Ангилал

Сайтын талаар ярилцъя Уншигчдын санал бодол

Украины Ерөнхийлөгч НАТО-гийн орнуудыг дахин уриалавУншсан10,763

ОХУ-ын зэвсэгт хүчин Украинд цэргийн тусгай ажиллагаа хэмээн нэрлэсэн дайралтыг явуулж эхэлснээс хойш гурав дахь долоо хоногтоо хоёр талын зэвсэгт мөргөлдөөн үргэлжилсээр байна. Ингээд сүүлийн үеийн мэдээллүүдийг хүргэе.

History.mn (Tolgoilogch.mn) вэбсайтын редакцаас Украинд өрнөж буй байлдааны ажиллагааны талаархи мэдээллийг уншигчдадаа тэнцвэртэй хүргэхийн үүднээс Итар ТАСС, Газета.ру, Лента.ру, Си Эн Эн, Би Би Си, Ройтерс зэрэг Оросын болон өрнөдийн мэдээллийн агентлагуудын эх сурвалжийг хамтад нь хүргэж байгаа юм.

ОХУ-ын зэвсэгт хүчин Украинд цэргийн тусгай ажиллагаа хэмээн нэрлэсэн дайралтыг явуулж эхэлснээс хойш гурав дахь долоо хоногтоо хоёр талын зэвсэгт мөргөлдөөн үргэлжилсээр байна. Ингээд сүүлийн үеийн мэдээллүүдийг хүргэе. 

 

Associated Press 2022.03.14. 18:50

Өнгөрсөн лхагва гаригт Украины өмнөд хэсгийн Мариуполь хотын амаржих газар бөмбөгдөлтөд өртсөний улмаас эмнэлгийн гадна шархадсан бие давхар эмэгтэйг дамнуурга дээр авч явж буй яаралтай тусламжийн ажилтнуудын зураг дэлхий даяар цацагдсан билээ. Тэгвэл уг зургийн эзэн дөнгөж төрсөн нярайнхаа хамтаар нас барсан талаар Associated Press мэдээлэв. Тухайн үед Мариуполь хотын зөвлөл Оросын цэргүүдийг агаараас хэд хэдэн бөмбөг хаясан гэж буруутгаж, Украины Ерөнхийлөгч Володимир Зеленьский уг халдлагыг "харгислал" гэж нэрлэсэн юм. Харин ОХУ-ын Гадаад хэргийн сайд Сергей Лавров Мариуполь дахь бөмбөгдөлтөд өртсөн эмнэлгийг Украины радикал үзэлтнүүдийн Азовын батальоны бааз байсан бөгөөд бүх өвчтөн, сувилагч нар явсан гэж мэдэгдсэн ба ОХУ-ын Батлан ​​хамгаалах яамны хэвлэлийн төлөөлөгч хэвлэлийнхэнд өгсөн ярилцлагадаа "оросууд амаржих газрыг буудсан гэх мэдээлэл нь өдөөн хатгалга" хэмээн нэрлэж байсан.

CNN. 2022.03.14. 18:13

Украины Ерөнхийлөгчийн ажлын албаны зөвлөх Алексей Арестович Мариуполь хотын төлөөх тулааны үеэр одоогийн байдлаар 2500 гаруй хүн амиа алдсан гэж мэдэгдэв. "Украины зэвсэгт хүчин Мариупольд амжилт олж байна. ОХУ-ын анги нэгтгэлүүдийн танк, өөрөө явагч хэрэгслүүдийн ээлжит дайралтыг няцаагаад байна. Гэсэн ч оросууд хотыг эзлэхийн тулд газрын хөрснөөс арчихаар хичээж байна. Хотын эрх баригчдын албан ёсны мэдээгээр 2500 гаруй хүн амь үрэгдсэн" хэмээжээ.

CNN. 2022.03.14. 17:00

Украинд явуулж буй цэргийн ажиллагаандаа зориулж ОХУ цэргийн техник хэрэгсэл, шаардлагатай эд зүйлсийн тусламж үзүүлэхийг БНХАУ-д хүссэн гэх мэдээлэл өнөөдөр цацагдсан билээ. Тэгвэл ОХУ-ын зүгээс ямар нэгэн тусламжтай холбоо бүхий хүсэлт гаргаагүй гэж Хятадын албаны эх сурвалж мэдээлсэн байна. БНХАУ-ын ГХЯ-ны хэвлэлийн төлөөлөгч Жао Лижиан хэвлэлийн бага хурал дээр хэлэхдээ "АНУ худал мэдээлэл түгээж байна. Украйны асуудлаарх Хятадын байр суурь тууштай, тодорхой бөгөөд бид энхийн хэлэлцээг байгуулахыг бүх талаар дэмжиж байгаа. Тиймээс гал дээр тос нэмэхийн оронд бүх талууд хүлээцтэй байж, хурцадмал байдлыг намжаах, дипломат арга замаар шийдвэрлэхийн төлөө зүтгэх нь чухал” гэжээ.

ОХУ-ын зүгээс БНХАУ-аас тусламж хүссэн гэх мэдээлэлд "Орос улс эдийн засгийн дэмжлэг болон зэвсэг техникийн тусламж, нэн ялангуяа нисгэгчгүй онгоц нийлүүлэхийг Хятадаас хүссэн" хэмээж байсан юм. Тэгвэл ямартай ч БНХАУ-ын талаас үүнийг үгүйсгэсэн байна.

BBC 2022.03.14. 11:59

Украинд явуулж буй цэргийн ажиллагаандаа зориулж ОХУ цэргийн техник хэрэгсэл, шаардлагатай эд зүйлсийн тусламж үзүүлэхийг БНХАУ-аас хүссэн гэх мэдээлэл цацагдлаа. "Орос улс эдийн засгийн дэмжлэг болон зэвсэг техникийн тусламж, нэн ялангуяа нисгэгчгүй онгоц нийлүүлэхийг Хятадаас хүссэн" хэмээсэн ба энэ мэдээлэлтэй холбогдуулан "Хэрэв БНХАУ Орос улсын Украинд хийж буй халдан түрэмгийлэлд дэмжлэг үзүүлвэл хатуу үр дагавартай нүүр тулна хэмээн АНУ мэдэгдлээ" гэж Америкийн хэвлэлүүд мэдээлж байна.

Нэрээ нууцалсан албаны эх сурвалж АНУ-ын олон мэдээллийн хэрэгсэлд Орос Хятадаас тусламж үзүүлэхийг хүссэн гэж мэдэгдсэн байна. Вашингтон дахь Хятадын Элчин сайдын яам энэ мэдээллийг үгүйсгэсэн юм. АНУ-ын талаас гаргасан энэхүү анхааруулга сэрэмжлүүлэг нь Италийн Ром хотноо болох АНУ, Хятадын дээд албан тушаалтнуудын уулзалтын өмнө гарч байгаа юм. Хямрал эхэлснээс хойш Бээжин эртний холбоотон Москвад хүчтэй дэмжлэг үзүүлсээр ирсэн ч цэргийн болон эдийн засгийн ямар нэгэн дэмжлэг үзүүлээгүй билээ.

BBC 2022.03.14. 07:56

Украины Ерөнхийлөгч Володимир Зеленьский НАТО-гийн удирдагчдыг Украины нутаг дэвсгэрт нислэгийн хориотой бүс тогтоохыг уриалсаар байна. Хамгийн сүүлд тэрээр өөрийн сошиал хуудастаа "Хэрэв та нар манай тэнгэрийг аюулаас хаахгүй бол Оросын пуужингууд НАТО-гийн гишүүн орнуудын нутаг дэвсгэр дээр унах нь цаг хугацааны асуудал боллоо" гэж мэдэгджээ. ОХУ-ын Агаар, сансрын хүчний зүгээс Украины Яворив дахь цэргийн сургалтын баазад цохилт өгсний дараа Зеленьский ийн НАТО-гийн орнуудад хандан мэдээлэл хийсэн байна.

НАТО-гийн гишүүн орон болох Польшийн хилээс 25 км-ийн зайд орших энэхүү Украины цэргийн бааз агаарын цохилтод өртсөний улмаас 35 хүн амиа алдаж, 134 хүн шархадсан юм.

НАТО-гийн цэргийн хүчнээс Украины тэнгэрийг нислэгийн хориотой бүс болгон зарлавал тус улсад явуулж ОХУ-ын цэргийн ажиллагаанд оролцож буй нисэх онгоцууд хүссэн хүсээгүй мөргөлдөөнд хүрэх юм. Энэ байдлыг ч АНУ-ын Ерөнхийлөгч Жо Байден өмнө нь анхааруулж "Хэрвээ НАТО Украины асуудалд оролцвол Дэлхийн гуравдугаар дайн үүсч болно" гэсэн утга бүхий мэдээлэл хийж байсан юм.

Итар ТАСС. 2022.03.14. 18:10

Донецк хотод Украины талаас харвасан "Точка-У" пуужингийн хэлтэрхий унасны улмаас 20 хүн амиа алдаж, есөн хүн шархадсан тухай Донецкийн тэргүүн Денис Пушилин "Россия-1" сувагт ярьжээ.

"Хэдийгээр "Точка-У" пуужинг унасан ч хэлтэрхийнүүд нь их хэмжээний хохирол учруулж, энгийн иргэд амь насаа алдсан нь аймшигтай. Хүмүүс зүгээр л АТМ машин дээр дугаарлаж байсан, нийтийн тээврийн зогсоол дээр хүмүүс байсан. Амиа алдагсдын дунд хүүхдүүд байгаа" гэж тэр онцлов. Пушилины хэлснээр пуужин нь "кластерийн цэнэгтэй байсан" гэжээ. Хэрвээ пуужинг амдан сүйрүүлээгүй бол илүү олон хүний ​​амь нас эрсдэх байсан" гэж нэмж хэлэв.

***

ОХУ-ын зэвсэгт хүчин Украинд цэргийн тусгай ажиллагаа хэмээн нэрлэсэн дайралтыг явуулж эхэлснээс хойш гурав дахь долоо хоногтоо хоёр талын зэвсэгт мөргөлдөөн үргэлжилсээр байна. Украины тал Оросын дайралтыг эзлэн түрэмгийлэл хэмээн нэрлэж дэлхийн улс орнуудаас түрэмгийлэгчдийн эсрэг тулалдах сайн дурын дайчдыг хүлээн авахаа зарласан билээ. Үүнээс хойш цөөнгүй үндэстний сайн дурын дайчид Украинд ирж байлдааны ажиллагаанд оролцож эхэлсэн хэмээж буй. Тэгвэл өчигдөр болсон ОХУ-ын Үндэсний аюулгүй байдлын Зөвлөлийн хурал дээр тус улсын Ерөнхийлөгч Владимир Путин ОХУ-ын талд тулалдах гадаадын сайн дурын дайчдыг Украинд илгээх санал гаргасан байна.

Ойрхи Дорнодод 16,000 орчим сайн дурынхан Оросын зэвсэгт хүчинтэй цуг Украинд байлдахад бэлэн байгааг энэ үеэр Батлан хамгаалахын сайд Сергей Шойгу Ерөнхийлөгчдөө дуулгажээ. Эдгээр нь голдуу Башар Ассадын длэглэмийг дэмжигч Сирийн дайчид байх магадлалтай. Сирийн Ерөнхийлөгч Башар Аль Ассадын дэглэмийг Москвагийн эрх баригчид олон жил тууштай дэмжиж, цэргийн ажиллагаа явуулан дэмжиж байгаа юм.

“Мөнгөний төлөө биш, өөрийн хүслээр Донбассын ард иргэдэд туслахыг хүсэж байгаа хүмүүс байвал тэднийг хүссэн зүйлээр нь хангаж, мөргөлдөөний бүсэд хүргэх хэрэгтэй” гэж Путин Батлан хамгаалахын сайддаа хэлжээ. Энэ үеэр Шойгу олзолж авсан Украин болон өрнөдийн орнуудаас Украинд нийлүүлсэн төрөл бүрийн зэвсгүүдийг Луганск, Донецкийн салан тусгаарлагчдад шилжүүлж өгөх санал гаргасныг нь Путин дэмжсэн байна.

Путины мэдэгдлийн дараа Украины Ерөнхийлөгч Володимир Зеленьский энэ талаар байр сууриа илэрхийлжээ. “Хэрвээ Ассадын дэглэм Украин руу цэрэг илгээхээр шийдсэн бол тэд огт таньж мэдэхгүй газар оронд их бууны сумны бай болохоос хэтрэхгүй шүү” хэмээн тэрээр анхааруулжээ. Одоогоор Сири улсад сайн дурынхан элсүүлж байгаа тухай мэдээлэл ирээгүй байгааг Зеленьский нэмж хэлсэн ч ОХУ-ын туг далбаа Z хэмээх тодотгол бүхий туг далбаа барьсан Сирийн сайн дурын дайчид Украинд тулалдахаа илэрхийлж буй дүрс бичлэг цахимаар тархаад байгаа юм. Украины талд байлдах олон улсын сайн дурынхны тоо мөн 16,000 хүрээд байгааг Зеленьский өмнө нь мэдэгдэж байсан юм.

Саяхан АНУ-ын албаны эх сурвалж Wall Street Journal сэтгүүлд ярихдаа хот доторх тулаанд мэргэшсэн сайн дурынхныг Сирийн талаас илгээх боломжийг Москвагийн эрх баригчид судалж эхэлсэн тухай мэдээлж байлаа. Ажиглагчдын дүгнэж буйгаар Украин дахь байлдааны ажиллагаа сунжирвал олон үндэстний сайн дурын дайчид дайны фронтод тулалдах магадлалтай болж байгаа аж.

 

Итар ТАСС. 2022.03.13. 16:48

ОХУ-ын Агаар, сансрын хүчний агаарын довтолгооноос хамгаалах хүчин Украины талын нэг Су-24 онгоц, хоёр нисгэгчгүй онгоц-дроныг Любимовка орчимд буудаж унагасан хэмээн ОХУ-ын Батлан ​​хамгаалах яамны хэвлэлийн төлөөлөгч Игорь Конашенков мэдээллээ.

 

CNN. 2022.03.13. 16:15

Украины зүүн хэсгийн Донецк мужийн нутаг дэвсгэрт орших олон зууны турш оршиж ирсэн түүхийн дурсгалт газар болсон Святогорск Лаврагийн үнэн алдартны шашны хийдийн байр агаарын цохилтод өртсөн тухай Украины парламентын Телеграм дахь хуудаст мэдээлжээ. Хэд хэдэн хүн шархдаж Святогорскийн эмнэлэгт хүргэгдсэн, хүний амь нас эрсдээгүй гэжээ. Хийдийн байранд 520 дүрвэгсэд орогнож байсан бөгөөд тэдний 200 нь хүүхэд байсан гэнэ. Святогорск хотод нийтдээ ойр орчмоос цугласан 10 мянга орчим дүрвэгчид байгаа юм. Хийдийн хамба лам Митрополитан Арсений хэлэхдээ "Энэ хотод ямар ч цэргийн анги байхгүй, Украины хамгийн амар амгалан, ариун газруудын нэг рүү халдлага үйлдлээ" хэмээжээ. Святогорск хот дахь Святогорск Лаврагийн хийд нь 1526 онд байгуулагдсан аж.

 

Итар ТАСС. 2022.03.13. 16:24

ОХУ-ын зэвсэгт хүчин Никольское тосгон дахь үнэн алдартны шашны Николо-Васильевскийн хийдэд Айдар хэмээх Украины хэт үндсэрхэг үзэлтнүүдийн батальоны дайчдад барьцаалагдсан 300 орчим иргэд, санваартнуудыг тусгай ажиллагааны явцад чөлөөлсөн байна. Украины хэт үндсэрхэг үзэлтнүүдийн Айдар батальоны дайчид хийдийн байрыг байлдааны ажиллагааны бэхлэлт болгон тоноглож, хүмүүсийг барьцаалсан байсан тухай ОХУ-ын Батлан ​​хамгаалах яамны хэвлэлийн төлөөлөгч Игорь Конашенков мэдээлжээ.

 

Итар ТАСС. 2022.03.13. 16:48

ОХУ-ын зүгээс Украинд явуулж байгаа тусгай ажиллагааны явцад сүүлийн үеийн цагийн мэдээллээр Украины цэргийн дэд бүтцийн 3687 объектод цохилт өгч устгасан хэмээн Батлан ​​хамгаалах яамны хэвлэлийн төлөөлөгч Игорь Конашенков мэдэгдэв. Түүний хэлснээр 99 нисэх онгоц, 128 нисгэгчгүй нисэх төхөөрөмж, 1194 танк болон бусад байлдааны хуягт машин, 121 олон тооны пуужин харвагч, 443 хээрийн их буу, миномёт, 991 нэгж цэргийн тусгай машин устгагдсан байна. ОХУ-ын Батлан ​​хамгаалах яамнаас болж буй үйл явдлын талаар тодруулахад Оросын цэргүүд Украины хотуудыг онилоогүй, зөвхөн Украины цэргийн дэд бүтцийг нарийвчилсан цохилтоор цохиж, цэргийн хүчинг буулгаж авч байна, энгийн иргэдэд ямар ч аюул заналхийлэл байхгүй хэмээжээ.

 

CNN. 2022.03.13. 15:23

Украины баруун хэсэгт орших Ивано-Франковск хотын нисэх онгоцны буудлын дэд бүтэц Оросын агаарын довтолгооны улмаас бараг бүрэн сүйрсэн гэж тус хотын захирагч Руслан Марцинкив Украины парламентын Рада сувагт ярихдаа мэдэгджээ. Урьдчилсан мэдээллээр хүний ​​амь эрсдээгүй байна. Энэ бол Украины нисэх онгоцны буудал руу хийсэн Оросын гурав дахь халдлага гэж Р.Марцинкив хэлжээ.

 

CNN. 2022.03.13. 14:30

Украины баруун хойд нутгийн Львов хотын ойролцоох цэргийн баазад Оросын арми агаарын цохилт өгснөөр оросууд Украин дахь довтолгоогоо баруун зүгт өргөжүүлж эхэллээ гэж үзэж болно. Агаарын цохилт Львов дахь Олон улсын энхийг сахиулах, аюулгүй байдлын төвийг онилсон бөгөөд энэ нь сургалтын төв бүхий Украины томоохон цэргийн баазын нэг юм. Бааз руу найман пуужин харвасан хэмээжээ.

Түүнчлэн өмнө нь огт цохилтод өртөөгүй байсан Украины баруун хязгаар дахь нисэх буудлууд руу Оросын талаас цувраа цохилт өгчээ. Үүний улмаас Польшийн хилээс 100 гаруй км-ийн зайд орших Украины баруун хойд хэсэгт орших Луцк хотын нисэх онгоцны буудалд их хэмжээний хохирол учирчээ. "Оросын агаарын хүчнээс дөрвөн пуужин харваж, хоёр хүн амиа алдсан" гэж Волынь мужийн захирагч мэдэгдсэн байна. Львов хот нь Украины соёлын төв бөгөөд хотын түүхэн төв нь ЮНЕСКО-гийн Дэлхийн өвд бүртгэгдсэн газар аж. Мөн дайны улмаас олон мянган хүмүүс тус хот руу дүрвэсэн бөгөөд тэндээсээ Польшийн хил рүү чиглэсэн цуваа үүсгээд байгаа юм.

 

 CNN. 2022.03.13. 13:20

 Украинд довтолж буй ОХУ-ын зэвсэгт хүчний зүгээс тус улсын нутаг дэвсгэрт орж ирж буй гадаадын цувааг онилж, цохилт өгч болзошгүй болжээ. Учир нь ОХУ-ын Гадаад хэргийн дэд сайд Сергей Рябков "Украин руу зэвсэг, техник тээвэрлэж буй гадаадын ямар ч тээврийн цувааг хууль ёсны бай гэж үзэн цохилт өгөх болно" хэмээн анхааруулсан байна. Энэ нь АНУ-аас Украинд нэн даруй батлан хамгаалахын 200 сая долларын өртөг бүхий тусламж үзүүлэхээ зарласантай холбогдуулан гаргаж буй Кремлийн анхааруулга бололтой.

Сэтгэгдэл 0ЭнгийнХэвтээБосооСэтгэгдэл бичих-Aa+
Санамсаргүй нийтлэл [ Энд дарна уу ]