Ангилал

Сайтын талаар ярилцъя Уншигчдын санал бодол

Эмпайр Стэйтээс үсэрсэн бүсгүйУншсан40,801

Эвелин Макхейл Инстон хотод байгаа өөрийн сүйт залуу Барри дээр яаран ирж төрсөн өдрийг нь тэмдэглэжээ.

Нийтлэлч Чалчаа саарал бичиж байна.

Эвелин Макхейл Инстон хотод байгаа өөрийн сүйт залуу Барри дээр яаран ирж төрсөн өдрийг нь тэмдэглэжээ. Маргааш өглөө нь кофе ууж суухдаа Эвелин дуу чимээ багатай боловч инээвхийлэн байсан гэдэг бөгөөд Барригийн бодсоноор бол хуримаа хэзээ, хаана, яаж хийх тухай л бодож суусан бололтой. Гэхдээ энэ бүсгүйн дотор яг юу болж байсныг одоо хэн ч мэдэхгүй билээ.

Магадгүй Эвелин үнэхээр хуримын тухай, гэхдээ сайн сайхнаар биш бүр муу муухайгаар бодож байсан ч байж болох юм. Тэрээр өнгөрсөн жил нэгэн хуримын гэрч болж ёслолын ажиллагаа дууссаны дараа “дахиж ийм хачин юм хэзээ ч үзэхгүй юмсан” гээд гэрчийн гоё сайхан даашинзаа шууд шатааж байсан байна. Үүнээс өмнө мөн цэргийн албан хаагч болоод халагдахдаа бас л ингэж хэлэн дүрэмт хувцасаа шатаасан гэдэг.

Өглөөний галт тэргээр Эвелин Нью-Йорк руу буцах болж Барри гаргаж өгчээ. Бүсгүй галт тэргэнд суухын өмнө хайртай залуугийнхаа чихэнд зөвхөн хос хоёрын нэгэндээ хэлдэг үгийг хэлэн тэвэрч үнсээд салсан ба баяртай гэж гар даллаж байхдаа тайван, аз жаргалтай байлаа.

Бүсгүй Нью-Йорк-т ирээд Клинтон зочид буудалд ирж ганц хуудас цаасан дээр хэдэн үг бичин цүнхэндээ хийжээ. Тэр бичсэн зүйл нь:

 "Хайртай залуу маань надгүй байсан нь дээр... Би хүний сайн эхнэр болж чадахгүй хүн" гэж бичээд дараа нь үүнийгээ дарсан байсан ба бас “...Намайг үхсэний дараа, эрэмдэглэж муухай болсон царай зүсээ ойр дотны хүмүүстээ харуулах хүсэлгүй байгаа учир цогцсыг маань шатаагаарай...” гэсэн хүсэлт бүхий гэрээслэл байжээ.

Зочид буудлаас гарсан бүсгүй явган явсаар алдарт Эмпайр Стейт билдинг рүү (Empire State Building) явж очлоо. Тухайн үед энэ тэнгэр баганадсан байшингаас үсэрч амиа хорлох гэсэн маш олон тохиолдол гарч байсан бөгөөд Их Хямралын үеэс энэ нь бараг л уламжлал заншил болох шахсан байна. 86-р давхар дахь алсыг харах тавцан нь 344 метрийн өндөрт байрлах ба чухам эндээс л амиа хорлох гэсэн хүмүүс амьдралынхаа хамгийн сүүлчийн шийдвэрийг биелүүлдэг байж. Асар өндөр газар тул цаг агаар тааруухан үед хүчтэй салхитай байдаг энэ талбараас нэгэн эмэгтэй нисэж үхэхээр шийдэн харайсан ч хүчтэй салхи буцаан харах талбай руу шидсэн түүх ч бий юм гэнэ лээ.

Эвелин 1947 оны 5-р сарын 1-ний өглөө хүрэх гэсэн газраа буюу Нью-Йорк хотыг харах талбар дээр гарч иржээ. Бүсгүй 30-минутын турш их хотыг, хүний амьдралыг харж удаан суусан байна. Дараа нь Эвелин харах талбарын хашлагыг даван байшингийн ирмэг дээр ирж хэсэг зогсож байгаад шууд л урагшаа хий хоосон руу алхлаа...

Бүсгүй дотор нь захиа байгаа цүнхээ, зузаан гадуур хувцсаа газарт нямбайлан тавьж орхисон байжээ.

Жижүүрийн цагдаа Жон Моррисон хүчтэй дуу чимээ гарч, хүмүүс орилолдох үеэр хэргийн газар гүйж очоод кадиллак машин дээр унасан нэгэн эмэгтэй хүний цогцос байгааг олж харж. Тойрсон хүмүүсийг холдохыг гуйсан ч хэн ч түүний үгэнд оролгүй цогцсыг нүд салгалгүй харсаар байсан ба цагдаа эр ч бас удалгүй тэдэнтэй адилхан байдалд орж, амьгүй болсон биеэс харц салгаж чадахаа больсон байжээ. Эвдэрч ямбийсан хар машины ёрдойж сордойсон төмөр дунд хөлөө ачсан мэт, маш тайван хэвтэж байгаа хүн, бээлий өмссөн гараараа гоё сайхан хүзүүний зүүлтээ гайхуулж байгаа юм шиг тэр царай, мөрөөдөж зүүдэлж, аальгүйтэж байгаа ч юм шиг тэр хэв төрх өөрийн эрхгүй хүн болгоны харцыг булааж байв.

Эвелиний дотор эд эрхтнүүд юу ч үгүй болсон ч гадаад төрх нь зүв зүгээр мэт үлдэж хоцорсон байлаа. Бүсгүй үгүй болсноос хойш 4 минутын дараа авсан энэ зураг дараа нь дэлхий дахинд “Хамгийн царайлаг амиа хорлолт” гэсэн нэрээр алдаршиж үлдсэн билээ.

Энэ явдлын дараа олон жүжиг, кинонд Эвелин Макхейлийн үхлийг янз бүрээр харуулсан бөгөөд яруу найрагч, дуучид цөөнгүй бүтээлийг түүнд зориулж гаргасан юм. Эдгээрээс хамгийн алдартай нь Энди Уорхолын “Амиа хорлолт” гэдэг зураг билээ.

Энэ бүсгүй чухам юунаас болж амиа хорлосон талаар одоо хүртэл сэтгэл судлаачид, түүхчид маргалдсаар байдаг бөгөөд чухамхүү Эвелиний хэрэг явдлын дараа “хүн амиа хорлох гэдэг нь чухам юу гэсэн үг вэ” гэдэг тал дээр олон хүмүүсийн бодол санаа өөрчлөгдөж эхэлсэн гэж зарим судлаачид үздэг юм байна. Энэ явдал одоо хүртэл олны анхааралд байдаг бөгөөд орчин үеийн урлаг, бизнест ч энэ тухай дурссан зүйлсүүд гарсаар л байна.

Сэтгэгдэл 0ЭнгийнХэвтээБосооСэтгэгдэл бичих-Aa+
Санамсаргүй нийтлэл [ Энд дарна уу ]