Ангилал

Сайтын талаар ярилцъя Уншигчдын санал бодол

Хятадууд "Анхны сансрын нисгэгч бол Хятад хүн" хэмээн итгэдэгУншсан24,026

Асар их шороо тоос босон аажмаар дарагдах үед нөгөө Вань Ху маань, сандал нь, 47 зарц нь ч алга болсон байлаа. Сансарт ниссэн байхаас зайлахгүй.

 Нийтлэлч Чалчаа саарал бичиж байна.

Хүн төрөлхтний дундаас сансрын уудамд анх гарсан хүн бол ЗХУ-ын иргэн Юрий Алексеевич Гагарин гэдгийг хүн болгон мэднэ гэж хэлж болох байх гэж найдаж байна. Гэхдээ үүнд эргэлздэг, янз бүрийн хуйвалдааны онолд итгэдэг хүмүүс ч бас хангалттай байдаг талаар "Гагаринаас өмнө сансарт ниссэн нисгэгчид гэж..." хэмээх нийтлэлдээ бичиж байсан билээ. Энэ удаа бүр ч хачирхалтай түүх буюу сансарт гарсан анхны хүн нь Хятадын Вань Ху гэдэг түшмэл байсан юм гэдэг үзэл бодлын тухай сонирхуулъя.

Хятадын анхны сансрын нисгэгч бол Ян Ли Вей хэмээх нэгэн эрхэм бий. 2003 онд анх сансарт гарч 21 цагийн дараа Өвөр Монголын нутагт дөнгөж газардаад байхдаа огтын ядарч зүдрээгүй хүн болох гэж камерын өмнө асар их хүч гарган зогсож байсныг зарим нэг нь санаж л байгаа байх. Тэгэхээр албан ёсоор бол Хятадын анхны сансрын нисгэгч нь Ян Ли Вей байх нь.

Харин албан бусаар бол...

Бүр 1985 онд Америкийн иргэн, Хятад цустай Тейлор Ван гэдэг нөхөр сансарт ниссэн гэдэг бөгөөд  Хонконгт төрсөн Уильям Андерс гээч нөхөр ч бас 1968 онд  сансарт нисч байж. Дээр нь Шеннон Лусид, Эдвард Цан Лу гээд Хятадтай янз бүрийн байдлаар холбогдох хүмүүс бий. Эдгээрээс аль нь Хятадын анхны сансрын нисгэгч вэ гээд бяцхан маргавал маргахаар байгаа биз.

Тэгвэл Хятадын төдийгүй бүр дэлхийн анхны сансрын нисгэгч бол Вань Ху юм шүү гэдэг Хятадын үндсэрхэг үзэлтнүүд бий. Хаа газрын үндсэрхэг үзэлтнүүд гэж цээжээ дэлдсэн, өвчтэй нөхдүүд байдаг, тэднийг тоож сонсох хэрэггүй гэж болох ч яагаад ч юм энэ Вань Ху-гийн түүх их сонирхолтой санагддаг юм.

Вань Ху гээч нь Хятадын түүхэн дэх тэр олон хаант улсын нэгнийх нь томоохон түшмэл байжээ. Өөрөөр хэлбэл энэ хүн яг хэзээ аж төрж амьдарч байсан бэ гэдэг нь ойлгомжгүй байгаа юм. Зарим мэдээгээр XVI зууны үед амьдарч байсан гэх бол өөр нэг нь бүр манай эриний өмнөх 2000 жилийн үеийн хүн гэнэ. Бүр Цинь Ши Хуандигийн ойрын түшмэл байсан гэдэг ч юм байдаг бололтой. Ер нь л их гар байж. Тэрээр тухайн үедээ ихээхэн боловсролтой, эрдэмтэн хүн байсан ба дээр нь хөрөнгө чинээ, эрх мэдэл ихтэй болохоороо янз бүрийн хачин хачин юм хийж туршдаг сонин зантай нөхөр байв.

Тэрээр нэг удаа асар том хэмжээтэй цаасан шувуу хийлгэжээ. Энэ цаасан шувуундаа ачаа зүүж үзэхэд өнөөх нь агаарт хөөрч, нисч байна гэнэ. Хэрвээ ийм хоёр шувуу хийгээд холбовол? ...бас ямар нэг түлхэх үйлчлэл үзүүлж чадвал, арай шувуу шиг нисчж, бүр сансарт гарч болох юм биш байгаа гэж бодогдсон бололтой.

Мань эр эрчимтэй бэлдэж эхэллээ. Хоёр том цаасан шувуу хийж холбоод дор нь өөрийн суух сандлыг зүүсэн ба сандлын ар, ёроол хэсэгт 47 ширхэг асар том хэмжээтэй дарь зүүжээ. Ингээд сансарт хөөрөх талбайдаа шувуугаа авчирч олон түмний нүдэн дээр сансарт хөөрөхөөр болж янз бүрийн сайн сайхан үг хэлсэн л юм байгаа биз. Цаг болж 47 зарц нь нэгэн зэрэг галт бамбараар дарийг асаалаа.

Пар няр түс тас...

Асар их шороо тоос босон аажмаар дарагдах үед нөгөө Вань Ху маань, сандал нь, 47 зарц нь ч алга болсон байлаа. Сансарт ниссэн байхаас зайлахгүй. Язгууртан дээдэс учир зарц нараа аваад явсан байж таарлаа гэсээр тэр олон хүмүүс тарсан юм гэдэг.

Тоглоом наадам шиг сонсогдож байж болох юм. Ямар ч байсан саран дээрх нэгэн тогоог (кратер буюу сансрын биет саран дээр унахад үүссэн тогоо) чухам энэ Вань Хугийн нэрээр нэрлэсэн байдаг нь нэг юм хэлж байгаа болов уу.

Энэ хүний тухай барууны болон Хятадын нэлээдгүй судалгаа байдаг боловч одоо хүртэл бодит хүн байсан эсэх, хэдий үед амьдарч байсан бэ гэдэг талаар маргасаар байгаа юм билээ.

Сэтгэгдэл 4ЭнгийнХэвтээБосооСэтгэгдэл бичих-Aa+
3 сар 12. 0:34
Эх оронч

Анхны бөмбөгний туршил болсоноо ч мэдээгүй байх.

3 сар 12. 14:10
Зочин

Асар их дарь тэсэрэхэд мань нөхөр хэдэн зарцтайгаа зад үсэрч тоосонцор болсон юм байна л даа. Хха

2 сар 24. 10:04
Зочин

Манай 40 бидоноор нисдэг ах хүү ч энэнээс өндөр ниссэн байх шүү хаха. Нисэх биш тэсрээд үхсэн юм биш үү. Чалчаа саарал ч овоо юм бичдэг байсан чинь энэ удаа юу биччих вэ

2 сар 22. 23:49
Зочинs

Hun ineej uhle gj bsn gj unen nym bna yg uhehee l shahlaa yooy ...

Сэтгэгдэл бичих
Санамсаргүй нийтлэл [ Энд дарна уу ]