алхам ч гэлээ тойрон хүрээлэгчид нь энэ үед нь удирдагчийг тамхиар дайлахаа яаж мартах билээ. Мөн тэрээр нарны шил зүүдэг зөвлөлтийн анхны удирдагч байсан.

Брежнев автомашинд нугасгүй нэгэн байсныг бүгд мэднэ. Тиймээс гадаадын удирдагчид түүнд машин байнга бэлэглэдэг байжээ. Ерөнхий нарийн бичгийн даргын автопаркад 70 орчим тансаг машин байжээ.

1973 онд АНУ-ын ерөнхийлөгч Никсон Брежневт цоо шинэ “Lincoln Continental” машин бэлэглэжээ. Зөвлөлтийн намын ерөнхий нарийн бичгийн дарга үүнд маш их баярлаж, энэ машинаар хамтдаа зугаалахыг Америкийн ерөнхийлөгчид санал болгосон байна.

Брежнев асар хурдтай давхиж, огцом огцом эргэлт хийж байжээ. Машин сайн барьдаг юм байна хэмээн Никсон Брежневийг магтаад, гэхдээ үүнээс хойш түүнтэй хамт хэзээ ч нэг машинд сууж байгаагүй гэнэ.

Үзэх дуртай кино нь “Хаврын 17 учрал”. Энэ киног үзээд, тагнуулч Исаев бодитой хүн байсан учир Брежнев түүнийг шагнахаар шийдвэрлэсэн байна. Гэвч киноны гол дүрд тоглосон Вячеслав Тихоновт хөдөлмөрийн баатар цол олгох зарлиг гаргаж байлаа. Бас нэг зүйлийг онцлоход Брежнев эх орон нэгтнүүддээ шинэ жилийн мэндчилгээ телевизээр дэвшүүлэх санааг анх сэдсэн бөгөөд он солигдож мөчид үг хэлдэг нь бараг бүх социалист лагерийн удирдагчдын дунд уламжлал болжээ. Манай улсад ч гэсэн өнөөг хүртэл Ерөнхийлөгч шинэ жилээр мэндчилгээ дэвшүүлж үг хэлдэг билээ.

Сэтгэгдэл 0ЭнгийнХэвтээБосооСэтгэгдэл бичих-Aa+
Санамсаргүй нийтлэл [ Энд дарна уу ]